ಮಯೂರ ಜಂಕ್ಷನ್ ಕಾಮಗಾರಿಯಲ್ಲಿ ಹಲವು ಲೋಪ Puda

ಪುತ್ತೂರು: ಪುಡಾ ಅನುದಾನದಲ್ಲಿ ಮಯೂರ ಜಂಕ್ಷನ್‌ನಲ್ಲಿ ನಡೆಯುತ್ತಿರುವ ೫೦ ಲಕ್ಷ ರೂ. ಅಭಿವೃದ್ಧಿ ಕಾಮಗಾರಿಯ ಗುಣಮಟ್ಟವನ್ನು ಪುಡಾ ಅಧ್ಯಕ್ಷ ಅಮಳ ರಾಮಚಂದ್ರ ನೇತೃತ್ವದಲ್ಲಿ ಮಂಗಳವಾರ ಪರಿಶೀಲಿಸಲಾಯಿತು.

ಕಾಮಗಾರಿ ಆರಂಭದಲ್ಲೇ ಕಬ್ಬಿಣದ ಸರಳುಗಳನ್ನು ಸರಿಯಾಗಿ ಕಟ್ಟದಿರುವುದು, ಹಲಗೆಗಳ ನಡುವಿನ ಸೆರೆಯನ್ನು ಕಾಗದ ರಟ್ಟಿನಲ್ಲಿ ಮುಚ್ಚಿರುವುದು ಪತ್ತೆಯಾಗಿತ್ತು. ಇದನ್ನು ಪರಿಶೀಲಿಸಿದ ಪುಡಾ ಅಧಕ್ಷರು ಸರಿಪಡಿಸುವಂತೆ ತಾಕೀತು ಮಾಡಿದ್ದರು. ಆದರೆ ಈಗ ಕಾಮಗಾರಿ ಪೂರ್ಣವಾಗಿದ್ದು, ರಟ್ಟುಗಳನ್ನು ಇಟ್ಟಲ್ಲಿ ಸಿಮೆಂಟ್ ಸೋರಿಕೆಯಾಗಿರುವುದು, ಅಲ್ಲಲ್ಲಿ ಸಿಮೆಂಟ್ ಬಿದ್ದು, ಜಲ್ಲಿ ಕಾಣುತ್ತಿರುವುದು, ಕೊಳಚೆ ನೀರಿನಲ್ಲಿ ಸೋರಿಕೆಯಾದ ಸಿಮೆಂಟ್ ಗಟ್ಟಿಯಾಗಿರುವುದು ಪತ್ತೆಯಾಗಿದೆ. ಇದೆಲ್ಲವನ್ನೂ ಇಂಜಿನಿಯರ್ ಗಮನಕ್ಕೆ ತಂದು ಕಾಮಗಾರಿಯ ಗುಣಮಟ್ಟದ ಬಗ್ಗೆ ಪ್ರಶ್ನಿಸಿದರು.

ಕಾಮಗಾರಿಯಲ್ಲಿ ಹಲವು ಲೋಪ: ಅಮಳ ರಾಮಚಂದ್ರ ಮಾಧ್ಯಮಗಳೊಂದಿಗೆ ಮಾತನಾಡಿ, ಅಭಿವೃದ್ಧಿ ಕಾರ್ಯಕ್ಕೆ ಪುಡಾ ಅನುದಾನವನ್ನು ನಗರಸಭೆಗೆ ನೀಡಿದ್ದು, ಲೋಪಗಳನ್ನು ಕಾಮಗಾರಿ ಆರಂಭದಲ್ಲೇ ತಿಳಿಸಲಾಗಿತ್ತು. ಕಾಂಕ್ರೀಟ್ ಪದರದ ಹಲಗೆ ಮೇಲೆ ಪ್ಲಾಸ್ಟಿಕ್ ಶೀಟ್ ಅಳವಡಿಸುವಂತೆ ಸೂಚಿಸಲಾಗಿದೆ. ಅನೇಕ ಬಾರಿ ನೀಡಿದ ಎಚ್ಚರಿಕೆಯನ್ನೂ ಗಣನೆಗೆ ತೆಗೆದುಕೊಳ್ಳದೆ, ಕಾಮಗಾರಿ ಮುಗಿಸಲಾಗಿದೆ. ಹೀಗಾಗಿ ಗುಣಮಟ್ಟ ಪರಿಶೀಲನೆ ಮಾಡಲು ಆಗಮಿಸಲಾಗಿದೆ. ಕೆಲವು ಕಡೆ ಸಿಮೆಂಟ್‌ನಲ್ಲಿ ಸೆರೆ ಕಾಣಿಸಿದ್ದು, ಇದರಲ್ಲಿ ತೇವಾಂಶ ಗಾಳಿ ಹೋಗಿ ಕಬ್ಬಿಣ ಹಾನಿಯಾಗುತ್ತದೆ. ಸೇತುವೆ ಕುಸಿಯುವ ಸಾಧ್ಯತೆಗಳು ಹೆಚ್ಚಿದೆ. ಇದನ್ನು ಇಂಜಿನಿಯರ್‌ಗೆ ತೋರಿಸಬೇಕೆಂಬ ಕಾರಣಕ್ಕೆ ಅವರೊಂದಿಗೇ ಬಂದು ಪರಿಶೀಲಿಸಲಾಗಿದೆ ಎಂದರು.

ನಗರಸಭೆ ಇಂಜಿನಿಯರ್ ಕೃಷ್ಣಮೂರ್ತಿ ರೆಡ್ಡಿ, ಗುತ್ತಿಗೆವಹಿಸಿಕೊಂಡ ಪ್ರಮುಖರು ಹಾಜರಿದ್ದರು.

ಪುಡಾ ಸಭೆಯಲ್ಲಿ ಜಂಕ್ಷನ್ ಅಭಿವೃದ್ಧಿ ಕಾಮಗಾರಿಯ ಲೋಪಗಳ ಬಗ್ಗೆ ಚರ್ಚೆ ನಡೆದಿತ್ತು. ಈ ಸಂದರ್ಭ ಕಾಮಗಾರಿ ಪೂರ್ವದಲ್ಲೇ ಕಳಪೆ ಕಾಮಗಾರಿ ಆರೋಪ ಸರಿಯಲ್ಲ ಎಂಬ ಮಾತು ಇಂಜಿನಿಯರ್ ವಿಭಾಗದಿಂದ ಕೇಳಿ ಬಂದಿತ್ತು. ಈಗ ಕಾಮಗಾರಿ ನಡೆದು, ಎಲ್ಲೆಂದರಲ್ಲಿ ಸಿಮೆಂಟ್ ಸೋರಿಕೆಯಾಗಿ ಜಲ್ಲಿ ಕಾಣುವಂತಾಗಿದೆ.

ಕಾಮಗಾರಿಯ ಸಂದರ್ಭ ಕೊಳಚೆ ನೀರಿಗೆ ಬಿದ್ದಿದ್ದ ಸಿಮೆಂಟ್ ತೆರವು ಮಾಡುವ ಕಾರ್ಯವಾಗಿದೆ. ಹಾಗೆಂದು ಜಲ್ಲಿ ಕಾಣುವುದನ್ನು ಮರೆ ಮಾಚುವುದಕ್ಕೆ ಸಾಧ್ಯವಾಗಿಲ್ಲ. ಇದೆಲ್ಲವನ್ನೂ ಗಮನಿಸಿದರೆ ಕಾಮಗಾರಿಯಲ್ಲಿ ದೋಷವಾಗಿರುವುದು ನಿಶ್ವಿತ. ನಗರಸಭೆ ಪೌರಾಯುಕ್ತರಿಗೆ ಪತ್ರ ಬರೆದು, ಕಾಮಗಾರಿ ತಕ್ಷಣ ನಿಲ್ಲಿಸುವ ಜತೆಗೆ, ಹಣ ಪಾವತಿಸದಂತೆ ತಿಳಿಸುವುದಾಗಿ ಅಮಳ ರಾಮಚಂದ್ರ ಹೇಳಿದರು.