ಹೆದ್ದಾರಿ ಬದಿ ಅಪಾಯಕಾರಿ ಮರ : ಯಾವುದೇ ಕ್ಷಣದಲ್ಲಿ ಬೀಳುವ ಆತಂಕ ಮನೆ, ವಾಹನ ಸಂಚಾರಕ್ಕೆ ಸಂಚಕಾರ ಸಾಧ್ಯತೆ

ವಿಜಯವಾಣಿ ಸುದ್ದಿಜಾಲ ಗುರುಪುರ

ಗುರುಪುರ ಪಂಚಾಯಿತಿ ವ್ಯಾಪ್ತಿಯ ಮೂಳೂರು ಗ್ರಾಮದ ಮಠದಗುಡ್ಡೆ ಸೈಟ್‌ನಲ್ಲಿ 5 ವರ್ಷಗಳ ಹಿಂದೆ ಸಂಭವಿಸಿದ ಭೂಕುಸಿತ ದುರಂತದ ಬಳಿಕ ಮನೆ ಕಳೆದುಕೊಂಡು ಸಂತ್ರಸ್ತರಾಗಿ ಬಾಡಿಗೆ ಮನೆಯಲ್ಲಿ ವಾಸ್ತವ್ಯ ಹೂಡಿರುವ ಮೊಹಮ್ಮದ್ ಯಾನೆ ಮಾಮು ಎಂಬುವರು ಮನೆಗೆ ಮರ ಬಿದ್ದು ಬಾಡಿಗೆ ಮನೆ ಕಳೆದುಕೊಳ್ಳಬಹುದಾದ ಮತ್ತೊಂದು ಆತಂಕಕ್ಕೊಳಗಾಗಿದ್ದಾರೆ.

ಮನೆ ಕಳೆದುಕೊಂಡಿರುವ ಮಾಮು ತನ್ನ ಮಕ್ಕಳು, ಸೊಸೆ, ಮೊಮ್ಮಕ್ಕಳ ಸಹಿತ 8 ಮಂದಿ ಗುರುಪುರ ಜಂಕ್ಷನ್‌ಗೆ ಅನತಿ ದೂರದಲ್ಲಿರುವ ಬಂಗ್ಲೆಗುಡ್ಡೆ ಹೆದ್ದಾರಿ ಬದಿಯಲ್ಲಿರುವ ವನಭೋಜನದ ಎದುರಿನ ಬಾಡಿಗೆ ಮನೆಯಲ್ಲಿ ವಾಸಿಸುತ್ತಿದ್ದಾರೆ. ಮನೆ ಅಂಗಳದಲ್ಲಿ ಹೆದ್ದಾರಿಗೆ ಚಾಚಿಕೊಂಡು ಅಂದಾಜು ನೂರು ವರ್ಷ ದಾಟಿರಬಹುದಾದ ಬೃಹತ್ ಗೋಳಿ ವೃಕ್ಷವೊಂದಿದೆ. ಮೊನ್ನೆ ಬೀಸಿದ ಬಿರುಗಾಳಿಗೆ ಈ ಮರದ ಬುಡ ಕಿತ್ತು ಮೇಲೆದ್ದಿದ್ದು, ಒಂದೊಮ್ಮೆ ಧರಾಶಾಹಿಯಾದರೆ ಮನೆ, ಹೆದ್ದಾರಿಗೆ ಅಪಾಯ ತಪ್ಪಿದ್ದಲ್ಲ. ಮರಕ್ಕೆ ಹತ್ತಿರದಲ್ಲೇ ಹೆದ್ದಾರಿ ಬದಿಯಲ್ಲಿ ನಾಲ್ಕೈದು ವಿದ್ಯುತ್ ಕಂಬಗಳಿವೆ. ಹಾಗಾಗಿ ಮರದಿಂದ ಮೆಸ್ಕಾಂ ಇಲಾಖೆಗೂ ನಷ್ಟ ಉಂಟಾಗುವ ಸಾಧ್ಯತೆ ಇದೆ.

ಅಪಾಯದಲ್ಲಿರುವ ಮರದ ಬಗ್ಗೆ ಪಂಚಾಯಿತಿ ಆಡಳಿತ, ಮೆಸ್ಕಾಂಗೆ ದೂರು ನೀಡಲಾಗಿದೆ. ಮೆಸ್ಕಾಂ ಅಧಿಕಾರಿಗಳ ಸೂಚನೆ ಮೇರೆಗೆ ಅರಣ್ಯ ಇಲಾಖೆ ಸಿಬ್ಬಂದಿ ಸ್ಪಾಟ್ ಪರಿಶೀಲನೆ ಮಾಡಿದ್ದಾರೆ. ಘಟನೆ ನಡೆದು 20 ದಿನವಾದರೂ ಇಲ್ಲಿಯವರೆಗೆ ಮರ ಕಡಿದು ಹಾಕುವ ಬಗ್ಗೆ ಅರಣ್ಯ ಇಲಾಖೆ ಕ್ರಮ ಕೈಗೊಂಡಿಲ್ಲ.