ಇತಿಹಾಸದಲ್ಲಿ ಕೋಳಿಅಂಕ ನಿಲ್ಲಲು ಬಿಟ್ಟಿಲ್ಲ, ಬಿಡುವುದೂ ಇಲ್ಲ- ಕೋಟಿ ಚೆನ್ನಯ್ಯರ ನುಡಿ

ಮಂಗಳೂರು: ‘ಕಂಕನಾಡಿ ಗರಡಿ ಇತಿಹಾಸದಲ್ಲಿ ಕೋಳಿಅಂಕ ನಿಲ್ಲಲು ಬಿಟ್ಟಿಲ್ಲ, ಬಿಡುವುದೂ ಇಲ್ಲ’ ಎಂದು ಕೋಟಿ ಚೆನ್ನಯ್ಯರ ಅಭಯದ ನುಡಿ ಭಕ್ತರಿಗೆ ಸಿಕ್ಕಿದೆ.

ಕಂಕನಾಡಿ ಶ್ರೀ ಬ್ರಹ್ಮ ಬೈದರ್ಕಳ ಗರಡಿ ದೈವಸ್ಥಾನದ ಸಾಂಪ್ರಾದಾಯಿಕ ಮಾನಿಚ್ಚಿಲ್‌ದರ್ಶನದ ವೇಳೆ ಕೋಟಿ ಚಿನ್ನಯರು, ಈ ಬಾರಿ ಯಾಕೆ ಕೋಳಿ ಅಂಕ ನಡೆಯಲಿಲ್ಲ? ಎಂದು ಪ್ರಶ್ನಿಸಿದ್ದು, ಪೊಲೀಸರು ತಡೆ ನೀಡಿರುವ ವಿಚಾರವನ್ನು ಕ್ಷೇತ್ರಾಡಳಿತ ತಿಳಿಸಿದೆ. ಇದಕ್ಕೆ ಪ್ರತಿಯಾಗಿ ದೈವಗಳಿಂದ ‘ಹಿಂದೆ ಕೋಳಿ ಅಂಕ ನಿಲ್ಲಲು ಬಿಟ್ಟಿಲ್ಲ, ಮುಂದೆಯೂ ಬಿಡುವುದಿಲ್ಲ ಎಂಬ ನುಡಿ ನೀಡಿದೆ.

ಕೋಳಿ ಅಂಕದ ಹೆಸರಿನಲ್ಲಿ ಜೂಜಾಟ ನಡೆಸಿದರೆ ಸಹಿಸಲಾಗದು. ಅಂಥ ಸಂದರ್ಭಗಳಲ್ಲಿ ಸಂಘಟಕರ ವಿರುದ್ಧ ಪ್ರಕರಣ ದಾಖಲಿಸಲು ಹಿಂಜರಿಯುವುದಿಲ್ಲ ಎಂದು ಕಮಿಷನರ್ ಎಚ್ಚರಿಕೆ ನೀಡಿದ್ದರು. ಸಾಂಪ್ರಾದಾಯಿಕ ಕೋಳಿ ಅಂಕಕ್ಕೆ ಸೀಮಿತ ಸಮಯ(ಕೇವಲ 3ಗಂಟೆ)ದಲ್ಲಿ ಮಾತ್ರ ನಡೆಯಬೇಕು, ಜೂಜು ರಹಿತ ಕೋಳಿ ಅಂಕ ನಡೆಯಬೇಕು, ಸೀಮಿತ ಸಮಯದಲ್ಲಿ ನಡೆಯುವ ಸಾಂಪ್ರಾದಾಯಿಕ ಕೋಳಿ ಅಂಕ ಪೊಲೀಸರ ಉಪಸ್ಥಿತಿ, ಕಣ್ಗಾವಳಿನಲ್ಲೇ ನಡೆಯಬೇಕು ಎಂಬ ಮೌಕಿಕ ಷರತ್ತಿನಲ್ಲಿ ಕಂಕನಾಡಿ ಶ್ರೀ ಬ್ರಹ್ಮ ಬೈದರ್ಕಳ ಗರಡಿ ಆಡಳಿತ ಸಮಿತಿಗೆ ಪೊಲೀಸರು ಸೂಚನೆ ನೀಡಿದ್ದರು.

ಈ ಹಿಂದೆ ಇಲ್ಲಿ 3 ದಿನಗಳ ಕಾಲ ಗೊಂದಲ ರಹಿತ ಸುಸೂತ್ರವಾಗಿ ಸಾಂಪ್ರಾದಾಯಿಕ ಕೋಳಿಅಂಕ ನಡೆಯುತ್ತಿದ್ದು, ಲಕ್ಷಕ್ಕೂ ಅಧಿಕ ಜನರು ಈ ಸಾಂಪ್ರಾದಾಯಿಕ ಕೋಳಿಅಂಕವನ್ನು ಕಣ್ತುಂಬಿಕೊಳ್ಳುತ್ತಿದ್ದರು. ಏಕಕಾಲದಲ್ಲಿ ಸಾವಿರಾರು ಜನ ಸೇರುವಿಕೆಯಲ್ಲಿ ನಡೆಯುವ ಈ ಸಾಂಪ್ರಾದಾಯಿಕ ಕೋಳಿಅಂಕವು ಈಬಾರಿ ಪೊಲೀಸರ ಷರತ್ತಿನಂತೆ ಕೇವಲ 3ಗಂಟೆ ಮಾತ್ರ ನಡೆದರೆ ಗೊಂದಲ, ನಿರ್ವಹಣೆ, ನಿಯಂತ್ರಣ ಕಷ್ಟಸಾಧ್ಯ. ಈ ಹಿನ್ನೆಲೆಯಲ್ಲಿ ಗರೋಡಿ ಆಡಳಿತ ಸಮಿತಿ ಪೊಲೀಸರ ಷರತ್ತನ್ನು ನಿರಾಕರಿಸಿದೆ.

ಕೋಳಿ ಅಂಕಕ್ಕೆ ಪೊಲೀಸರು ಅನುಮತಿ ನಿರಾಕರಿಸಿರುವ ವಿಚಾರದಲ್ಲಿ ಶ್ರೀಕ್ಷೇತ್ರ ಕುದ್ರೋಳಿ ಗೋಕರ್ಣಥೇಶ್ವರ ಕ್ಷೇತ್ರದ ಕೋಶಾಧಿಕಾರಿ ಪದ್ಮರಾಜ್ ಅವರ ಹೆಸರನ್ನು ತುಳುಕಿಹಾಕಿ ಕಲಿಯುಗ್ ಕಲ್ಕಿ ಎಂಬ ಸಾಮಾಜಿಕ ಮಾಧ್ಯಮಗಳಲ್ಲಿ ಸಾರ್ವಜನಿಕ ಶಾಂತಿ ಹಾಗೂ ಧಾರ್ಮಿಕ ಸೌಹಾರ್ದತೆಗೆ ಧಕ್ಕೆ ಉಂಟುಮಾಡುವ ಪೋಸ್ಟ್ ಹಾಕಿರುವವರ ವಿರುದ್ದ ಪ್ರಕರಣ ದಾಖಲಾಗಿದೆ. ಸಾಮಾಜಿಕ ಜಾಲತಾಣಗಳ ಮೂಲಕ ದುರುದ್ದೇಶಪೂರಿತ ಅಪಪ್ರಚಾರ ಮಾಡುವವರಿಗೆ ಬುದ್ಧಿ ನೀಡುವಂತೆ, ಹಾಗೂ ಸಮಾಜದಲ್ಲಿ ಶಾಂತಿ, ಸಹಿಷ್ಣುತೆ ಮತ್ತು ಸೌಹಾರ್ದತೆ ನೆಲೆಗೊಳ್ಳುವ ಉದ್ದೇಶದಿಂದ ಸೋಮವಾರ ಸಂಜೆ 6 ಗಂಟೆಗೆ ಕಂಕನಾಡಿ ಗರೋಡಿ ಕ್ಷೇತ್ರದಲ್ಲಿ ವಿಶೇಷ ಪ್ರಾರ್ಥನೆ ನಡೆಸಲಾಗುವುದು ಎಂದು ಕುದ್ರೋಳಿ ಕ್ಷೇತ್ರದ ಕೋಶಾಧಿಕಾರಿ ಪದ್ಮರಾಜ್ ತಿಳಿಸಿದ್ದಾರೆ.

-