ಹುಬ್ಬಳ್ಳಿ: ಏಕಾಏಕಿ ಹೈ ವೋಲ್ಟೇಜ್ನಿಂದ ಉಂಟಾದ ಶಾರ್ಟ್ ಸರ್ಕ್ಯೂಟ್ನಿಂದಾಗಿ 20ಕ್ಕೂ ಹೆಚ್ಚು ಮನೆಗಳ ಇಲೆಕ್ಟ್ರಾನಿಕ್ ಮತ್ತು ಇಲೆಕ್ಟ್ರಿಕಲ್ ಉಪಕರಣಗಳು ಹಾನಿಗೀಡಾದ ಘಟನೆ ಹೊಸೂರಿನ ಸಿದ್ದಲಿಂಗೇಶ್ವರ ಕಾಲನಿಯಲ್ಲಿ ಮಂಗಳವಾರ ಸಂಭವಿಸಿದೆ.
ಮಧ್ಯಾಹ್ನ ಹೈ ವೋಲ್ಟೇಜ್ನಿಂದ ಹಲವು ಮನೆಗಳ ಟಿವಿ, ಕಂಪ್ಯೂಟರ್, ಫ್ರಿಜ್, ವಾಷಿಂಗ್ ಮಶಿನ್ಗಳು ಹಾನಿಗೀಡಾಗಿವೆ. ಕೆಲ ಪರಿಕರಗಳ ವೈರ್ಗಳೂ ಸುಟ್ಟು ಕರಕಲಾಗಿವೆ. ಆತಂಕಕ್ಕೀಡಾದ ಸಾರ್ವಜನಿಕರು ಕೂಡಲೆ ಹೆಸ್ಕಾಂ ಅಧಿಕಾರಿಗಳು ಹಾಗೂ ಸಹಾಯವಾಣಿಗೆ ಕರೆ ಮಾಡಿ ಮಾಹಿತಿ ನೀಡಿ, ಅಧಿಕಾರಿಗಳು ಸ್ಥಳಕ್ಕೆ ಬರಬೇಕೆಂದು ಆಗ್ರಹಿಸಿದರು.
ಬಳಿಕ ಸ್ಥಳಕ್ಕೆ ಆಗಮಿಸಿದ ಹೆಸ್ಕಾಂ ಸಿಬ್ಬಂದಿ ಹಾನಿ ಪರಿಶೀಲಿಸಿದರು. ಆದರೆ, ಪರಿಹಾರದ ಕುರಿತು ಚಕಾರ ಎತ್ತದೇ ವಾಪಸಾಗಿದ್ದಾರೆ ಎಂದು ಸ್ಥಳೀಯರಾದ ಆನಂದ ದಲಬಂಜನ ದೂರಿದ್ದಾರೆ. ಆಗಿರುವ ಹಾನಿಗೆ ಪರಿಹಾರ ಕೊಡಿಸಲು ಜನಪ್ರತಿನಿಧಿಗಳು ಕ್ರಮ ಕೈಗೊಳ್ಳಬೇಕು ಎಂದು ಅವರು ಮನವಿ ಮಾಡಿದ್ದಾರೆ.
