ದಾವಣಗೆರೆ

ಶಾಲೆ ತೊರೆದ ಮಕ್ಕಳ ಮನೆಗಳತ್ತ ಹೆಜ್ಜೆ

ಚಿಂದಿ ಆಯುವ ಮಕ್ಕಳ ಸಾಂಕೇತಿಕ ಚಿತ್ರ.
ಚಿಂದಿ ಆಯುವ ಮಕ್ಕಳ ಸಾಂಕೇತಿಕ ಚಿತ್ರ.
ಡಿ. ಎಂ. ಮಹೇಶ್
Published on: 

ಪ್ರಮುಖ ಮುಖ್ಯಾಂಶಗಳು

  • ಶುರುವಾಯ್ತು ಶಿಕ್ಷಣ ಇಲಾಖೆ ವಿಶೇಷಾಭಿಯಾನ
  • 443 ವಿದ್ಯಾರ್ಥಿಗಳನ್ನು ಮರಳಿ ಕರೆತರಲು ಕಂಕಣ
  • ಹೆಚ್ಚಿದ ಬಾಲಕಾರ್ಮಿಕತೆಗೆಂದು ಕಡಿವಾಣ?
ದಾವಣಗೆರೆ: ಶಾಲೆ ಬಿಟ್ಟ ಮಕ್ಕಳನ್ನು ಮರಳಿ ಮುಖ್ಯವಾಹಿನಿಗೆ ಕರೆತರಲು ಶಿಕ್ಷಣ ಇಲಾಖೆ ವರ್ಷಂಪ್ರತಿ ಭಗೀರಥ ಪ್ರಯತ್ನ ನಡೆಸುತ್ತದೆ. ಜೂ. 10ರಿಂದ 22ರವರೆಗೆ ಜಿಲ್ಲಾದ್ಯಂತ ವಿಶೇಷ ಅಭಿಯಾನ ಆರಂಭವಾಗಿದ್ದು ಈ ಬಾರಿಯ ಟಾರ್ಗೆಟ್ 443 ಮಕ್ಕಳು!
ಕಳೆದ ನವೆಂಬರ್‌ನಲ್ಲಿ ನಡೆಸಿದ ಸಮೀಕ್ಷೆಯಲ್ಲಿ ಜಿಲ್ಲೆಯಲ್ಲಿ 6-18 ವರ್ಷದೊಳಗಿನ ಒಟ್ಟು 1047 ಮಕ್ಕಳು ಶಿಕ್ಷಣದಿಂದ ದೂರವಿದ್ದಾರೆ. ಇದರಲ್ಲಿ 674 ಬಾಲಕರು, 373 ಬಾಲಕಿಯರಿದ್ದಾರೆ. ಈ ಪೈಕಿ 433 ವಿದ್ಯಾರ್ಥಿಗಳು 15ರಿಂದ 18 ವರ್ಷದೊಳಗಿನವರು.
ಶಿಕ್ಷಣ ಹಕ್ಕು ಕಾಯ್ದೆಯನ್ವಯ 6-14 ವರ್ಷ ವಯೋಮಿತಿಯವರಿಗೆ ಉಚಿತ ಮತ್ತು ಕಡ್ಡಾಯ ಶಿಕ್ಷಣ ನೀಡುವುದು ಮೂಲಭೂತ ಹಕ್ಕಾಗಿದೆ. ಇಂತಹ 614 ಮಕ್ಕಳನ್ನು ಸರ್ವೇಯಲ್ಲಿ ಗುರುತಿಸಲಾಗಿತ್ತು. ಇದರಲ್ಲಿ 397 ಬಾಲಕರು, 217 ಬಾಲಕಿಯರಿದ್ದರು. ಮೊದಲ ಹಂತದಲ್ಲಿ 171 ಮಕ್ಕಳು ಮುಖ್ಯವಾಹಿನಿ ತಲುಪಿದ್ದಾರೆ.
ಶಾಲೆಯಿಂದ ಹೊರಗುಳಿದ ಮಕ್ಕಳ ಪ್ರಸ್ತುತ ಸ್ಥಿತಿ ದೃಢೀಕರಿಸಿ, ಅವರನ್ನು ಶಿಕ್ಷಣದ ವ್ಯಾಪ್ತಿಗೆ ತರುವ ಉದ್ದೇಶದಡಿ ವಿಶೇಷ ಮನೆ ಭೇಟಿ ಹಾಗೂ ಸಮೀಕ್ಷಾ ಅಭಿಯಾನ ನಡೆಯುತ್ತಿದೆ. ಬಿಇಒ ಮಾರ್ಗದರ್ಶನದಲ್ಲಿ ಬಿಆರ್‌ಸಿ, ಸಿಆರ್‌ಪಿ, ಮುಖ್ಯ ಶಿಕ್ಷಕರು, ಶಿಕ್ಷಕರು, ಇಸಿಒ, ಹಾಜರಾತಿ ಪ್ರಾಧಿಕಾರಿಗಳು, ಎಸ್‌ಡಿಎಂಸಿ ಸದಸ್ಯರು ಗುರುತಿಸಲ್ಪಟ್ಟ ಮಕ್ಕಳ ಮನೆಗಳಿಗೆ ಭೇಟಿ ನೀಡಿ ಸಮಾಲೋಚನೆ ನಡೆಸುವರು.
ಶಿಕ್ಷಣದಿಂದ ವಂಚಿತರಾಗಿದ್ದಕ್ಕೆ ವಾಸ್ತವಾಂಶ ಸಂಗ್ರಹಿಸಿ ಮರು ದಾಖಲಾತಿ ಮಾಡಲಿದ್ದಾರೆ. ಆರ್‌ಟಿಇ ನಿಯಮ 6ಬಿ (2) ಅಡಿಯಲ್ಲಿ ಮಕ್ಕಳ ಕಡ್ಡಾಯ ಹಾಜರಾತಿ ಸ್ವೀಕೃತಿಗೆ ಪಾಲಕರ ಸಹಿ ಪಡೆಯುವರು. ಅಭಿಯಾನದ ಬಳಿಕ ಕ್ರಿಯಾಯೋಜನೆ ರೂಪಿಸಿ, ಜಿಪಂ ಸಿಇಒ ಅವರೊಂದಿಗೆ ಮತ್ತೊಂದು ಸುತ್ತಿನ ಸಭೆ ನಡೆಸಿ ಕಾರ್ಯತಂತ್ರ ರೂಪಿಸುವುದು ಇಲಾಖೆಯ ಉದ್ದೇಶವಾಗಿದೆ.

ಕಾರಣಗಳು ಹಲವು

ಇಲಾಖೆಯ ಪ್ರಯತ್ನ ಬಳಿಕವೂ ಬಹುತೇಕ ಮಕ್ಕಳು ಶಾಲೆ ಮೆಟ್ಟಲೇರಿಲ್ಲ. ಇದಕ್ಕೆ ಕೆಲವು ದತ್ತಾಂಶಗಳನ್ನು ಇಲಾಖೆ ಅಧಿಕಾರಿಗಳು, ಶಿಕ್ಷಕರು ದಾಖಲಿಸಿದ್ದಾರೆ. ಸಮೀಕ್ಷೆಗೂ ಮೀರಿ ಡ್ರಾಪೌಟ್ ಮಕ್ಕಳ ಸಂಖ್ಯೆ ಹೆಚ್ಚಿರುವ ಸಾಧ್ಯತೆ ಇದೆ.
ಸರ್ವೇಯಲ್ಲಿಯೂ ಹೆಚ್ಚಿನ ಮಕ್ಕಳು ಕಂಡುಬರುತ್ತಿರುವುದು ಶೈಕ್ಷಣಿಕ ಸಮಸ್ಯೆಯಾಗಿ ಉಳಿದಿಲ್ಲ. ಸರ್ವೇಯಲ್ಲಿ ಗುರುತಿಸಲ್ಪಟ್ಟವರಲ್ಲಿ ಪರಿಶಿಷ್ಟ ಜಾತಿಯವರೇ ಅತಿ ಹೆಚ್ಚು! ಹಿಂದುಳಿದ ವರ್ಗ, ಮುಸ್ಲಿಮರು, ಪರಿಶಿಷ್ಟ ಪಂಗಡದ ಮಕ್ಕಳು ನಂತರದ ಸ್ಥಾನಗಳಲ್ಲಿದ್ದಾರೆ.
ಆರ್ಥಿಕ ಕಾರಣಕ್ಕೆ ಪಾಲಕರು ಮಕ್ಕಳನ್ನು ಶಾಲೆ ಬದಲಾಗಿ ಕೂಲಿ ಕೆಲಸ, ಮನೆಗೆಲಸಕ್ಕೆ ಸೀಮಿತಗೊಳಿಸಿರುವುದು ಜಿಲ್ಲೆಯಲ್ಲಿ ಚಾಲ್ತಿಯಲ್ಲಿದೆ. ಒಂಟಿ ಪಾಲಕರು ಹಾಗೂ ಕೌಟುಂಬಿಕ ಸಮಸ್ಯೆಗಳೂ ಇಲ್ಲದಿಲ್ಲ. ಮಕ್ಕಳಲ್ಲಿ ಕಲಿಕೆಯ ನಿರಾಸಕ್ತಿ, ಕೆಲವರಲ್ಲಿನ ಮೊಬೈಲ್ ಗೀಳು, ಹೆಚ್ಚಿದ ಬಾಲಕಾರ್ಮಿಕತೆ ಕೂಡ ಇತರೆ ಕಾರಣಗಳಾಗಿವೆ. 8, 9ನೇ ತರಗತಿಯ ಮಕ್ಕಳೇ ಹೆಚ್ಚು ಡ್ರಾಪೌಟ್ ಸಮೂಹಸನ್ನಿಗೆ ಒಳಗಾಗಿದ್ದಾರೆ ಎನ್ನುತ್ತವೆ ಮೂಲಗಳು.
ಸಮುದಾಯದತ್ತ ಶಾಲೆ ಕಾರ್ಯಕ್ರಮದ ಮೂಲಕ ಶಿಕ್ಷಕರು ಗುರುತಿಸಿದ ಕೆಲ ಮಕ್ಕಳನ್ನು ಮಕ್ಕಳ ಕಲ್ಯಾಣ ಸಮಿತಿಗೆ ಶಿಫಾರಸು ಮಾಡಿದರೆ ಕೆಲವು ಪಾಲಕರು ಅಲ್ಲಿಗೆ ಸೇರಿಸಲು ನಖರಾ ಮಾಡಿದ್ದಾರೆ. ಮುಖ್ಯವಾಹಿನಿ ಬಳಿಕವೂ ಕೆಲ ಮಕ್ಕಳು ನಿರಾಸಕ್ತಿ ತೋರಿದ್ದಾರೆ. ಜಿಲ್ಲೆಯಲ್ಲಿ ದಶಕದ ಹಿಂದಿದ್ದ ಬಾಲಕಾರ್ಮಿಕ ಶಾಲೆಗಳು ಕಣ್ಮರೆಯಾಗಿರುವುದು ಕೂಡ ಮಕ್ಕಳನ್ನು ಶಿಕ್ಷಣ ವಂಚಿತರನ್ನಾಗಿಸಿವೆ.

ಕೆಒಎಸ್, ಎನ್‌ಐಒಎಸ್ ಅವಕಾಶ

ವಿಶೇಷ ಅಭಿಯಾನದಡಿ ಗುರುತಿಸಲ್ಪಡುವ, ಶಾಲೆ ಬಿಟ್ಟ 15ರಿಂದ 19 ವರ್ಷದೊಳಗಿನ ಮಕ್ಕಳ ಶೈಕ್ಷಣಿಕ ಹಿನ್ನೆಲೆ, ವಯೋಮಾನ ಆಧರಿಸಿ ಕರ್ನಾಟಕ ಮುಕ್ತ ಶಾಲೆ (ಕೆಒಎಸ್)ಅಥವಾ ರಾಷ್ಟ್ರೀಯ ಮುಕ್ತ ಶಿಕ್ಷಣ ಸಂಸ್ಥೆ (ಎನ್‌ಐಒಎಸ್) ಮೂಲಕ ಶಿಕ್ಷಣ ಮುಂದುವರಿಸಲು ಅರ್ಹತೆ ಪರಿಶೀಲಿಸಿ ಸೂಕ್ತ ಶಿಫಾರಸು ಮಾಡಲಾಗುವುದು. ವಿಶೇಷವಾಗಿ ಈ ಮಕ್ಕಳಿಗೆ ಮೊದಲ ಬಾರಿಗೆ ಕೆಲವು ತಿಂಗಳ ಕೋಚಿಂಗ್ ನೀಡುವ ಆಲೋಚನೆ ನಡೆದಿದೆ ಎನ್ನುತ್ತಾರೆ ಇಲಾಖೆಯ ಡಿವೈಪಿಸಿ ಪೂರ್ಣಿಮಾ.
ರಾಷ್ಟ್ರೀಯ ಕೌಶಲ ಗುಣಮಟ್ಟ ಶಿಕ್ಷಣ ಕಲ್ಪಿಸುವ ಉದ್ದೇಶದ ಜಿಲ್ಲೆಯ 19 ಶಾಲೆಗಳಲ್ಲಿ ವೃತ್ತಿಯಾಧಾರಿತ ಶಿಕ್ಷಣ ನೀಡಲಾಗುತ್ತಿದೆ. ಸಾಮಾನ್ಯ ಶಿಕ್ಷಣದಲ್ಲಿ ಅತಿ ಹಿಂದುಳಿದ ಮಕ್ಕಳಿಗೆ ಆಟೋಮೊಬೈಲ್, ಬ್ಯೂಟಿ ಆ್ಯಂಡ್ ವೆಲ್‌ನೆಸ್, ಮಾಹಿತಿ ತಂತ್ರಜ್ಞಾನ, ಅಪರೆಲ್ಸ್ ಸೇರಿ 6 ಘಟಕದ ಕೌಶಲ ನೀಡುವ ಅವಕಾಶಗಳಿವೆ. ಇವು ಹೆಚ್ಚಿನ ಶಾಲೆಗಳಲ್ಲಿ ವಿಸ್ತರಣೆಯಾದಲ್ಲಿ ಶಾಲೆ ಬಿಡುವ ಮಕ್ಕಳ ಸಂಖ್ಯೆ ತಗ್ಗಿಸಲು ಸಹಕಾರಿಯಾಗಬಹುದು. ಅಲ್ಲದೆ ಸ್ವಯಂಸೇವಾ ಸಂಸ್ಥೆಗಳ ಸಹಕಾರ ಪಡೆಯಬೇಕಿದೆ ಎನ್ನಲಾಗಿದೆ.

3 ವರ್ಷದಲ್ಲಿ ಶಾಲಾಂತರ..

2023-24ರಲ್ಲಿ ಶಾಲೆ ತೊರೆದಿದ್ದ 218 ಮಕ್ಕಳನ್ನು ಗುರುತಿಸಿ, 171 ಮುಖ್ಯವಾಹಿನಿಗೆ ಬಂದಿದ್ದರು. 2024-25ರಲ್ಲಿ ಗುರುತಿಸಲ್ಪಟ್ಟ 164 ಮಕ್ಕಳಲ್ಲಿ 124 ಮುಖ್ಯವಾಹಿನಿಗೆ ತಲುಪಿದ್ದರು. 2025-26ನೇ ಸಾಲಿನಲ್ಲಿ 116 ಬಾಲಕರು, 55 ಬಾಲಕಿಯರು ಸೇರಿ 171 ಮಕ್ಕಳು ಶಾಲೆಯ ಕದ ತಟ್ಟಿದ್ದಾರೆ. ಇನ್ನು 280 ಬಾಲಕರು, 163 ಬಾಲಕಿಯರನ್ನು ಶಾಲೆಯ ಸಂಪರ್ಕ ಮಾಡಿಸುವ ಇರಾದೆ ಇದೆ.

ಶಾಲೆ ಬಿಟ್ಟ ಮಕ್ಕಳನ್ನು ಮರಳಿ ಕರೆತರುವುದು ನಮ್ಮ ಜವಾಬ್ದಾರಿ. ಜಿಲ್ಲೆಯಲ್ಲಿ 443 ಮಕ್ಕಳನ್ನು ವಿಶೇಷ ಅಭಿಯಾನದಡಿ ಶಿಕ್ಷಣ ಕಲ್ಪಿಸಲು ಪ್ರಯತ್ನ ನಡೆಸಲಾಗಿದೆ. ಶಿಕ್ಷಣ ಹಕ್ಕು ಕಾಯ್ದೆಯಡಿ ಮಕ್ಕಳನ್ನು ಶಾಲೆಗೆ ಸೇರಿಸುವ ವಿಚಾರದಲ್ಲಿ ಪಾಲಕರು, ಸಮುದಾಯ ಕೂಡ ಕೈಜೋಡಿಸಬೇಕು.

— ಕೃಷ್ಣಪ್ರಸಾದ್, ಡಿಡಿಪಿಐ.
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net