ದಾವಣಗೆರೆ

ಮಹಿಳಾ ಆಸ್ಪತ್ರೆಗೆ ಎಎಲ್‌ಎಸ್ ಆಂಬುಲೆನ್ಸ್ ಬಲ

ದಾವಣಗೆರೆಯ ಮಹಿಳಾ ಮತ್ತು ಮಕ್ಕಳ ಸರ್ಕಾರಿ ಆಸ್ಪತ್ರೆಗೆ ಬಂದಿಳಿದ ಎಎಲ್‌ಎಸ್ ಆಂಬುಲೆನ್ಸ್.
ದಾವಣಗೆರೆಯ ಮಹಿಳಾ ಮತ್ತು ಮಕ್ಕಳ ಸರ್ಕಾರಿ ಆಸ್ಪತ್ರೆಗೆ ಬಂದಿಳಿದ ಎಎಲ್‌ಎಸ್ ಆಂಬುಲೆನ್ಸ್.
ಡಿ. ಎಂ. ಮಹೇಶ್
Published on: 

ಪ್ರಮುಖ ಮುಖ್ಯಾಂಶಗಳು

  • ಕ್ಲಿಷ್ಟ ಚಿಕಿತ್ಸೆಗಾಗಿ ರೋಗಿಗಳ ಸ್ಥಳಾಂತರಕ್ಕೆ ನೆರವು
  • ತಾಯಿ-ಶಿಶು ಮರಣ ಇಳಿಕೆಗೆ ವರದಾನ
  • ರಾಮಲಿಂಗಂ ಕನ್ಸ್‌ಟ್ರಕ್ಷನ್‌ನಿಂದ ಸಿಎಸ್‌ಆರ್ ದೇಣಿಗೆ
ದಾವಣಗೆರೆ: ಪ್ರತಿಮಾಹೆ ದಾಖಲೆಯ ಹೆರಿಗೆ (600ರಿಂದ 640)ಗೆ ಹೆಸರಾಗಿರುವುದು ಇಲ್ಲಿನ ಮಹಿಳೆಯರ ಮತ್ತು ಮಕ್ಕಳ ಸರ್ಕಾರಿ ಆಸ್ಪತ್ರೆ. ಇಲ್ಲಿನ ರೋಗಿಗಳಿಗೆ ತುರ್ತು ಸಂದರ್ಭದಲ್ಲಿ ಅವಶ್ಯಕವಿದ್ದ ಎಎಲ್‌ಎಸ್ (ಅಡ್ವಾನ್ಸಡ್ ಲೈಫ್ ಸಪೋರ್ಟ್) ಆಂಬುಲೆನ್ಸ್ ಕಳೆದೊಂದು ವಾರದಿಂದ ಸದ್ದು ಮಾಡಿದೆ.
ಇಲ್ಲಿ ದಾಖಲಾಗುವ ಗರ್ಭಿಣಿಯರು ಮತ್ತು ನವಜಾತ ಶಿಶುಗಳ ಉಸಿರಾಟ, ಹೃದಯ ಸ್ತಂಭನ ಇನ್ನಿತರೆ ಕ್ಲಿಷ್ಟಕರ ಸಂದರ್ಭದಲ್ಲಿ ಚಿಕಿತ್ಸೆಗಾಗಿ ಬೇರೊಂದು ಉನ್ನತ ಆರೋಗ್ಯ ಕೇಂದ್ರಕ್ಕೆ ಸ್ಥಳಾಂತರಿಸಲು ಹಾಗೂ ರೋಗಿಗೆ ವೆಂಟಿಲೇಟರ್ ಸಹಿತ ಸುರಕ್ಷತೆ ಒದಗಿಸುವಲ್ಲಿ ಈ ಆಂಬುಲೆನ್ಸ್ ಒದಗಿದ್ದು ಆಸ್ಪತ್ರೆಗೇ ಆನೆಬಲ ಬಂದಂತಾಗಿದೆ.
ತಾಯಂದಿರಿಗೆ 6 ಹಾಸಿಗೆಗಳ ಹೈ ಡಿಪೆಂಡೆನ್ಸಿ ಯುನಿಟ್ ಹೊಂದಿರುವ 150 ಹಾಸಿಗೆಗಳು ಹಾಗೂ 2 ವೆಂಟಿಲೇಟರ್, 9ಸಿಪಿಎಪಿ ಮತ್ತು 30 ರೇಡಿಯಂಟ್ ವಾರ್ಮರ್ ಲಭ್ಯವಿರುವ 30 ಹಾಸಿಗೆ ಸಾಮರ್ಥ್ಯದ ನವಜಾತ ಶಿಶುಗಳ ಆರೈಕೆ ಘಟಕ ಹೊಂದಿರುವ ಮಧ್ಯಕರ್ನಾಟಕದ ಈ ಆಸ್ಪತ್ರೆಗೆ ಅತ್ಯಾಧುನಿಕ ವೈದ್ಯಕೀಯ ಉಪಕರಣಗಳುಳ್ಳ ಆಂಬುಲೆನ್ಸ್ ಬೇಡಿಕೆ ಬಹುವರ್ಷದ್ದಾಗಿತ್ತು.
ಎಎಲ್‌ಎಸ್ ಆಂಬುಲೆನ್ಸ್ ಶುಭಾರಂಭದೊಂದಿಗೆ ಆಸ್ಪತ್ರೆ ಚಿಕಿತ್ಸೆಯೂ ಚೇತರಿಸಿಕೊಂಡಿದೆ. ದಿನಕ್ಕೆ 5ರಿಂದ 8 ಮಂದಿ ರೋಗಿಗಳಿಗೆ ಇದು ವರದಾನವಾಗುತ್ತಿದೆ. ಹಳೆಯದಾದ ಈ ಆಸ್ಪತ್ರೆಯಲ್ಲಿ ಇದುವರೆಗೆ ಫಿಜಿಷಿಯನ್ ಹುದ್ದೆ ಮಂಜೂರಾತಿ ಕನಸಾಗಿದೆ. ಹಗಲು ವೇಳೆಯಲ್ಲಿ ಜೆಜೆಎಂ ವೈದ್ಯಕೀಯ ಕಾಲೇಜಿನಿಂದ ವೈದ್ಯರೊಬ್ಬರನ್ನು ತಾತ್ಕಾಲಿಕವಾಗಿ ನಿಯೋಜನೆ ಮಾಡಲಾಗಿದೆ.
ಆದರೆ, ರಾತ್ರಿ ವೇಳೆ ಫಿಜಿಷಿಯನ್, ತುರ್ತು ಚಿಕಿತ್ಸೆಗಾಗಿ ಸಲಹೆ ಪಡೆಯಲು, ಸ್ಕಾೃನಿಂಗ್‌ಗೆ ಚಿಗಟೇರಿ, ಎಸ್ಸೆಸ್ ಹಾಗೂ ಬಾಪೂಜಿ ಆಸ್ಪತ್ರೆಗೆ ಕರೆದೊಯ್ಯಲು ಹಾಗೂ ಎಬಿಎಆರ್‌ಕೆ ಅಡಿಯಲ್ಲಿ ಶಿಫಾರಸು ಹೊಂದಿದ ಆಸ್ಪತ್ರೆಗಳಿಗೆ ಕಳಿಸಿಕೊಡಲು ಹಾಗೂ ಹೆರಿಗೆ ಸಂದರ್ಭದಲ್ಲಿನ ಕ್ಲಿಷ್ಟಕರ ಸಂದರ್ಭದಲ್ಲಿಯೂ ಸ್ಥಳಾಂತರಿಸಲು ಈ ವಾಹನ ನೆರವಾಗಿದೆ. ವೈದ್ಯರು ಹೇಳುವಂತೆ ಇದರಿಂದ ತಾಯಿ-ಶಿಶುವಿನ ಮರಣ ಪ್ರಮಾಣ ತಗ್ಗಿಸಲು ಇದು ಅನುಕೂಲಕಾರಿ.

ಎಫ್ಸಿ ಮುಗಿದ ವಾಹನಕ್ಕೆ ಮುಕ್ತಿ

ಇದುವರೆಗೆ ರೋಗಿಗಳನ್ನು ಸ್ಥಳಾಂತರಿಸಲಷ್ಟೇ ಸೀಮಿತವಿದ್ದ ಆಂಬುಲೆನ್ಸ್ ಒಂದು 17 ವರ್ಷ ಸೇವೆ ಸಲ್ಲಿಸಿದೆ. ಆರ್‌ಟಿಒ ಇಲಾಖೆ ಹೊಸ ನಿಯಮದಂತೆ 15 ವರ್ಷಕ್ಕೆ ಮಾತ್ರವೇ ಎಫ್‌ಸಿ ಇತ್ತು. ರೋಗಿಗಳ ಸೇವೆ ಉದ್ದೇಶದಿಂದಾಗಿ ಎಫ್‌ಸಿ ವಿಸ್ತರಿಸಿ ತಾತ್ಕಾಲಿಕ ಅನುಮತಿ ಪಡೆಯಲಾಗಿತ್ತು. ಸೆಪ್ಟೆಂಬರ್ ವೇಳೆಗೆ ಈ ವಾಹನ ನಿವೃತ್ತಿ ಕಾಣಲಿದೆ.
ಜಿಪಂ ಸಿಇಒ ವಿಶೇಷಾಸಕ್ತಿ
ಇತ್ತೀಚೆಗಷ್ಟೇ ಆಸ್ಪತ್ರೆ ವೀಕ್ಷಿಸಿದ್ದ ಜಿಪಂ ಸಿಇಒ ಗಿತ್ತೆ ಮಾಧವ ವಿಠ್ಠಲರಾವ್ ಅವರು ಆಂಬುಲೆನ್ಸ್ ಅಗತ್ಯತೆ ಬಗ್ಗೆ ಗಮನಿಸಿ, ಒದಗಿಸಿಕೊಡುವ ಬಗ್ಗೆಯೂ ಭರವಸೆ ನೀಡಿದ್ದರು. ಅದರಂತೆ ಸಿಎಸ್‌ಆರ್ ನಿಧಿಯಡಿ ಈರೋಡ್‌ನ ರಾಮಲಿಂಗಂ ಕನ್ಸ್‌ಟ್ರಕ್ಷನ್ ಕಂಪನಿಯಿಂದ 35 ಲಕ್ಷ ರೂ. ವೆಚ್ಚದ ಈ ಆಂಬುಲೆನ್ಸ್ ದೇಣಿಗೆ ರೂಪವಾಗಿ ಆಸ್ಪತ್ರೆಗೆ ಒಲಿದಿದೆ.
ಇತ್ತೀಚೆಗೆ ಬಾಲಭವನದಲ್ಲಿ ಈ ವಾಹನಕ್ಕೆ ಸಂಸದೆ ಡಾ. ಪ್ರಭಾ ಮಲ್ಲಿಕಾರ್ಜುನ್ ಚಾಲನೆ ನೀಡಿದ್ದರು. 7.73 ಲಕ್ಷ ರೂ. ಮೊತ್ತದ ವೈದ್ಯಕೀಯ ಉಪಕರಣಗಳು, ಒಬ್ಬ ವೈದ್ಯ ಹಾಗೂ ಒಬ್ಬ ಸ್ಟಾಪ್ ನರ್ಸ್, ಒಬ್ಬ ಚಾಲಕ ಒಳಗೊಂಡ ಇಂಥಹ ಆಂಬುಲೆನ್ಸ್‌ಗಳು ಜಿಲ್ಲೆಯಲ್ಲಿ ಹಾಲಿ ನಾಲ್ಕು ಈಗಾಗಲೆ ಕಾರ್ಯನಿರತವಾಗಿವೆ. ಮಹಿಳಾ ಆಸ್ಪತ್ರೆಯಲ್ಲಿ ಇರುವುದು ಐದನೆಯದಾಗಿದೆ.
ವಿಶೇಷ ಉಪಕರಣಗಳು
ಬೈಫಾಸಿಕ್ ಡಿಫಿಬ್ರಿಲೇಟರ್, ಜಂಬೋ ಆಕ್ಸಿಜನ್ ಸಿಲಿಂಡರ್, ಎಮರ್ಜೆನ್ಸಿ ಬ್ಯಾಗ್, ಪ್ರಥಮ ಚಿಕಿತ್ಸೆಯ ಕಿಟ್, ಸ್ಟೆಥಾಸ್ಕೋಪ್, ಮೈಕ್ರೋಟೋನ್, ಸಾಗಣೆಯ ವೆಂಟಿಲೇಟರ್, ಮಲ್ಟಿಪ್ಯಾರಾ ಮಾನಿಟರ್, ಸಿಪಿಎಪಿ ಯಂತ್ರ, ಸಿರಂಜ್ ಪಂಪ್, ಇಸಿಜಿ ಯಂತ್ರ ಮೊದಲಾದ 15 ಮಾದರಿಯ ಅತ್ಯಾಧುನಿಕ ವೈದ್ಯಕೀಯ ಸಲಕರಣೆಗಳು ವಾಹನದಲ್ಲಿವೆ.

ಮಹಿಳಾ ಸರ್ಕಾರಿ ಆಸ್ಪತ್ರೆಗೆ ಅತ್ಯಾಧುನಿಕ ಉಪಕರಣಗಳ ಜೀವರಕ್ಷಕ ಆಂಬುಲೆನ್ಸ್‌ನ ಬೇಡಿಕೆ ಅನೇಕ ವರ್ಷಗಳದ್ದಾಗಿತ್ತು. ಇದೀಗ ನೆರವೇರಿದೆ. ಆಸ್ಪತ್ರೆಗೆ ಬರುವ ಬಡ ರೋಗಿಗಳ ತುರ್ತು ಸಂದರ್ಭದಲ್ಲಿ ಉಚಿತ ಸೇವೆ ಜತೆಗೆ ಸುರಕ್ಷತೆ ಒದಗಿಸಲಿದೆ. ತಾಯಿ-ಶಿಶು ಮರಣ ಪ್ರಮಾಣ ತಗ್ಗಿಸಲು ಇದು ಸಹಕಾರಿ ಆಗಲಿದೆ.

— ಡಾ. ಎಚ್.ಸಿ. ಸುದೀಪ್‌ಕುಮಾರ್, ಮಹಿಳಾ ಮತ್ತು ಮಕ್ಕಳ ಸರ್ಕಾರಿ ಆಸ್ಪತ್ರೆ ಪ್ರಭಾರ ಅಧೀಕ್ಷಕ.
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net