ಇಂಜಿನಿಯರ್‌ಗಳತ್ತ ವಿಕಸಿತ ಭಾರತದ ಕಣ್ಣು

ನಗರದ ಯುಬಿಡಿಟಿ ಇಂಜಿನಿಯರಿಂಗ್ ಕಾಲೇಜಿನಲ್ಲಿ ಸೋಮವಾರ ಹಮ್ಮಿಕೊಂಡಿದ್ದ ‘ಚೈತ್ರ-2026’ ಸಾಂಸ್ಕೃತಿಕ ಹಬ್ಬ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾಲಯವು ತನ್ನ ಶೈಕ್ಷಣಿಕ, ಸಂಶೋಧನೆ ಕಾರಣಕ್ಕೆ ಕಳೆದ ಎರಡು ವರ್ಷದಲ್ಲಿ 10 ವಿಶಿಷ್ಟ ಪ್ರಶಸ್ತಿಗಳನ್ನು ಗಳಿಸಿದೆ. ಇಡೀ ದೇಶದಲ್ಲಿ ಇದು ಮಾದರಿ ಆಗಿ ಬೆಳೆಯುತ್ತಿದೆ. ಇದನ್ನು ದೇಶದಲ್ಲೇ ನಂಬರ್ 1 ತಾಂತ್ರಿಕ ವಿವಿ ಆಗಿಸಬೇಕೆಂಬ ಕನಸು ಕಂಡಿದ್ದೇವೆ ಎಂದರು.

ವಿಟಿಯು ಘಟಕ ಕಾಲೇಜಾದ ಯುಬಿಡಿಟಿಯಲ್ಲಿ ಐದು ವರ್ಷದ ಹಿಂದೆ ಆಗುತ್ತಿದ್ದ ಶೇ.60ರಷ್ಟು ದಾಖಲಾತಿ ಪ್ರಮಾಣ ಈಗ ಶೇ.100ರಷ್ಟು ತಲುಪಿದೆ. ಮೆರಿಟ್ ವಿದ್ಯಾರ್ಥಿಗಳನ್ನು ಈ ಕಾಲೇಜು ಆಕರ್ಷಿಸುತ್ತಿದೆ. ಇದಕ್ಕೆ ಶಿಕ್ಷಕರು ಕಾರಣರಾಗಿದ್ದಾರೆ. ಈ ಕಾಲೇಜು ರಾಜ್ಯದಲ್ಲಿ ಗುಣಮಟ್ಟದಲ್ಲಿ ಹಿಂದೆ ಉಳಿಯಬಾರದು ಎಂದು ಆಶಿಸಿದರು.

ಮೇ 29, 30ಕ್ಕೆ ಅಮೃತ ಮಹೋತ್ಸವ ಆಚರಿಸಿಕೊಳ್ಳುತ್ತಿರುವ ಯುಬಿಡಿಟಿ ಕಾಲೇಜು, ಸರ್ಕಾರಿ ಕಾಲೇಜು ಎನಿಸಿಲ್ಲ. ಇದು ಯಾವುದೇ ಖಾಸಗಿ ಕಾಲೇಜಿಗಿಂತಲೂ ಕಡಿಮೆ ಇಲ್ಲ ಎಂಬಂತೆ ಮೂಲ ಸೌಕರ್ಯಗಳನ್ನು ಹೊಂದಿದೆ. ಡ್ರೋನ್ ಲ್ಯಾಬ್, ಐಡಿಯಾ ಲ್ಯಾಬ್ ವಿಟಿಯು ಜಾರಿಗೊಳಿಸಿದ ಹೊಸ ಮಾದರಿ ಪಠ್ಯಕ್ರಮ ಬೋಧಿಸಲಾಗುತ್ತಿದೆ.

ಇನ್ನೆರಡು ತಿಂಗಳಲ್ಲಿ 800 ಆಸನ ಸಾಮರ್ಥ್ಯದ ಸುಸಜ್ಜಿತ ಸಭಾಂಗಣ ನಿರ್ಮಾಣವಾಗಲಿದೆ. 75ನೇ ವರ್ಷಾಚರಣೆ ಹಿನ್ನೆಲೆಯಲ್ಲಿ ಕಾಲೇಜಿನ ಚೈತ್ರ ಉತ್ಸವ ಎಲ್ಲರಲ್ಲೂ ಆಳವಾಗಿ ಉಳಿಯಬೇಕಿದೆ. ಹೀಗಾಗಿ ಈ ಕಾರ್ಯಕ್ರಮಕ್ಕೆ ನಿಗದಿತ ಬಜೆಟ್‌ಗಿಂತ 20 ಲಕ್ಷ ರೂ.ಗಳ ಹೆಚ್ಚುವರಿ ಅನುದಾನ ಒದಗಿಸಲಾಗಿದೆ ಎಂದು ಹೇಳಿದರು.

ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಎಚ್.ಟಿ. ಶೇಖರ್ ಮಾತನಾಡಿ ಇಂದು ಸಾಂಪ್ರದಾಯಿಕ ಪೊಲೀಸ್‌ಗಿರಿ ಕಡಿಮೆಯಾಗಿದ್ದರೆ ಸೈಬರ್ ಅಪರಾಧಗಳ ಪ್ರಮಾಣ ಹೆಚ್ಚುತ್ತಿವೆ. ತಂತ್ರಜ್ಞಾನಗಳ ಬಳಕೆಯೆ ಇದಕ್ಕೆ ಕರಣವಾಗಿದೆ. ಹೀಗಾಗಿ ಸೈಬರ್ ಅಪರಾಧ ನಿಗ್ರಹಿಸುವ ಹಾಗೂ ಮುಂಜಾಗ್ರತೆ ಕ್ರಮಗಳ ಬಗ್ಗೆ ಇಂಜಿನಿಯರಿಂಗ್ ಪದವೀಧರರು ದಾರಿ ಹುಡುಕಬೇಕಿದೆ ಎಂದರು.

ವಿಶ್ವದಲ್ಲೇ ಭಾರತ, ಯುವಕರ ದೇಶವಾಗಿದೆ. ಹೀಗಾಗಿ ಇಲ್ಲಿ ಅವಕಾಶಗಳಷ್ಟೇ ಸವಾಲುಗಳೂ ಹೆಚ್ಚಿವೆ. ಅವನ್ನು ಎದುರಿಸಿ ಭಾರತವನ್ನು ಅಭಿವೃದ್ಧಿ ಹೊಂದಿದ ದೇಶವಾಗಿಸುವ ಜವಾಬ್ದಾರಿ ನಿಮ್ಮೆಲ್ಲರ ಮೇಲಿದೆ ಎಂದ ಅವರು, ಎಲ್ಲರೂ ಇಂದು ಶಿಕ್ಷಣದ ಜತೆಯಲ್ಲೇ ಕಲೆ, ಸಂಸ್ಕೃತಿ, ಆಚಾರ-ವಿಚಾರ ರೂಢಿಯೊಂದಿಗೆ ಸುಶಿಕ್ಷಿತರಾಗುವ ಮೂಲಕ ದೇಶವನ್ನು ಬೆಳೆಸಬೇಕಿದೆ. ಪದವಿ ನಂತರದಲ್ಲಿ ನಿಮ್ಮ ಗುರಿ ಮರೆಯಬಾರದು ಎಂದು ಕಿವಿಮಾತು ಹೇಳಿದರು.

ಕಾರ್ಯಕ್ರಮದ ನಂತರ ಹಿನ್ನೆಲೆಗಾಯಕ ರಾಜೇಶ್ ಕೃಷ್ಣನ್ ತಮ್ಮ ಸಿರಿಕಂಠದಲ್ಲಿ ಸುಮಧುರ ಗೀತೆಗಳನ್ನು ಪ್ರಸ್ತುತಪಡಿಸಿ, ಪ್ರೇಕ್ಷಕರ ಮನ ತಣಿಸಿದರು. ಹುಚ್ಚ ಚಿತ್ರದ ಉಸಿರೇ ಉಸಿರೇ, ಒರಟ ಚಿತ್ರದ ಕಣ್ಣಲ್ಲಿ ಕಣ್ಣನಿಟ್ಟು.. ಮೊದಲಾದ ಹಾಡುಗಳನ್ನು ಹಾಡಿ ರಂಜಿಸಿದರು. ಗಾಯಕಿ ಶಮಿತಾ ಮಲ್ನಾಡ್ ಮಾದೇವ.. ಇತರ ಹಾಡುಗಳನ್ನು ಹಾಡಿದರು.

ಡಿಕೆಡಿ ಚಿಣ್ಣ ಪ್ರೀತಂ ವಿವಿಧ ಚಿತ್ರಗಳ ಸಂಭಾಷಣೆಗಳನ್ನು ನಿರರ್ಗಳವಾಗಿ ಹೇಳುವ ಜತೆಗೆ ಬಾರಿಸು ಕನ್ನಡ ಡಿಂಡಿಮವ ಸೇರಿ ಇತರೆ ಹಾಡುಗಳಿಗೆ ಹೆಜ್ಜೆ ಹಾಕಿ ನೋಡುಗರ ಗಮನ ಸೆಳೆದ.

ಕಾಮಿಡಿ ಕಿಲಾಡಿಗಳು ಖ್ಯಾತಿಯ ರಾಘವೇಂದ್ರ ಯಥಾಪ್ರಕಾರ ಮಹಿಳೆ ವೇಷದಲ್ಲಿ ಕಾರ್ಯಕ್ರಮ ನಡೆಸಿಕೊಟ್ಟರು. ಚಿಲ್ಲರ್ ಮಂಜು, ಕಾರ್ತೀಕ್, ನಯನಾ ನಗೆ ಪ್ರಹಸನದೊಂದಿಗೆ ನಗೆಯ ಅಲೆ ಉಕ್ಕಿಸಿದರು. ನಟಿ ಸಂಜನಾ ಆನಂದ್ ಬ್ಯಾಂಗಲ್ ಬಂಗಾರಿ ಹಾಡಿಗೆ ಸ್ಟೆಪ್ ಹಾಕಿದರು.