ಶಾಲಾರಂಭದ ಮುನ್ನ ದುರಸ್ತಿಯ ಮಳೆಬಿಲ್ಲು!

ಮೇ 30ರಿಂದ ಶಾಲೆಗಳು ಶುರುವಾಗಲಿದ್ದು, ಶಾಲಾಶಿಕ್ಷಣ ಇಲಾಖೆಯ ಉಪನಿರ್ದೇಶಕರ ಕಚೇರಿಯಿಂದ ಕೆಲವೆಡೆ ದುರಸ್ತಿ ಕಾರ್ಯ ಕೈಗೊಳ್ಳಲಾಗಿದೆ. ಹೀಗಾಗಿ ಅಲ್ಲಲ್ಲಿ ಪಾಠ ಕೇಳುವ ಮಕ್ಕಳು, ಶಿಕ್ಷಕರು ಮುಂಗಾರು ಪ್ರವೇಶದ ಹೊತ್ತಿಗೆ ಒಂದಷ್ಟು ಫಜೀತಿಗೆ ಒಳಗಾಗುವ ಸಂದರ್ಭವೂ ಎದುರಾಗಿದೆ.

2025-26ರ ಮಾರ್ಚ್ ಅಂತ್ಯಕ್ಕೆ ಶಾಲಾ ಕೊಠಡಿಗಳ ದುರಸ್ತಿ ಕಾಮಗಾರಿ ಪೂರ್ಣಗೊಳ್ಳಬೇಕಿತ್ತು. ಆದರೆ ಅನುದಾನ ಮಂಜೂರಾಗಿ, ಬಿಡುಗಡೆಯಾಗಿದ್ದು 2026ರಲ್ಲಿ! ಹೀಗಾಗಿ ಮಾರ್ಚ್‌ನಲ್ಲಿಯೇ ದುರಸ್ತಿಗೆ ಚಾಲನೆ ಸಿಗಬೇಕಿತ್ತು.

ಆದರೆ, ದಾವಣಗೆರೆ ದಕ್ಷಿಣ ಕ್ಷೇತ್ರದ ಉಪಚುನಾವಣೆ ನೀತಿ ಸಂಹಿತೆ ಕಾರಣಕ್ಕೆ ಕಾಮಗಾರಿಯ ಟೆಂಡರ್ ಕೂಡ ತಡವಾಯಿತು ಎನ್ನಲಾಗಿದೆ. ದುರಸ್ತಿ ಕಾಮಗಾರಿ ಅನುಷ್ಠಾನದ ಏಜೆನ್ಸಿಯಾದ ಜಿಲ್ಲಾ ಪಂಚಾಯಿತಿ ಇಂಜಿನಿಯರಿಂಗ್ ವಿಭಾಗವು ಕಾರ್ಯಾದೇಶ ಪಡೆದ ನಂತರ ರಿಪೇರಿ ಯುದ್ಧಕ್ಕೆ ಸಜ್ಜಾಗಿದೆ!

ಜಿಲ್ಲೆಯ 117 ಸರ್ಕಾರಿ ಪ್ರಾಥಮಿಕ ಹಾಗೂ ಪ್ರೌಢಶಾಲೆಗಳ 263 ಕೊಠಡಿಗಳು ದುರಸ್ತಿಗೆ ಕಾದಿವೆ. ಈ ಪೈಕಿ 86 ಕೋಣೆಗಳಲ್ಲಿ ಸಣ್ಣಪುಟ್ಟ ಹಾಗೂ 177ರಲ್ಲಿ ದೊಡ್ಡ ಪ್ರಮಾಣದ ರಿಪೇರಿ ಕೆಲಸಗಳಿವೆ. ಸೋರುವ ತಾರಸಿಗೆ ಚುರುಕಿ ಹಾಕುವುದು, ಗೋಡೆ ಬಿರುಕು,ಹೆಂಚು ಅಳವಡಿಕೆ, ನೆಲದ ಹಾಸು ಸರಿಪಡಿಸುವ ಕೆಲಸಗಳು ಆಗಬೇಕಿವೆ.

2023-24ರಲ್ಲಿ 957 ಶಾಲಾ ಕೊಠಡಿಗಳ ದುರಸ್ತಿಗೆ ನಿರೀಕ್ಷಿಸಲಾಗಿತ್ತು. 2024ರಲ್ಲಿ ಮಳೆಯಿಂದ ಹಾನಿಗೀಡಾಗಿದ್ದ ಕೊಠಡಿಗಳೂ ಸೇರಿ 518 ಕೋಣೆ ದುರಸ್ತಿಯಾಗಿದ್ದವು. ಅಲ್ಲಿಂದೀಚೆಗೆ ಸರ್ಕಾರದ ಗ್ಯಾರಂಟಿ ಯೋಜನೆಗಳಿಂದಾಗಿ ಹಣ ಬಿಡುಗಡೆಗೆ ಸಮಸ್ಯೆಯಾಗಿತ್ತೆ ಎಂಬುದು ಸ್ಪಷ್ಟವಾಗಿಲ್ಲ. ಆದರೆ ಹಂತ-ಹಂತವಾಗಿ ಸರ್ಕಾರದ ಅನುದಾನ ಬಂದಂತೆ ಕಾಮಗಾರಿ ವೇಗವಾಗಲಿದೆ ಎಂಬುದು ಮೂಲಗಳ ಮಾತು.

ಇದಲ್ಲದೆ 2025-16ನೇ ಸಾಲಿನಲ್ಲಿ 42 ಶಾಲೆಗಳಲ್ಲಿ ಒಟ್ಟು 76 ಹೆಚ್ಚುವರಿ ಶಾಲಾ ಕೊಠಡಿಗಳ ನಿರ್ಮಾಣಕ್ಕೆ 12.98 ಕೋಟಿ ರೂ. ಅನುದಾನ ಮಂಜೂರಾಗಿದೆ. ಇದರ ಕಾಮಗಾರಿಯೂ ನಡೆಯಬೇಕಿದೆ.

ಇದರಲ್ಲಿ ಚನ್ನಗಿರಿ ತಾಲೂಕಿನ 6 ಶಾಲೆಯ 10 ಕೊಠಡಿ, ದಾವಣಗೆರೆ ಉತ್ತರ ಕ್ಷೇತ್ರದ 8 ಶಾಲೆಯ 15, ದಾವಣಗೆರೆ ದಕ್ಷಿಣ ಕ್ಷೇತ್ರದ 3 ಶಾಲೆಯ 7, ಮಾಯಕೊಂಡ ಕ್ಷೇತ್ರದ 5 ಶಾಲೆಯ 11, ಹರಿಹರ ತಾಲೂಕಿನ 9 ಶಾಲೆಯ 10, ಹೊನ್ನಾಳಿ ತಾಲೂಕಿನ 5 ಶಾಲೆಯ 11, ಜಗಳೂರು ತಾಲೂಕಿನ 6 ಶಾಲೆಯ 12 ಕೊಠಡಿಗಳ ನಿರ್ಮಾಣ ಆಗಬೇಕಿದೆ.

ಕೊಠಡಿ ಇದ್ದರೆ ಸಾಕೆ? ಜಿಲ್ಲೆಯ ಕೆಲವು ಸರ್ಕಾರಿ ಶಾಲೆಗಳಲ್ಲಿ ಕಾಂಪೌಂಡ್ ಗೋಡೆಗಳಿಲ್ಲದೆ ರಕ್ಷಣೆಯ ಸಮಸ್ಯೆ ಇದೆ. ಇರುವ ಶೌಚಗೃಹಗಳು ಸರಿಯಾಗಿ ನಿರ್ವಹಣೆ ಆಗುತ್ತಿಲ್ಲ. ಮಾಯಕೊಂಡ ಸರ್ಕಾರಿ ಪಬ್ಲಿಕ್ ಶಾಲೆಯಲ್ಲಿ 185 ವಿದ್ಯಾರ್ಥಿನಿಯರಿಗೆ ಒಂದೇ ಶೌಚಗೃಹ ಇದ್ದುದು ಚರ್ಚೆಗೆ ಗ್ರಾಸವಾಗಿ ಜಿಲ್ಲಾ ನ್ಯಾಯಾಧೀಶರು ಭೇಟಿ ನೀಡಿದ ಬಳಿಕ ಸುಧಾರಣೆ ಕಾಣುತ್ತಿದೆ. ಸರ್ಕಾರಿ ಶಾಲೆಗಳ ಅಚ್ಚುಕಟ್ಟಾದ ವ್ಯವಸ್ಥೆಗೆ ಸರ್ಕಾರದ ಜತೆಗೆ ಸಾರ್ವಜನಿಕರು, ದಾನಿಗಳೂ ಸಹಕರಿಸಬೇಕು ಎಂಬುದು ಶಿಕ್ಷಕ ವಲಯದ ಮಾತು.

ಕ್ಷೇತ್ರ ಕೊಠಡಿ ಅನುದಾನ

ಚನ್ನಗಿರಿ 34 41.50 ಲಕ್ಷ

ದಾವಣಗೆರೆ (ಉ) 32 42.93 ಲಕ್ಷ

ದಾವಣಗೆರೆ (ದ) 35 41.93 ಲಕ್ಷ

ಹರಿಹರ 33 41 ಲಕ್ಷ

ಹೊನ್ನಾಳಿ 26 42 ಲಕ್ಷ

ಮಾಯಕೊಂಡ 35 61.37 ಲಕ್ಷ

ಜಗಳೂರು 68 125 ಲಕ್ಷ

----------------------

ಒಟ್ಟು 263 395 ಲಕ್ಷ ರೂ.

----------------------

ಜಿಲ್ಲೆಯಲ್ಲಿ ಅತಿವೃಷ್ಟಿ ಸಂದರ್ಭದಲ್ಲಿ ಹಾನಿಗೀಡಾಗಿದ್ದ ಶಾಲಾ ಕೊಠಡಿಗಳನ್ನು ರಾಷ್ಟ್ರೀಯ ವಿಪತ್ತು ನಿಧಿಯಡಿ ದುರಸ್ತಿ ಮಾಡಲಾಗಿತ್ತು. ಇದೀಗ ಸರ್ಕಾರದ ಅನುದಾನದಡಿ ದುರಸ್ತಿ ಕಾರ್ಯ ಕಾರಣಾಂತರವಾಗಿ ತಡವಾಗಿ ನಡೆಯುತ್ತಿದೆ. ರಿಪೇರಿ ಆಗುವ ಕಡೆಗಳಲ್ಲಿ ಸುಸ್ಥಿತಿ ಇರುವ ಕೋಣೆಗಳಲ್ಲಿ ಪಾಠ ಮಾಡಲು ಸೂಚಿಸಲಾಗುವುದು.

— -ಜಿ.ಕೊಟ್ರೇಶ್, ಡಿಡಿಪಿಐ.