ಮೈಸೂರಿನ ವ್ಯಕ್ತಿಗೆ ಮಂಗಳಮುಖಿಯರಿಂದ ತೊಂದರೆ- ತನಿಖೆಗೆ ಒತ್ತಾಯ

ಮಂಗಳವಾರ ಸುದ್ದಿಗೋಷ್ಟಿಯಲ್ಲಿ ಮಾತನಾಡಿದ ಸಂಘಟನೆ ಅಧ್ಯಕ್ಷೆ ನಿಖಿಲಾ, ಸಾಮಾಜಿಕ ಜಾಲತಾಣದ ಮೂಲಕ ಪರಿಚವಾದ ಮೈಸೂರಿನ ವ್ಯಕ್ತಿಯನ್ನು ಮಂಗಳೂರಿನ ಮಂಗಳಮುಖಿ ಅಪಹರಣ ಮಾಡಿಕೊಂಡು ಆತನಿಗೆ ಜಿಲ್ಲೆಯಲ್ಲಿ ಆಧಾರ್‌ಕಾರ್ಡ್, ಟ್ರಾನ್ಸ್ ಜೆಂಡರ್ ಗುರುತಿನ ಚೀಟಿಯನ್ನು ಕೂಡಾ ಮಹಿಳಾ ಅಭಿವೃದ್ಧಿ ನಿಗಮಕ್ಕೆ ಸುಳ್ಳು ದಾಖಲೆಗಳನ್ನು ನೀಡಿ ಮಾಡಿಸಿರುತ್ತಾರೆ. ಇದು ಅಪರಾಧವಾಗಿದೆ. ಸಂಘಟನೆಯ ಪದಾಧಿಕಾರಿಗಳು ಹಾಗೂ ಸದಸ್ಯರ ಗಮನಕ್ಕೆ ಬಾರದೆ ಈ ತಪ್ಪು ನಡೆದಿದ್ದು, ಇದರ ವಿರುದ್ಧ ತನಿಖೆಯಾಗಲಿ ಎಂದರು.

ಇಂತಹ ಕೃತ್ಯಗಳಿಂದಾಗಿ ಮಂಗಳೂರಿನಲ್ಲಿ ಹಲವಾರು ವರ್ಷಗಳಿಂದ ವಿವಿಧ ಜಿಲ್ಲೆ, ರಾಜ್ಯಗಳಿಂದ ಬಂದು ಇಲ್ಲಿ ಘನತೆಯ ಬದುಕು ಕಟ್ಟಿಕೊಳ್ಳಲು ಪ್ರಯತ್ನಿಸಿರುವ ನೈಜ ಮಂಗಳಮುಖಿಯರಿಗೆ ತೊಂದರೆಯಾಗುವಂತೆ ಆಗಿದೆ. ಲಿಂಗತ್ವ ಅಲ್ಪಸಂಖ್ಯಾತರ ನಕಲಿ ಐಡಿಗಳನ್ನು ಮಾಡಿಸಿಕೊಂಡು ಕೆಲವರು ಇಂತಹ ಕೃತ್ಯಗಳನ್ನು ಎಸಗುತ್ತಿದ್ದಾರೆ. ನಮ್ಮ ಸಂಘಟನೆಯಡಿ 106 ಮಂದಿ ಸದಸ್ಯರಿದ್ದು, 49 ಮಂದಿಗೆ ಟ್ರಾನ್ಸ್ ಜೆಂಡರ್ ಕಾರ್ಡ್ ಆಗಿದೆ. ಇದೀಗ ಈ ಕಾರ್ಡ್ ಪಡೆದಿರುವವರ ನೈಜತೆಯೂ ಪ್ರಶ್ನಾರ್ಹವಾಗಿದೆ ಎಂದರು.

ನಕಲಿ ಮಂಗಳಮುಖಿಯರಿಂದ ನೈಜ ಮಂಗಳಮುಖಿಯರ ಅನ್ನದ ಬಟ್ಟಲಿಗೆ ಕನ್ನ ಹಾಕಲಾಗುತ್ತಿದೆ. ನಮ್ಮ ಸಂಸ್ಕೃತಿಯನ್ನು ವ್ಯವಹಾರವಾಗಿಸಿಕೊಂಡು ಬದುಕುವವರೂ ಇದ್ದಾರೆ. ಸಮುದಾಯದ ಒಬ್ಬರು ಮಾಡಿದ ತಪ್ಪಿಗೆ ಎಲ್ಲರೂ ತೊಂದರೆಗೆ ಸಿಲುಕುವಂತಾಗಬಾರದು ಎಂದು ಸಂಘಟನೆಯ ಕಾರ್ಯದರ್ಶಿ ಅರುಂಧತಿ ಹೇಳಿದರು.

ಸಂಘಟನೆಯ ಕಾರ್ಯಕಾರಿ ಸಮಿತಿ ಸದಸ್ಯೆ ಪ್ರೇಮಾ, ಸದಸ್ಯರಾದ ಕುಶಿ, ವೃಂದಾ ನಾಯಕ್, ದೀಕ್ಷಾ ಉಪಸ್ಥಿತರಿದ್ದರು.