ಕೌಟಂಬಿಕ ಕಲಹದಿಂದ ಗಂಡ -ಹೆಂಡತಿ ಪ್ರತ್ಯೇಕವಾಗಿ ವಾಸಿಸುತ್ತಿದ್ದು, ಶಿವಮೊಗ್ಗ ಜಿಲ್ಲೆಯ ಹೊಸನಗರ ತಾಲೂಕಿನ ನಗರ ಎಂಬಲ್ಲಿ ಎರಡು ಮಕ್ಕಳು ತಾಯಿ ನೆಲೆಸಿದ್ದಾರೆ. ಅಪ್ಪನಿಗೆ ಅಪಘಾತವಾಗಿದೆ ಎಂದು ಅಜ್ಜಿ ಮೂಲಕ ಮಾಹಿತಿ ಪಡೆದ 16 ವರ್ಷದ ಬಾಲಕಿ, ಗಾಯಾಳು ತಂದೆಯನ್ನು ನೋಡುವ ಇಚ್ಛೆ ವ್ಯಕ್ತಪಡಿಸಿದಳು. ಸೋಮವಾರ ಪಕ್ಕದ ಮನೆಯ ಪರಿಚಿತರೊಂದಿಗೆ ಹೆಮ್ಮಾಡಿಗೆ ಹೋಗುತ್ತಿದ್ದಾಗ ನಿಟ್ಟೂರು ಕೊಲ್ಲೂರು ಸಮೀಪದ ಚೆಕ್ಪೋಸ್ಟ್ ಬಳಿ ಪೊಲೀಸರು ವಿಚಾರಿಸಿ ಜಿಲ್ಲಾ ಮಕ್ಕಳ ರಕ್ಷಣಾ ಘಟಕ ಮಾಹಿತಿ ರವಾನಿಸಿದರು.
ತಕ್ಷಣ ಕಾನೂನು ಪರಿವೀಕ್ಷಣಾಧಿಕಾರಿ ಪ್ರಭಾಕರ ಆಚಾರ್ ಕೊಲ್ಲೂರು ಪೊಲೀಸ್ ಠಾಣೆಗೆ ಭೇಟಿ ನೀಡಿ ಅಪ್ರಾಪ್ತ ಬಾಲಕಿಯನ್ನು ಸಮಾಲೋಚನೆಗೊಳಪಡಿಸಿದಾಗ 13 ವರ್ಷ ತಂದೆಯನ್ನು ಬಿಟ್ಟಿದ್ದು, ಅವರನ್ನು ನೋಡಲೇಬೇಕು ಎಂದು ಪರಿತಪಿಸುತ್ತಿರುವುದು ತಿಳಿಯಿತು. ತಂದೆಯನ್ನು ಠಾಣೆಗೆ ಕರೆಸಿ ಮಾತುಕತೆ ನಡೆಸಲು ಅವಕಾಶ ಕಲ್ಪಿಸಲಾಯಿತು. ನಂತರ ತಾಯಿ ಜತೆ ಹೋಗಲು ಬಾಲಕಿ ನಿರಾಕರಿಸಿದ್ದರಿಂದ ಮಕ್ಕಳ ಕಲ್ಯಾಣ ಸಮಿತಿ ಅಧ್ಯಕ್ಷರಾದ ರೊನಾಲ್ಡ್ ಫುರ್ಟಾಡೊ ಅವರ ಆದೇಶದಂತೆ ನಮ್ಮ ಭೂಮಿ ಕನ್ಯಾನ ಸಂಸ್ಥೆಯಲ್ಲಿ ಪುನರ್ವಸತಿ ಕಲ್ಪಿಸಲಾಗಿದೆ.
