ದೇಶ ವಿಭಜಿಸುವ ಮನಸ್ಥಿತಿ ಜೀವಂತ TIRANGA

ಪುತ್ತೂರು: ತಿರಂಗಾ ದೇಶಭಕ್ತಿಯ ಭಾವನೆಯನ್ನು ಪ್ರಕಟಿಸುವ ಸಂಕೇತವಾಗಿದೆ. ಕಾಂತ್ರಿಕಾರಿಗಳ ಹೋರಾಟಕ್ಕೆ ಬ್ರಿಟಿಷರು ಸ್ವಾತಂತ್ರ್ಯ ನೀಡಿದರೇ ಹೊರತು ಅಹಿಂಸೆಯ ಹೋರಾಟದಿಂದ ಅಲ್ಲ. ಬಲಿಷ್ಠ ಭಾರತಕ್ಕಾಗಿ ಬಡತನ, ಅಜ್ಞಾನ, ಭ್ರಷ್ಟಾಚಾರ, ಭಯೋತ್ಪಾದನೆ ವಿರುದ್ಧ ಹೋರಾಟ ನಡೆಯಬೇಕಾಗಿದೆ. ಸೈನ್ಯದಲ್ಲಿ ಜಾತಿ ಲೆಕ್ಕಾಚಾರ ಹಾಕುವ ಮನಸ್ಥಿತಿ ಅಪಾಯಕಾರಿ. ಭಾರತವನ್ನು ವಿಭಜಿಸುವ ಮನಸ್ಥಿತಿ ಈಗಲೂ ಜೀವಂತಾಗಿದೆ. ನಿರಂತರ ಜಾಗರೂಕತೆಯಿಂದ ಮಾತ್ರವೇ ದೇಶದ ಸ್ವಾತಂತ್ರ್ಯ ಉಳಿಸಿಕೊಳ್ಳಬಹುದು ಎಂದು ಮಾಜಿ ಸಚಿವ ಸಿ.ಟಿ.ರವಿ ಹೇಳಿದರು.

ಪುತ್ತೂರು ಬಿಜೆಪಿ ವತಿಯಿಂದ ಮಹಾಲಿಂಗೇಶ್ವರ ದೇವಸ್ಥಾನದ ಮುಂಭಾಗದಿಂದ ಕಿಲ್ಲೆ ಮೈದಾನದವರೆಗೆ ಶುಕ್ರವಾರ ನಡೆದ ತಿರಂಗಾ ಯಾತ್ರೆ ಪ್ರಯುಕ್ತ ಪುರಭವನದಲ್ಲಿ ನಡೆದ ಸಭಾ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಸಂಸದ ಕ್ಯಾ.ಬ್ರಿಜೇಶ್ ಚೌಟ ಮಾತನಾಡಿ, ಸೈನಿಕರಿಗೆ, ಕ್ರೀಡಾಪಟುಗಳಿಗೆ, ವಿಜ್ಞಾನಿಗಳಿಗೆ ತಿರಂಗಾ ಪ್ರೋತ್ಸಾಹ ತುಂಬಿದೆ. ವಿಕಸಿತ ಭಾರತ ನಿರ್ಮಾಣ ಮಾಡಲು ತಿರಂಗಾ ಪ್ರೇರಣೆಯಾಗುವ ಜತೆಗೆ ಎಲ್ಲರೂ ಒಂದೇ ಮನಸ್ಸಿನಿಂದ ಒಗ್ಗಟ್ಟಿನಿಂದ ಕೆಲಸ ಮಾಡಬೇಕಾಗಿದೆ ಎಂದರು.

ತಿರಂಗಾ ಯಾತ್ರೆಯನ್ನು ಹೈಕೋರ್ಟ್ ವಕೀಲ ಡಾ.ಅರುಣ್‌ಶ್ಯಾಮ್ ಉದ್ಘಾಟಿಸಿದರು. ಬಿಜೆಪಿ ಜಿಲ್ಲಾಧ್ಯಕ್ಷ ಸತೀಶ್ ಕುಂಪಲ ಅಧ್ಯಕ್ಷತೆ ವಹಿಸಿದ್ದರು. ಪ್ರಮುಖರಾದ ರೂಪಾಲಿ ನಾಯಕ್, ಭರತೇಶ್, ಶಾಸಕರಾದ ವೇದವ್ಯಾಸ ಕಾಮತ್, ಡಾ.ಭರತ್ ಶೆಟ್ಟಿ, ಹರೀಶ್ ಪೂಂಜ, ಭಾಗೀರಥಿ ಮುರುಳ್ಯ, ರಾಜೇಶ್ ನಾಕ್, ವಿಧಾನಪರಿಷತ್ ಸದಸ್ಯ ಕಿಶೋರ್ ಕುಮಾರ್ ಬೊಟ್ಯಾಡಿ ಉಪಸ್ಥಿತರಿದ್ದರು.

ದಯಾನಂದ ಶೆಟ್ಟಿ ಉಜಿರೆಮಾರು ಸ್ವಾಗತಿಸಿದರು. ಮಾಜಿ ಶಾಸಕ ಸಂಜೀವ ಮಠಂದೂರು ಪ್ರಾಸ್ತಾವಿಕವಾಗಿ ಮಾತನಾಡಿದರು. ಶಿವಕುಮಾರ್ ವಂದಿಸಿದರು. ಹರಿಪ್ರಸಾದ್ ಯಾದವ್ ನಿರೂಪಿಸಿದರು.