ದಾವಣಗೆರೆ

ಹಿಮೊಫಿಲಿಯಾ ರೋಗಿಗಳ ಒಡನಾಡಿ

ದಾವಣಗೆರೆಯ ಕರ್ನಾಟಕ ಹಿಮೊಫಿಲಿಯಾ ಕೇರ್ ಮತ್ತು ಹೆಮಟಾಲಜಿ ಸಂಶೋಧನಾ ಕೇಂದ್ರ.
ದಾವಣಗೆರೆಯ ಕರ್ನಾಟಕ ಹಿಮೊಫಿಲಿಯಾ ಕೇರ್ ಮತ್ತು ಹೆಮಟಾಲಜಿ ಸಂಶೋಧನಾ ಕೇಂದ್ರ.
ರಮೇಶ ಜಹಗೀರದಾರ್
Published on: 

ಪ್ರಮುಖ ಮುಖ್ಯಾಂಶಗಳು

  • ಡಾ. ಸುರೇಶ ಹನಗವಾಡಿಗೆ ‘ಪದ್ಮಶ್ರೀ’ ಗೌರವ
  • 4 ದಶಕಗಳ ಸೇವೆಗೆ ಸಂದ ಪುರಸ್ಕಾರ
ದಾವಣಗೆರೆ : ಹಿಮೊಫಿಲಿಯಾ ರೋಗಿಗಳ ಚಿಕಿತ್ಸೆ, ಆರೈಕೆಗಾಗಿ ತಮ್ಮ ಬದುಕನ್ನೇ ಮುಡಿಪಾಗಿಟ್ಟಿರುವ ದಾವಣಗೆರೆಯ ಕರ್ನಾಟಕ ಹಿಮೊಫಿಲಿಯಾ ಸೊಸೈಟಿ ಅಧ್ಯಕ್ಷ ಡಾ. ಸುರೇಶ ಹನಗವಾಡಿ ಅವರಿಗೆ ಈ ಬಾರಿಯ ‘ಪದ್ಮಶ್ರೀ’ ಗೌರವ ಲಭಿಸಿದೆ.
ಸ್ವತಃ ಹಿಮೊಫಿಲಿಯಾ ರೋಗಿಯಾಗಿ ನೋವು ಅನುಭವಿಸುತ್ತಲೇ, ಡಾ. ಸುರೇಶ್ ಅವರು ಆ ಸಮುದಾಯದ ಹಿತಕ್ಕಾಗಿ ಮೂರ್ನಾಲ್ಕು ದಶಕಗಳಿಂದ ಶ್ರಮಿಸುತ್ತಿದ್ದಾರೆ. ಕರ್ನಾಟಕ ಹಿಮೊಫಿಲಿಯಾ ಸೊಸೈಟಿಯನ್ನು ಕಟ್ಟಿ, ರೋಗ ಪತ್ತೆ, ಚಿಕಿತ್ಸೆ, ಸಂಶೋಧನೆ ಮತ್ತು ಸರ್ಕಾರದ ಮಟ್ಟದಲ್ಲಿ ಕಾನೂನು ರೂಪಿಸುವಲ್ಲಿ ಪ್ರಭಾವ ಬೀರುತ್ತ ಬಂದಿದ್ದಾರೆ.
ದೇಹದಲ್ಲಿ ರಕ್ತ ಹೆಪ್ಪುಗಟ್ಟದೇ ನಿರಂತರ ರಕ್ತಸ್ರಾವದಿಂದ ರೋಗಿಗಳು ಬಳಲುವುದು ಹಿಮೊಫಿಲಿಯಾದ ಲಕ್ಷಣವಾಗಿದೆ. ಈ ರೋಗಿಗಳ ಚಿಕಿತ್ಸೆಗೆ ಫ್ಯಾಕ್ಟರ್-8 ಮತ್ತು 9 ಅಗತ್ಯವಿರುತ್ತದೆ. ಈ ಚಿಕಿತ್ಸೆಯ ವೆಚ್ಚ ಭರಿಸುವುದು ಬಡ ರೋಗಿಗಳಿಗೆ ದುಬಾರಿಯಾಗಿದೆ. ಇದಕ್ಕೆ ಕುಸುಮ ರೋಗ ಎಂದೂ ಕರೆಯಲಾಗುತ್ತದೆ.

ಬಾಲ್ಯದಿಂದಲೂ ಅಂಟಿದ ನೋವು

ಬಾಲ್ಯದಿಂದಲೇ ಹಿಮೊಫಿಲಿಯಾ (ಫ್ಯಾಕ್ಟರ್-9) ರೋಗಿಯಾಗಿ ಅದರ ನೋವನ್ನು ಅನುಭವಿಸುತ್ತ ಬಂದರು. ಆಗ ಹೆಚ್ಚಿನ ವೈದ್ಯಕೀಯ ಸೌಲಭ್ಯಗಳೂ ಇರಲಿಲ್ಲ. ತಮ್ಮ ಸೋದರ ಮಾವ ರಕ್ತಸ್ರಾವಕ್ಕೆ ಒಳಗಾಗಿ ಸಕಾಲಕ್ಕೆ ಚಿಕಿತ್ಸೆ ದೊರೆಯದೇ ಮೃತಪಟ್ಟ ಘಟನೆ ಡಾ. ಸುರೇಶ್ ಹನಗವಾಡಿ ಅವರ ಬದುಕಿನ ಮಹತ್ವದ ತಿರುವಾಯಿತು. ಅವರು ತಮ್ಮ ಜೀವನವನ್ನು ಹಿಮೋಫಿಲಿಯಾ ರೋಗಿಗಳಿಗಾಗಿ ಮೀಸಲಿಡಲು ಈ ಘಟನೆ ಕಾರಣವಾಯಿತು.
ದಾವಣಗೆರೆ ಜಿಲ್ಲೆ ಹರಿಹರ ತಾಲೂಕು ಹನಗವಾಡಿ ಮೂಲದ ಡಾ. ಸುರೇಶ್, ಎಸ್‌ಎಸ್‌ಎಲ್‌ಸಿ ಮತ್ತು ಪಿಯುಸಿ ಶಿಕ್ಷಣವನ್ನು ಬಳ್ಳಾರಿಯಲ್ಲಿ, ದಾವಣಗೆರೆಯ ಜೆಜೆಎಂ ವೈದ್ಯಕೀಯ ಕಾಲೇಜಿನಲ್ಲಿ 1982ರಿಂದ 1988ರ ವರೆಗೆ ಎಂಬಿಬಿಎಸ್ ಪದವಿ, ಹುಬ್ಬಳ್ಳಿಯ ಕರ್ನಾಟಕ ಇನ್‌ಸ್ಟಿಟ್ಯೂಟ್ ಆಫ್ ಮೆಡಿಕಲ್ ಸೈನ್ಸಸ್‌ನಲ್ಲಿ 1990-1993ರ ವರೆಗೆ ಎಂಡಿ (ಪೆಥಾಲಜಿ) ಸ್ನಾತಕೋತ್ತರ ಪದವಿ ವ್ಯಾಸಂಗ ಮಾಡಿದರು. ಪ್ರಸ್ತುತ ದಾವಣಗೆರೆ ಜೆಜೆಎಂ ವೈದ್ಯಕೀಯ ಕಾಲೇಜಿನಲ್ಲಿ ಪೆಥಾಲಜಿ ವಿಭಾಗದಲ್ಲಿ ಪ್ರಾಧ್ಯಾಪಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.

ಚಿಕಿತ್ಸೆ, ಅರಿವು, ಆರೈಕೆ

1989-90ರಲ್ಲಿ ಕರ್ನಾಟಕ ಹಿಮೊಫಿಲಿಯಾ ಸೊಸೈಟಿಯನ್ನು ಸ್ಥಾಪಿಸಿದರು. ಆಗ ಹಿಮೊಫಿಲಿಯಾ ರೋಗಿಗಳಿಗೆ ಚಿಕಿತ್ಸಾ ಸೌಲಭ್ಯಗಳು ವಿರಳವಾಗಿದ್ದವು. ರಾಜ್ಯದ ಆರೋಗ್ಯ ಕ್ಷೇತ್ರದಲ್ಲಿ ಆಗ ಹಿಮೊಫಿಲಿಯಾ ಚಿಕಿತ್ಸೆ ಆದ್ಯತೆಯಾಗಿರಲಿಲ್ಲ. ಸಮಾಜದ ವಿವಿಧ ದಾನಿಗಳ ನೆರವಿನಿಂದ ಕೇಂದ್ರವನ್ನು ಬೆಳೆಸಿ ರೋಗಿಗಳಿಗೆ ಶಿಕ್ಷಣ, ಅರಿವು ಮತ್ತು ಸಮಗ್ರ ಆರೈಕೆಯಲ್ಲಿ ತೊಡಗಿದರು.
ಕರ್ನಾಟಕ ಹಿಮೊಫಿಲಿಯಾ ಕೇರ್ ಮತ್ತು ಹೆಮಟಾಲಜಿ ಸಂಶೋಧನಾ ಕೇಂದ್ರವನ್ನು ದಾವಣಗೆರೆಯಲ್ಲಿ ಸ್ಥಾಪಿಸಿ, ಹಿಮೊಫಿಲಿಯಾ ಮತ್ತು ಇತರ ವಿರಳ ರಕ್ತ ರೋಗಗಳಿಂದ ಬಳಲುತ್ತಿರುವವರಿಗೆ ರೋಗ ಪತ್ತೆ, ಚಿಕಿತ್ಸೆ ಮತ್ತು ಪುನರ್ವಸತಿಯನ್ನು ಒಂದೇ ಸೂರಿನಡಿ ಕಲ್ಪಿಸುತ್ತ ಬಂದಿದ್ದಾರೆ.
ಹಿಮೊಫಿಲಿಯಾ ಫೆಡರೇಶನ್‌ನ ರಾಷ್ಟ್ರೀಯ ಅಧ್ಯಕ್ಷರಾಗಿದ್ದ ಸಂದರ್ಭದಲ್ಲಿ ಹಿಮೊಫಿಲಿಯಾ ರೋಗಿಗಳ ಆರೈಕೆ ಮತ್ತು ಈ ರೋಗವನ್ನು ಅಂಗವಿಕಲರ ಕಾಯ್ದೆ ವ್ಯಾಪ್ತಿಗೆ ತರಲು ಕೇಂದ್ರ ಸರ್ಕಾರದ ಮಟ್ಟದಲ್ಲಿ ಪ್ರಯತ್ನ ಮಾಡಿದರು.
ಅಮೆರಿಕ, ಕೆನಡಾ, ಬ್ಯಾಂಕಾಕ್, ಥೈಲ್ಯಾಂಡ್, ಅರ್ಜೆಂಟೀನಾ, ಫ್ರಾನ್ಸ್, ಫಿಲಿಪೈನ್ಸ್, ಆಸ್ಟ್ರೇಲಿಯಾ, ದಕ್ಷಿಣ ಆಫ್ರಿಕಾ ಮತ್ತು ನೆದರ್‌ಲೆಂಡ್‌ನಲ್ಲಿ ನಡೆದ, ಹಿಮೊಫಿಲಿಯಾಗೆ ಸಂಬಂಧಿಸಿದ ಅಂತಾರಾಷ್ಟ್ರೀಯ ಸಮ್ಮೇಳನಗಳಲ್ಲಿ ಭಾರತವನ್ನು ಪ್ರತಿನಿಧಿಸಿದ್ದಾರೆ.
"

ಪದ್ಮಶ್ರೀ ಗೌರವ ನನಗೆ ಅನಿರೀಕ್ಷಿತ. ಈ ಕ್ಷೇತ್ರದಲ್ಲಿ 40 ವರ್ಷಗಳ ನನ್ನ ಸೇವೆಯನ್ನು ಗುರುತಿಸಿದ್ದಕ್ಕೆ ಸಂತೋಷವಾಗಿದೆ. ನನ್ನ ಈ ಪಯಣದಲ್ಲಿ ಬೆಂಬಲಕ್ಕೆ ನಿಂತ ಎಲ್ಲರಿಗೂ ಈ ಗೌರವ ಸಲ್ಲಬೇಕು. ನಮ್ಮ ಸಂಸ್ಥೆಗೆ ಬೆನ್ನೆಲುಬಾಗಿದ್ದ ಡಾ. ಎಸ್.ಪಿ. ಬಾಲಸುಬ್ರಹ್ಮಣ್ಯಂ ಅವರು ಬಹಳ ನೆನಪಾಗುತ್ತಿದ್ದಾರೆ. ಮುಂದಿನ ದಿನಗಳಲ್ಲಿ ರಾಜ್ಯಾದ್ಯಂತ ಸಂಚಾರ ಮಾಡಿ, ಹಿಮೊಫಿಲಿಯಾ ರೋಗಿಗಳಿಗೆ ಇನ್ನಷ್ಟು ಸೌಲಭ್ಯ, ವೈದ್ಯಕೀಯ ಸಮುದಾಯಕ್ಕೆ ಈ ರೋಗದ ಚಿಕಿತ್ಸೆಯ ತರಬೇತಿ ನೀಡುವ ಉದ್ದೇಶವಿದೆ.

ಗೌರವ
Honour
ಪದ್ಮಶ್ರೀ
Padmashri
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net