ಅನೈತಿರ ಅಡ್ಡೆ ಕೆಪಿಟಿ ಕಟ್ಟಡ!

ರಾಜ್ಯ ಉನ್ನತ ಶಿಕ್ಷಣ ಇಲಾಖೆಯ ಬೃಹತ್ ಅನುದಾನದಲ್ಲಿ ಮಂಗಳೂರಿನ ಗುಂಡಳಿಕೆ ಹಾಗೂ ಶರ್ಬತ್‌ಕಟ್ಟೆ ಸಮೀಪ ನಿರ್ಮಾಣಗೊಂಡಿರುವ ಕರ್ನಾಟಕ ಸರ್ಕಾರಿ ಪಾಲಿಟೆಕ್ನಿಕ್ (ಕೆಪಿಟಿ) ಬಾಲಕ ಮತ್ತು ಬಾಲಕಿಯರ ಸುಸಜ್ಜಿತ ವಿದ್ಯಾರ್ಥಿನಿಲಯದ ಕಟ್ಟಡಗಳು ಇಂದು ಸಮಾಜ ಕಂಟಕರ ಪಾಲಾಗಿವೆ. ಹಾಸ್ಟೇಲ್ ನಿರ್ಮಾಣಕ್ಕೆಂದೇ ಉನ್ನತ ಶಿಕ್ಷಣ ಇಲಾಖೆ ಅನುದಾಣದಲ್ಲಿ ಗುಂಡಳಿಕೆ(ಹೊಸತು) ಹಾಗೂ ಶರ್ಬತ್‌ಕಟ್ಟೆ(ಹಳೆ) ಬಳಿ ಕಟ್ಟಡ ನಿರ್ಮಿಸಲಾಗಿದೆ. ಆದರೆ ನಿಮಯಮದ ಪ್ರಕಾರ ಕೆಪಿಟಿಗೆ ತಾಂತ್ರಿಕ ಶಿಕ್ಷಣ ತರಬೇತಿ ನೀಡುವುದು ಮಾತ್ರ ಕೆಲಸ, ಹಾಸ್ಟೇಲ್ ನಿರ್ವಹಣೆ ಹಾಗೂ ನಡೆಸುವ ಅಧಿಕಾರ ಇಲ್ಲ. ಇದೇ ಕಾರಣದಿಂದ ಈ ಕಟ್ಟಡವನ್ನು ಬಿಸಿಎಂಗೆ ಹಸ್ತಾಂತರಿಸಲು ರಾಜ್ಯ ಸರ್ಕಾರವೇ ಆದೇಶಿಸಿತ್ತು. ಸರ್ಕಾರದ ಆದೇಶವನ್ನು ಕಳೆದ ಒಂದು ವರ್ಷದಿಂದ ಗಾಳಿಗೆ ತೂರಿರುವ ಕರ್ನಾಟಕ ಸರ್ಕಾರಿ ಪಾಲಿಟೆಕ್ನಿಕ್ (ಕೆಪಿಇ) ಆಡಳಿತ ಮಂಡಳಿಯ ಧೋರಣೆಗೆ ಇತ್ತೀಚೆಗೆ ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿಗಳು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದರು. ಜೂನ್ 22ರಂದು ಜಿಲ್ಲಾಧಿಕಾರಿಗಳು ಕೆಪಿಟಿ ಪ್ರಾಂಶುಪಾಲರಿಗೆ ಅಧಿಕೃತ ಆದೇಶ ಪತ್ರದ ಮೂಲಕ ಕಟ್ಟಡಗಳನ್ನು ತಕ್ಷಣ ಹಸ್ತಾಂತರಿಸುವಂತೆ ಕಟ್ಟುನಿಟ್ಟಿನ ಸೂಚನೆ ನೀಡಿದ್ದರು. ಆದರೆ, ಅಧಿಕಾರಿಗಳ ಹಠಮಾರಿ ತನ ಹಾಗೂ ಉಡಾಫೆ ಎಷ್ಟರ ಮಟ್ಟಿಗಿದೆ ಎಂದರೆ, ಅವರು ಸ್ವತಃ ಜಿಲ್ಲಾಧಿಕಾರಿಗಳ ಆದೇಶಕ್ಕೂ ಬೆಲೆ ನೀಡಿಲ್ಲ!

ಕಳೆದ ಹಲವು ವರ್ಷಗಳ ಹಿಂದೆ ನಿರ್ಮಾಣಗೊಂಡು ಧೂಳು ಹಿಡಿಯುತ್ತಿದ್ದ ಈ ಕಟ್ಟಡಗಳನ್ನು ಸದುಪಯೋಗಪಡಿಸಿಕೊಳ್ಳಲು ಹಿಂದುಳಿದ ವರ್ಗಗಳ ಕಲ್ಯಾಣ ಇಲಾಖೆಯು (ಬಿಸಿಎಂ) ಏಕ ಕಡತ ಪ್ರಸ್ತಾವನೆಯನ್ನು ಸಲ್ಲಿಸಿತ್ತು. ಇದನ್ನು ಪುರಸ್ಕರಿಸಿದ ರಾಜ್ಯಪಾಲರ ಆದೇಶದಂತೆ, ರಾಜ್ಯ ಸರ್ಕಾರದ ಅಧೀನ ಕಾರ್ಯದರ್ಶಿಗಳು 2025ರ ಜೂನ್ 26 ರಂದು ಉನ್ನತ ಶಿಕ್ಷಣ ಇಲಾಖೆಯ ವ್ಯಾಪ್ತಿಯ 28 ವಿದ್ಯಾರ್ಥಿನಿಲಯಗಳನ್ನು ಹಿಂದುಳಿದ ವರ್ಗಗಳ ಕಲ್ಯಾಣ ಇಲಾಖೆಗೆ ಹಸ್ತಾಂತರಿಸಲು ಕಡಕ್ ಆದೇಶ ನೀಡಿದ್ದರು. ಈ ಆದೇಶದ ಅನ್ವಯ ಬಂಟ್ವಾಳ ತಾಲೂಕಿನ ವಿಟ್ಲ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನ ಖಾಲಿ ಕಟ್ಟಡವು ಈಗಾಗಲೇ ಹಸ್ತಾಂತರಗೊಂಡು, ಬಡ ವಿದ್ಯಾರ್ಥಿಗಳಿಗೆ ಆಸರೆಯಾಗಿದೆ. ಆದರೆ, ಮಂಗಳೂರಿನ ಗುಂಡಳಿಕೆ ಹಾಗೂ ಶರ್ಬತ್‌ಕಟ್ಟೆಯಲ್ಲಿರುವ ಕೆಪಿಟಿ ಹಾಸ್ಟೆಲ್ ಕಟ್ಟಡಗಳು ಮಾತ್ರ ಇಂದಿಗೂ ಹಸ್ತಾಂತರಗೊಳ್ಳದೆ ಪಾಳು ಬಿದ್ದಿವೆ. ಈ ಗಂಭೀರ ಸಾರ್ವಜನಿಕ ಮತ್ತು ಶೈಕ್ಷಣಿಕ ಸಮಸ್ಯೆಯನ್ನು ಕೈಗೆತ್ತಿಕೊಂಡಿರುವ ಪ್ರಮುಖ ವಿದ್ಯಾರ್ಥಿ ಸಂಘಟನೆಗಳಾದ ಎಬಿವಿಪಿ, ಎನ್‌ಎಸ್‌ಯುಐ ಹಾಗೂ ಸರ್ವಕಾಲೇಜು ವಿದ್ಯಾರ್ಥಿ ಪರಿಷತ್ ಈಗ ಪ್ರತ್ಯೇಕವಾಗಿ ಬೃಹತ್ ಹೋರಾಟಕ್ಕೆ ಸಿದ್ಧತೆ ನಡೆಸಿವೆ.

ಗುಂಡಳಿಕೆ ಹಾಗೂ ಶರ್ಬತ್‌ಕಟ್ಟೆಯಲ್ಲಿರು ಕಟ್ಟಡಗಳು ಹಾಸ್ಟೆಲ್ ಕಟ್ಟಡ ಎಂದೇ ಪಾಲಿಕೆ ಹಾಗೂ ಇತರೆ ದಾಖಲೆಯಲ್ಲಿ ನಮೂದುಗೊಂಡಿದೆ. ವಿದ್ಯಾರ್ಥಿ ನಿಲಯಕ್ಕೆಂದೇ ಕಟ್ಟಡದ ವಿನ್ಯಾಸ ಹಾಗೂ ಮೂಡ ಅನುಮತಿಗಳನ್ನೂ ಪಡೆದು ನಿರ್ಮಿಸಲಾಗಿದೆ. ಈ ಕಾರಣಕ್ಕಾಗಿ ಇಲ್ಲಿ ಹಾಸ್ಟೆಲ್ ಹೊರತುಪಡಿಸಿ ಬೇರೆ ಯಾವುದೇ ಸರ್ಕಾರಿ ಯೋಜನೆಗಳಾಗಲಿ, ತರಬೇತಿ ಕೇಂದ್ರವಾಗಿ ರೂಪಿಸಲು ಕಾನೂನು ತೊಡಕು ಇದೆ. ಈ ಎಲ್ಲಾ ತೊಡಕುಗಳ ಅರಿವಿದ್ದರೂ ಜಿದ್ದಿಗೆ ಬಿದ್ದ ಕೆಪಿಟಿ ಸಂಸ್ಥೆ ಸದ್ಯಕ್ಕೆ ಕುಡುಕ ಮತ್ತು ಮಂಗಳಮುಖಿಯರಿಗೆಂದೇ ಮೀಸಲಿಟ್ಟಂತೆ ಇದೆ.

-----------------

------------------