ಇತರ ಯಾವ ಪಂಚಾಯಿತಿಗಳಲ್ಲೂ ಇಲ್ಲದ ಏಕನಿವೇಶನ ಅಭಿವೃದ್ಧಿ ಶುಲ್ಕ, ಕಸ ಸಂಗ್ರಹಿಸದಿದ್ದರೂ ಶುಲ್ಕ ವಿಧಿಸುವ ವಿಟ್ಲ ಪಟ್ಟಣ ಪಂಚಾಯಿತಿ ಆಡಳಿತ ಸುಗಮ ಸಂಚಾರಕ್ಕೆ ಮಾತ್ರ ಯಾವುದೇ ಕ್ರಮ ಕೈಗೊಳ್ಳುತ್ತಿಲ್ಲ. ಕೆಲ ಸಮಯದ ಹಿಂದೆ ವಿವಿಧ ಸಭೆಗಳನ್ನು ನಡೆಸಿ ನಾಲ್ಕು ರಸ್ತೆಗಳಲ್ಲಿ ಸಂಚಾರ ಸಮಸ್ಯೆ ನಿವಾರಣೆಗೆ ಡಿಸಿ ಆದೇಶವನ್ನು ಕಟ್ಟುನಿಷ್ಟಾಗಿ ಅನುಷ್ಠಾನ ಮಾಡುವುದಾಗಿ ಹೇಳಿಕೆ ನೀಡಿದ್ದು ಬಿಟ್ಟರೆ ಯಾವುದೂ ಕಾರ್ಯರೂಪಕ್ಕೆ ಬಂದಿಲ್ಲ. ಹಿಂದಿನಂತೆಯೇ ಎಲ್ಲೆಂದರಲ್ಲಿ ವಾಹನ ನಿಲುಗಡೆ, ರಸ್ತೆಯಲ್ಲೇ ನಿಲ್ಲುವ ಬಸ್ಗಳು, ನಾಲ್ಕು ಮಾರ್ಗದಲ್ಲೇ ಪ್ರಯಾಣಿಕರನ್ನು ಹತ್ತಿಸುವುದು, ಇಳಿಸುವುದರಿಂದ ಸಮಸ್ಯೆ ಬಿಗಡಾಯಿಸಿದೆ. ಕಾನೂನು ಪಾಲನೆ ಮಾಡುವವರಿಗೂ ಇದರಿಂದ ತೊಡಕಾಗುತ್ತಿದ್ದು ಪಟ್ಟಣ ಪಂಚಾಯಿತಿ ಆಡಳಿತವೇ ನಿಷ್ಪ್ರಯೋಜಕವಾಗಿ ಎಂದು ಸಾರ್ವಜನಿಕರು ತೆಗಳುವಂತಾಗಿದೆ.
