ಐತಿಹಾಸಿಕ ಕೆರೆಗೆ ಬೇಕಿದೆ ಕಾಯಕಲ್ಪ!

ಪರಿಸರದ ಒಂದಷ್ಟು ಪ್ರದೇಶಕ್ಕೆ ಅಂತರ್ಜಲದ ಸೆಲೆಯಾಗಿದ್ದ ಕೆರೆ ಇಂದು ಕಳೆ ಗಿಡಗಳ ಆವಾಸ ಸ್ಥಾನವಾಗಿ ಮಾರ್ಪಟ್ಟು, ದುಸ್ಥಿತಿಯಲ್ಲಿದೆ. ಕಾರ್ಕಳದ ಐತಿಹಾಸಿಕ ಹೆಗ್ಗುರುತುಗಳಲ್ಲಿ ಒಂದಾದ ಚತುರ್ಮುಖ ಬಸದಿ ಸಮೀಪದ ನಾಗರಬಾವಿ ಕೆರೆ ಇಂದು ಅನಾಥವಾಗಿ ಕಾಯಕಲ್ಪಕ್ಕಾಗಿ ಐತಿಹಾಸಿಕ ಕೆರೆಯೊಂದು ಕಾಯುವಂತಿದೆ.

ಜೈನ ಕಾಶಿ ಎಂದೇ ಪ್ರಸಿದ್ಧಿಯಾದ ಕಾರ್ಕಳ ತನ್ನದೆ ಆದ ಐತಿಹಾಸಿಕ ಮತ್ತು ಧಾರ್ಮಿಕ ಹಿನ್ನೆಲೆ ಹೊಂದಿದೆ. ಇಲ್ಲಿನ ಪ್ರತಿ ಶಿಲೆ, ಕೆರೆ ಹಾಗೂ ಬಾವಿಗಳು ಅಂದಿನ ರಾಜರ ಆಳ್ವಿಕೆ ಮತ್ತು ವಾಸ್ತುಶಿಲ್ಪಕ್ಕೆ ಸಾಕ್ಷಿಯಾಗಿವೆ. ಆದರೆ ಇಂತಹ ವೈಭವದ ಇತಿಹಾಸ ಹೊಂದಿರುವ ನಗರದ ಹೃದಯ ಭಾಗದಲ್ಲಿರುವ ನಾಗರಬಾವಿ ಕೆರೆ ಇಂದು ಗಿಡಗಂಟಿ ಹಾಗೂ ಕಳೆಗಳಿಂದ ತುಂಬಿದೆ. ಒಂದು ಕಾಲದಲ್ಲಿ ಸುತ್ತಮುತ್ತಲಿನ ಪರಿಸರಕ್ಕೆ ನೀರಿನ ಆಸರೆಯಾಗಿದ್ದ ಕೆರೆ ಇಂದು ತನ್ನ ಅಸ್ತಿತ್ವವನ್ನೇ ಕಳೆದುಕೊಳ್ಳುವ ಭೀತಿಯಲ್ಲಿದೆ.

ಅರ್ಧ ಎಕರೆ ವಿಸ್ತೀರ್ಣವಿರುವ ಈ ಕೆರೆ ಸುತ್ತಮುತ್ತಲಿನ ನೂರಾರು ಮನೆಗಳ ಬಾವಿಗಳಿಗೆ ನೀರುಣಿಸುವ ಮುಖ್ಯ ಸೆಲೆ. ಆದರೆ ಸದ್ಯ ಕೆರೆ ಸಾಲ್ವೇನಿಯಂ ಹಾಗೂ ಇನ್ನಿತರ ಕಳೆಗಳಿಂದ ಸಂಪೂರ್ಣ ಆವೃತವಾಗಿದೆ. ಕೆರೆಯ ದಂಡೆಗಳು ಅಲ್ಲಲ್ಲಿ ಶಿಥಿಲಗೊಂಡಿದ್ದು, ಹೂಳು ತುಂಬಿಕೊಂಡಿದೆ. ತಕ್ಷಣ ಹೂಳೆತ್ತುವ ಕಾರ್ಯ ನಡೆಯದಿದ್ದರೆ ಅಂತರ್ಜಲ ಕುಸಿತದ ಭೀತಿ ಎದುರಾಗಲಿದೆ ಎಂದು ಸ್ಥಳೀಯರು ಆತಂಕ ವ್ಯಕ್ತಪಡಿಸಿದ್ದಾರೆ.

ಕೆರೆಯ ಸುತ್ತಮುತ್ತ ಹಾಗೂ ಒಳಭಾಗದಲ್ಲಿ ಹೆಮ್ಮರವಾಗಿ ಬೆಳೆದಿರುವ ಗಿಡಗಂಟಿಗಳು ಕೆರೆಯ ಸೌಂದರ್ಯ ಹಾಳುಗೆಡವಿವೆ. ಕೆರೆಯಲ್ಲಿ ಕಳೆಗಳು ಅತಿಯಾಗಿ ಬೆಳೆದಿದ್ದು, ಹೂಳು ತುಂಬಿರುವುದರಿಂದ ನೀರಿನ ಸಂಗ್ರಹ ಸಾಮರ್ಥ್ಯ ಕುಸಿದಿದೆ. ಸರಿಯಾದ ನಿರ್ವಹಣೆ ಇಲ್ಲದೆ ಸುತ್ತಮುತ್ತಲಿನ ಕಸಕಡ್ಡಿಗಳು ಕೆರೆಗೆ ಬೀಳುತ್ತಿದ್ದು, ನೀರು ಕಲುಷಿತಗೊಂಡಿದೆ.

ಹಲವು ವರ್ಷಗಳಿಂದ ರೋಟರಿ ಕ್ಲಬ್ ಕಾರ್ಕಳ- ಸ್ವಚ್ಛ ಕಾರ್ಕಳ ಬ್ರಿಗೇಡ್ ಈ ಕೆರೆ ಸಂರಕ್ಷಿಸುವ ನಿಟ್ಟಿನಲ್ಲಿ ಸಾಲ್ವೇನಿಯಂ ಕಳೆ ತೆಗೆಯುವ ಕೆಲಸ ಮಾಡುತ್ತಿದೆ. ಕೆರೆ ಸುತ್ತಮುತ್ತ ಸ್ವಚ್ಛತಾ ಕಾರ್ಯ ನಡೆಸಿ ಕೆರೆಯ ಅಸ್ತಿತ್ವ ಉಳಿಸಲು ಪ್ರಯತ್ನಿಸಿದೆ. ಆದರೆ ಶಾಶ್ವತ ಪರಿಹಾರಕ್ಕಾಗಿ ಸರ್ಕಾರದ ಹಂತದಲ್ಲಿ ದೊಡ್ಡ ಮಟ್ಟದ ಅಭಿವೃದ್ಧಿ ಕಾರ್ಯಗಳು ನಡೆಯಬೇಕಿದೆ ಎಂಬುದು ಸ್ಥಳೀಯರ ಒತ್ತಾಸೆ. ಪ್ರವಾಸಿ ತಾಣವಾದ ಚತುರ್ಮುಖ ಬಸದಿ ಪಕ್ಕದಲ್ಲೇ ಇರುವ ಈ ಕೆರೆಯನ್ನು ಅಭಿವೃದ್ಧಿಪಡಿಸಿ, ದಂಡೆ ಸುಂದರಗೊಳಿಸಿದರೆ ನಗರದ ಸೌಂದರ್ಯಕ್ಕೆ ಮತ್ತೊಂದು ಗರಿ ಸಿಕ್ಕಂತಾಗುತ್ತದೆ ಎಂಬುದು ನಾಗರಿಕರ ಆಶಯ.