ಮಳೆಗಾಗಿ ಮಲ್ಲಪ್ಪ ದೇವರಿಗೆ ಪಾದಯಾತ್ರೆ rain

ಪ್ರಸಕ್ತ ವರ್ಷದಲ್ಲಿ ಮುಂಗಾರು ಮಳೆ ಕೊರತೆ ಹಿನ್ನೆಲೆಯಲ್ಲಿ ಸುಮಾರು 35 ಕಿಲೋ ಮೀಟರ್ ದೂರದ ಮಳೆ ಮಲ್ಲಪ್ಪ ದೇವರಿಗೆ ಪೂಜೆ ಸಲ್ಲಿಸಲು ಕಾನನದಲ್ಲಿ ಪಾದಯಾತ್ರೆ ಮೂಲಕ ಹೊರಟರು. ಪಾದರಕ್ಷೆ ಇಲ್ಲದೆ ಮಡಿಯಿಂದ ತೆರಳಿ ವಿಶೇಷ ಪೂಜೆ ಸಲ್ಲಿಸುವ ಪದ್ಧತಿ ಇದೆ. ಇದಕ್ಕಾಗಿ ಬೇಕಾದ ಹಣ್ಣು, ಹೂವು, ಕಾಯಿ, ಪ್ರಸಾದಕ್ಕೆ ಬೇಕಾದ ಸಾಮಗ್ರಿ ಹಾಗೂ ಅಗತ್ಯ ದಿನಸಿಯನ್ನು ಊರಿನಿಂದಲೇ ಸಿದ್ಧತೆ ಮಾಡಿಕೊಂಡು ಹೋಗುತ್ತಾರೆ. ಅಲ್ಲಿ ದೇವಾಲಯದ ಸುತ್ತ ಸ್ವಚ್ಛಗೊಳಿಸಿ ಮಳೆಗಾಗಿ ಶ್ರದ್ಧೆ-ಭಕ್ತಿಯಿಂದ ಪೂಜೆ ನೆರವೇರಿಸಿ ಮಳೆಗಾಗಿ ಪ್ರಾರ್ಥಿಸುತ್ತಾರೆ.

ಮನೆಯಿಂದ ತಯಾರಿಸಿಕೊಂಡು ಹೋದ ರೊಟ್ಟಿ, ಬುತ್ತಿ, ಎಣಗಾಯಿ ಪಲ್ಯ, ಒಣ ಮೆಣಸಿನಕಾಯಿ ಚಟ್ನಿಯನ್ನು ನೈವೇದ್ಯ ಮಾಡಿ ನಾಲ್ಕು ದಿಕ್ಕುಗಳಿಗೆ ಪ್ರಸಾದ ಹಾಕುತತ್‌ಆರೆ. ಮಳೆ ಮಲ್ಲಪ್ಪ ಪೂಜೆಯ ನಂತರ ಮಳೆ ಬರುವುದೆಂಬ ನಂಬಿಕೆ ಇದೆ ಎನ್ನುತ್ತಾರೆ ಹಿರಿಯರು.

ನಂತರ ಸಾಮೂಹಿಕ ಭೋಜನ ಸವಿದು ನಂತರ ಪುಣ್ಯಕ್ಷೇತ್ರ ತೀರ್ಥಗಿರಿಯ ತೀರ್ಥರಾಮೇಶ್ವರದಲ್ಲಿ ದೇವಾಲಯಕ್ಕೆ ಬಂದು ರಾತ್ರಿ ವಿಶ್ರಾಂತಿ ಪಡೆಯುತ್ತಾರೆ. ಗ್ರಾಮ ದೇವರುಗಳಾದ ಬೀರಪ್ಪ, ಕಬಿಗಿರಿ ರಂಗನಾಥ ಸ್ವಾಮಿ, ಬೆಳಗುತ್ತಿ ತೀರ್ಥಪ್ಪ, ವೀರಭದ್ರೇಶ್ವರ ಸ್ವಾಮಿಯನ್ನು ಮಂಗಳವಾದ್ಯಗಳೊಂದಿಗೆ ತೀರ್ಥರಾಮೇಶ್ವರ ದೇವಾಲಯಕ್ಕೆ ಕೊಂಡೊಯ್ದು, ಉಳಿದಿದ್ದ ಗ್ರಾಮಸ್ಥರನ್ನು ಗ್ರಾಮಕ್ಕೆ ಕರೆತರಲಾಗುವುದು.

ತೀರ್ಥರಾಮೇಶ್ವರ ದೇವಾಲಯದಿಂದ ಬರುವಾಗ ಒಂದು ಬಿಂದಿಗೆ ಕಾಶಿ ಜಲವನ್ನು ಮಡಿಯಿಂದ ತರಲಾಗುತ್ತದೆ. ಅವಿವಾಹಿತ ಯುವಕರು ಬೆಳಗುತ್ತಿ ಗ್ರಾಮದ ಬ್ರಹ್ಮದೇವರ ಕಟ್ಟೆಯ ಬ್ರಹ್ಮದೇವರಿಗೆ ಕಾಶಿ ಜಲ ಸೇರಿದಂತೆ 101 ಬಿಂದಿಗೆ ಜಲಾಭಿಷೇಕ ಮಾಡುವ ಮೂಲಕ ಪೂಜೆಯು ಸಂಪನ್ನವಾಗಲಿದೆ ಎನ್ನುತ್ತಾರೆ ಗ್ರಾಮದ ಕುಬೇರಪ್ಪ.