ಪುತ್ತೂರು: ಬಯೋಮೆಟ್ರಿಕ್ ಹಾಜರಾತಿ ಇಲ್ಲ, ಕಚೇರಿಗಳಲ್ಲಿ ಸಿಸಿ ಕ್ಯಾಮರಾ ಇಲ್ಲ. ಮೂರು ತಿಂಗಳಿಂದ ಹೆಚ್ಚು ಪ್ರಭಾರ ಹುದ್ದೆ ಹಾಕುವುಂತಿಲ್ಲ. ನಾನ್‌ಟೆಕ್ನಿಕಲ್ ವ್ಯಕ್ತಿಗೆ ಹುದ್ದೆ ನೀಡಿ ಅಕ್ರಮ ಎಸಗಲಾಗುತ್ತಿದೆ. ಹೆಣ್ಣುಮಕ್ಕಳ ಮಾನ ಕಾಪಾಡಬೇಕು. ಪುತ್ತೂರು ಮೆಸ್ಕಾಂ ಕಚೇರಿಯಲ್ಲಿ ಭ್ರಷ್ಟಾಚಾರ ತುಂಬಿದ್ದು, ಎಸ್.ಐ.ಟಿ. ಮೂಲಕ ತನಿಖೆ ನಡೆಸಬೇಕು...
ಮೆಸ್ಕಾಂ ವತಿಯಿಂದ ಬನ್ನೂರು ಕಚೇರಿ ಸಭಾಂಗಣದಲ್ಲಿ ನಡೆದ ಪುತ್ತೂರು ನಗರ ಹಾಗೂ ಗ್ರಾಮಂತರ ಉಪವಿಭಾಗದ ವ್ಯಾಪ್ತಿಯ ಜನಸಂಪರ್ಕ ಸಭೆಯಲ್ಲಿ ಈ ಆಗ್ರಹ ವ್ಯಕ್ತವಾಯಿತು.
ಗುತ್ತಿಗೆದಾರ ಲಕ್ಷ್ಮೀನಾರಾಯಣ ಮಾತನಾಡಿ, ಅರ್ಹತೆಯಿಲ್ಲದವರಿಗೆ ಕಾಮಗಾರಿಗಳನ್ನು ನೀಡಿ ಅಪಘಾತಗಳು ನಡೆದರೆ ಇದಕ್ಕೆ ಹೊಣೆ ಯಾರು? ಉಪ್ಪಿನಂಗಡಿ ಹೆದ್ದಾರಿಯ ಬದಿಯಲ್ಲಿ ಸ್ಪನ್ ಪೋಲ್‌ಗಳು ವಾಲಿದ್ದು, ಅದಕ್ಕೆ ವ್ಯವಸ್ಥೆ ಮಾಡುವವರು ಯಾರು? ನಾಲ್ವರು ಗುತ್ತಿಗೆದಾರರ ಹೊರತು ಬೇರಾರಿಗೂ ಕಾಮಗಾರಿ ಸಿಗುತ್ತಿಲ್ಲ. ಸಿಬ್ಬಂದಿ ಕಚೇರಿಗೆ ೧೧, ೧೨ ಗಂಟೆಗೆ ಆಗಮಿಸಿದರೂ ಕೇಳುವವರಿಲ್ಲ. ಕಚೇರಿಯ ಕೆಲಸಗಳು ಬೊಳುವಾರಿನ ಹೋಟೇಲ್‌ನಲ್ಲಿ ನಡೆಯುತ್ತಿದೆ ಎಂದರು.
ವಿದ್ಯುತ್ ಗುತ್ತಿಗೆದಾರ ಸಂಘದ ಅಧ್ಯಕ್ಷ ಕೃಷ್ಣಪ್ರಶಾಂತ್ ಮಾತನಾಡಿ, ಮಳೆ ಕೊರತೆಯಿಂದ ಕೃಷಿ ಚಟುವಟಿಕೆಗೆ ಕೊಳವೆಬಾವಿಗಳ ಸಂಖ್ಯೆ ಗಣನೀಯವಾಗಿ ಹೆಚ್ಚಾಗಬಹುದಾಗಿದ್ದು, ಇದಕ್ಕೆ ಬೇಕಾದ ಪರಿವರ್ತಕಗಳನ್ನು ನೀಡಬೇಕು. ಗಂಗಾಕಲ್ಯಾಣ ಕೆಲಸ ಮಾಡಲು ಗುತ್ತಿಗೆದಾರರಿಗೆ ನಿಗದಿಪಡಿಸಿದ ಮೊತ್ತ ಹೆಚ್ಚು ಮಾಡಬೇಕು ಎಂದರು.
ಬೆದ್ರಾಳ ಪುತ್ರಮೂಲೆಯಲ್ಲಿ ಟಿಸಿ ಸಮಸ್ಯೆಯ ಕುರಿತು ೨೦೨೧ರಲ್ಲೇ ಇಲಾಖೆಯ ಗಮನಕ್ಕೆ ತರಲಾಗಿದ್ದು, ಇನ್ನೂ ಸಮಸ್ಯೆ ಬಗೆಹರಿದಿಲ್ಲ. ಚಿಕ್ಕ ಸಿಡಿಲು ಬಂದರೂ ವಿದ್ಯುತ್ ಸಂಪರ್ಕ ಇಲ್ಲದಾಗುತ್ತದೆ ಎಂದು ಗ್ರಾಹಕ ಲೀಯೊ ಆರೋಪಿಸಿದರು. ಗ್ರಾಹಕ ಸುಧಾಕರ ರಾವ್ ಆರ್ಯಾಪು ಭಾಗಕ್ಕೆ ಹೆಚ್ಚಿನ ಪವರ್‌ಮನ್‌ಗಳನ್ನು ನೀಡಬೇಕು. ಲೈನ್ ನಿರ್ವಹಣೆ, ಪೊದೆಗಳ ತೆರವುಮಾಡಬೇಕು ಎಂದರು. ಮಾಡಾವು ಭಾಗದಲ್ಲಿ ೪೦ ವರ್ಷಗಳಿಂದ ವಿದ್ಯುತ್ ತಂತಿ ಬದಲಾವಣೆಯಾಗಿಲ್ಲ ಎಂಬ ದೂರು ಕೇಳಿಬಂತು.
ಪಂಚ ಗ್ಯಾರಂಟಿ ಅನುಷ್ಠಾನ ಸಮಿತಿ ಅಧ್ಯಕ್ಷ ಉಮಾನಾಥ ಶೆಟ್ಟಿ ಪೆರ್ನೆ, ಮೆಸ್ಕಾಂ ಅಧೀಕ್ಷಕ ಇಂಜಿನಿಯರ್ ಕೃಷ್ಣರಾಜ್, ಕಾರ್ಯ ನಿರ್ವಾಹಕ ಅಭಿಯಂತ ರಾಮಚಂದ್ರ, ಸಹಾಯಕ ಕಾರ್ಯನಿರ್ವಾಹಕ ಅಭಿಯಂತ ಶಿವಶಂಕರ್ ಉಪಸ್ಥಿತರಿದ್ದರು.
ಅಧಿಕಾರಿ ಪತ್ನಿ ಹೆಸರಲ್ಲಿ ಗುತ್ತಿಗೆ!
ಪುತ್ತೂರು ಮೆಸ್ಕಾಂ ಅಧಿಕಾರಿಯೊಬ್ಬರು ತನ್ನ ಪತ್ನಿಯ ಹೆಸರಿನಲ್ಲಿ ಗುತ್ತಿಗೆ ನಡೆಸುವುದಕ್ಕೆ ಸಿ೨ ಪರವಾನಗಿಯನ್ನು ಹೊಂದಿದ್ದಾರೆ. ಮೆಸ್ಕಾಂನಲ್ಲಿ ಇದಕ್ಕೆ ಅವಕಾಶ ಇದೆಯಾ? ಈಗಾಗಲೇ ಅಧಿಕಾರಿ ಪ್ರಭಾವನ್ನು ಬಳಸಿಕೊಂಡು ಎಷ್ಟು ಕಾಮಗಾರಿಗಳನ್ನು ಈ ಗುತ್ತಿಗೆಯ ಮೂಲಕ ನಡೆಸಿದಾಗ ಉತ್ತರಿಸಲು ಅಽಕಾರಿಗಳು ತಡಕಾಡಿದರು.
ಹೆಣ್ಣುಮಕ್ಕಳ ಮಾನ ಕಾಪಾಡಿ
ಬ್ಯಾಂಕ್ ಉದ್ಯೋಗಿ ಮಹಿಳೆಯೊಬ್ಬರ ವಾಹನ ರೈಲ್ವೆ ನಿಲ್ದಾಣ ರಸ್ತೆಯಲ್ಲಿ ಸರ್ವೀಸ್ ಸ್ಟೇಷನ್ ವಾಹನಕ್ಕೆ ಡಿಕ್ಕಿಯಾಗಿದ್ದು, ಈ ಬಗ್ಗೆ ಯಾವುದೇ ಪ್ರಕರಣ ದಾಖಲಾಗಿಲ್ಲ. ಮೆಸ್ಕಾಂ ಅಧಿಕಾರಿಯೊಬ್ಬರು ಗುತ್ತಿಗೆದಾರರ ಸಹಾಯಕಿ ಯುವತಿಗೆ ದೌರ್ಜನ್ಯ ಎಸಗಿದ್ದು, ಇದನ್ನು ಮುಚ್ಚಿಹಾಕುವ ಯತ್ನವಾಗಿದೆ ಹೆಣ್ಣುಮಕ್ಕಳ ಮಾನ ಕಾಪಾಡಬೇಕು ಎಂದು ಗುತ್ತಿಗೆದಾರ ಲಕ್ಷ್ಮೀನಾರಾಯಣ ಹೇಳಿದರು. ಮೆಸ್ಕಾಂ ಸಿಬ್ಬಂದಿಯೊಬ್ಬರ ರಾಸಲೀಲೆ ಕುರಿತು ಜನಸಂಪರ್ಕ ಸಭೆಯಲ್ಲಿ ಚರ್ಚೆ ನಡೆಯಿತು.
