ಕೃಷಿಕರಿಗೆ ‘ಕಾಡುಹಂದಿ’ ಕಂಟಕ! : ಕಾಸರಗೋಡಿನಲ್ಲಿ ಬೆಳೆ ಚಿಂದಿ ಅಧಿಕಾರಿಗಳಿಂದ ನಿರ್ಲಕ್ಷ್ಯ

ಕೇಂದ್ರ ಹಾಗೂ ರಾಜ್ಯಸರ್ಕಾರ ಸಹಿತ ಸುಪ್ರೀಂ ಕೋರ್ಟ್‌ನ ಆದೇಶವಿದ್ದರೂ ಕಾಡುಹಂದಿಗಳ ಹಾವಳಿ ತಡೆಗಟ್ಟುವ ವಿಚಾರವಾಗಿ ಕಾಸರಗೋಡು ಜಿಲ್ಲಾ ಪಶುಸಂಗೋಪನಾ ಇಲಾಖೆ ಮೌನವಹಿಸಿದ್ದು, ಜಿಲ್ಲೆಯಲ್ಲಿ ಕಾಡುಹಂದಿಗಳ ಉಪಟಳ ವಿಪರೀತವಾಗುತ್ತಿದೆ.

ಮೊಗ್ರಾಲ್ ವಲಿಯನಾಂಗಿ ರಸ್ತೆಯಲ್ಲಿರುವ ಕೆ. ಮುಹಮ್ಮದ್ ಕುಂಞ್ಞೆ ಎಂಬುವರ 15 ತೆಂಗಿನ ಸಸಿಗಳನ್ನು ಹಂದಿಗಳ ಹಿಂಡು ಇತ್ತೀಚೆಗೆ ನಾಶಪಡಿಸಿದ್ದವು. ಜತೆಗೆ ಕಳೆದ ವರ್ಷ, ಮನೆಯ ಹಿತ್ತಲಿನ ಅಸಂಖ್ಯ ಬಾಳೆ ಗಿಡ ಮತ್ತು ಇತರ ಬೆಳೆಗಳನ್ನೂ ಹಂದಿಗಳು ನಾಶಪಡಿಸಿದ್ದವು.

ಶುಕ್ರವಾರ ಕಾಡುಹಂದಿ ದಾಳಿಯಲ್ಲಿ ಯುವಕನೊಬ್ಬ ಗಂಭೀರವಾಗಿ ಗಾಯಗೊಂಡಿದ್ದಾನೆ. ಬುಧವಾರ ರಾತ್ರಿ ಊಜಂಪಾಡಿ ನಿವಾಸಿ ಅಖಿಲ್ ಸಿ. ರಾಜು ಮೇಲೆ ಕಾಡುಹಂದಿ ದಾಳಿ ನಡೆಸಿದ್ದು, ಗಾಯಗೊಂಡ ಅಖಿಲ್ ಈಗಾಗಲೇ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಆಹಾರ ಅರಸಿಕೊಂಡು ನಾಡಿಗೆ ಬರುವ ಹಂದಿಗಳು ಕೃಷಿಯನ್ನು ಹಾಳುಮಾಡುವುದರ ಜತೆಗೆ ಜನರ ಮೇಲೂ ದಾಳಿ ನಡೆಸುತ್ತಿವೆ. ಸಾರ್ವಜನಿಕರು ರಸ್ತೆಯಲ್ಲಿ ಸಂಚರಿಸಲು ಭಯಪಡುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಗ್ರಾಮಗಳಲ್ಲಿ ಕೊಳಚೆ ಹೆಚ್ಚುವುದರೊಂದಿಗೆ ಮನೆಗಳಲ್ಲಿ ಉಳಿದ ಮಾಂಸಾಹಾರದ ತ್ಯಾಜ್ಯಗಳನ್ನು ರಸ್ತೆಗೆ ಎಸೆಯುವುದರಿಂದ ಗಣನೀಯ ಪ್ರಮಾಣದಲ್ಲಿ ಹಂದಿಗಳು ಹಾವಳಿ ಮುಂದುವರಿದಿದೆ. ಕನಿಷ್ಠ 6ರಿಂದ 8 ಮರಿ ಸಹಿತ 10 ಹಂದಿಗಳು ಗುಂಪಾಗಿ ಬರುತ್ತಿದ್ದು, ಹಸುಗಳಿಗೆ ಮೇವಿನ ಕೊರತೆಯೂ ಎದುರಾಗಿದೆ.

ಕಾಸರಗೋಡು ಜಿಲ್ಲೆಯ ವಿವಿಧ ಭಾಗಗಳಲ್ಲಿ ಕಾಡುಹಂದಿಗಳ ಸಮಸ್ಯೆ ತುಂಬಾ ಗಂಭೀರವಾಗಿದೆ. ದೇಲಂಪಾಡಿ, ಊಜಂಪಾಡಿ, ಬದಿಯಡ್ಕ, ಮಾನ್ಯ, ಕುಂಬ್ಡಾಜೆಯ ಏತಡ್ಕ, ಎಣ್ಮಕಜೆಯ ಸಾಯ, ಕಜಂಪಾಡಿ, ಮಂಜೇಶ್ವರ ಮತ್ತು ಮೊಗ್ರಾಲ್ ಪ್ರದೇಶಗಳಲ್ಲಿ ಕಾಡುಹಂದಿಗಳು ಬೆಳೆಗಳನ್ನು ನಾಶಪಡಿಸುತ್ತಿರುವ ಕುರಿತು ಈಗಾಗಲೇ ಸಾಲು ಸಾಲು ದೂರುಗಳು ಸ್ವೀಕಾರಗೊಂಡಿವೆ.

ಗ್ರಾಮೀಣ ಭಾಗದಲ್ಲಿ ಹೆಚ್ಚಿನ ಮಂದಿ ಬಳಿ ಕೋವಿಗಳಿದ್ದರೂ ಚುನಾವಣೆ ಸಹಿತ ವಿವಿಧ ಕಾರಣಗಳಿಂದ ಪೊಲೀಸ್ ಠಾಣೆಗಳಲ್ಲಿ ಇಡಲಾಗಿದ್ದು, ಚುನಾವಣೆ ಬಳಿಕ ಕೋವಿಗಳನ್ನು ವಾರಸುದಾರರಿಗೆ ತಲುಪಿಸುವ ಕುರಿತು ಪೊಲೀಸ್ ಇಲಾಖೆ ನಿರ್ಲಕ್ಷ್ಯ ವಹಿಸಿದೆ. ಕೋವಿ ಇಲ್ಲದಿರುವುದರಿಂದ ಕೃಷಿ ಹಾನಿ ಹಾಗೂ ಕಾಡುಪ್ರಾಣಿಗಳ ದಾಳಿಗಳಿಂದ ರಕ್ಷಿಸಿಕೊಳ್ಳುವುದೇ ಸಾರ್ವಜನಿಕರಿಗೆ ಸಾಹಸವಾಗಿದೆ. ಉಪಟಳ ನೀಡುವ ಕಾಡುಹಂದಿಗಳನ್ನು ಗುಂಡಿಕ್ಕುವಂತೆ ಸರ್ಕಾರದ ಆದೇಶವಿದ್ದರೂ ಸ್ಥಳೀಯ ಅಧಿಕಾರಿಗಳು ಅನುಮತಿ ನೀಡುತ್ತಿಲ್ಲ. ತಮಗೆ ಕೃಷಿ ನಾಶಕ್ಕೆ ಭಾರಿ ಪ್ರಮಾಣದ ಬೆಳೆಪರಿಹಾರ ನೀಡಬೇಕು ಅಥವಾ ಕಾಡುಹಂದಿಗಳನ್ನು ಗುಂಡಿಕ್ಕಿ ಕೊಲ್ಲಬೇಕು ಎಂದು ಜಿಲ್ಲೆಯ ಜನರು ಪಶುಸಂಗೋಪನಾ ಇಲಾಖೆಯನ್ನು ಒತ್ತಾಯಿಸಿದ್ದಾರೆ.