ವಾಸ್ತವತೆ ಅರಿಯಲು ಪರಿಶೀಲನೆ Manila

ಪುತ್ತೂರು: ಕಾಮಗಾರಿ ಸ್ಥಳದ ನೈಜ ಚಿತ್ರಣ ಸಿಗಬೇಕು. ಒಬ್ಬರು ಹೇಳುವುದು ಒಂದು, ವಾಸ್ತವತೆಯಲ್ಲಿ ಇರುವುದು ಇನ್ನೊಂದು ಆಗಬಾರದು ಈ ಕಾರಣದಿಂದ ವಾಸ್ತವತೆ ಅರಿಯುವ ನಿಟ್ಟಿನಲ್ಲಿ ಎಲ್ಲ ಕಡೆ ತೆರಳಿ ಪರಿಶೀಲನೆ ನಡೆಸಲಾಗುತ್ತಿದೆ ಎಂದು ಲೊಕೋಪಯೋಗಿ ಇಲಾಖೆ ಸಚಿವ ಸತೀಶ್ ಜಾರಕಿಹೊಳಿ ಹೇಳಿದರು. 

ಮಾಣಿಲ ಗ್ರಾಮದ ಕಾಮಜಾಲು ಪೂನಡ್ಕ ಮೂಲಕ ಕೇರಳಂಗೆ ಸಂಪರ್ಕ ಕಲ್ಪಿಸುವ ಸೇತುವೆ ನಿರ್ಮಾಣ ಸ್ಥಳ ವೀಕ್ಷಿಸಿ ಬಳಿಕ ಮಾತನಾಡಿದರು. 

ಮಂಗಳೂರು ಭಾಗದಲ್ಲಿ ಬಿಜೆಪಿ ಶಾಸಕರಿಗೆ ೭೦-೮೦ ಕೋಟಿ ರೂ. ಅನುದಾನ ನೀಡಲಾಗಿದೆ. ಯು.ಟಿ.ಖಾದರ್ ಕ್ಷೇತ್ರದಲ್ಲಿ ೨೦೦ ಕೋಟಿ ರೂ. ವೆಚ್ಚದಲ್ಲಿ ಬೈಪಾಸ್ ನಿರ್ಮಿಸಲಾಗುತ್ತಿದೆ. ಅನುದಾನ ಬಂದಿಲ್ಲ ಎಂದು ಹೇಳುವವರೇ ರಸ್ತೆಗೆ ಗುದ್ದಲಿಪೂಜೆ ಮಾಡುತ್ತಾರೆ. ಕಾಂಗ್ರೆಸ್ ಸರ್ಕಾರದಲ್ಲಿ ಸಾಕಷ್ಟು ಕೆಲಸಗಳು ನಡೆದಿವೆ ಎಂದರು. 

ಶಾಸಕ ಅಶೋಕ್ ಕುಮಾರ್ ರೈ ಮಾತನಾಡಿ, ಸಚಿವರು ಸ್ಥಳಕ್ಕೆ ಭೇಟಿ ನೀಡಿ ನೈಜಸ್ಥಿತಿ ಗಮನಿಸಿದ್ದಾರೆ. ೨೫೦ ಕೋಟಿ ರೂ. ಅನುದಾನವನ್ನು ಪುತ್ತೂರು ಭಾಗಕ್ಕೆ ನೀಡಿದ್ದಾರೆ. ಕಬಕ-ವಿಟ್ಲ ರಸ್ತೆ ೨೨ ಕೋಟಿ ರೂ. ಅನುದಾನದಲ್ಲಿ ಅಭಿವೃದ್ಧಿಯಾಗಲಿದೆ ಎಂದರು. 

ಚಿತ್ರದುರ್ಗ ಸಂಸದ ಚಂದ್ರಪ್ಪ, ವಿಟ್ಲ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಪದ್ಮನಾಭ ಪೂಜಾರಿ ಸಣ್ಣಗುತ್ತು, ಕುಕ್ಕಾಜೆ ಶ್ರೀಕೃಷ್ಣ ಗುರೂಜಿ, ಪ್ರಮುಖರಾದ ಎಂ.ಎಸ್.ಮಹಮ್ಮದ್, ಗೋಪಾಲಕೃಷ್ಣ ನಾಯಕ್ ಕಕ್ವೆ, ಶ್ರೀಧರ್ ಬಾಳೆಕಲ್ಲು, ವಿಷ್ಣು ಕುಮಾರ್, ಜಯರಾಮ್ ಬಲ್ಲಾಳ್, ಕೃಷ್ಣ ಪೂಜಾರಿ, ಗಣೇಶ್ ಭಟ್ ದೇಲಂತಮಜಲು, ವಿಷ್ಣು ಕನ್ನಡಗುಳಿ, ರಾಮಕೃಷ್ಣ ಅಡ್ಯಂತಾಯ, ಕರೀಂ ಕುದ್ದುಪದವು, ಎಲ್ಯಣ್ಣ ಪೂಜಾರಿ, ರಾಜೇಂದ್ರ ರೈ ಮತ್ತಿತರರು ಇದ್ದರು. 

ಮಾಣಿಲ ಗ್ರಾಮದ ಕಾಮಜಾಲು ಸೇತುವೆ ಸಮೀಪದಿಂದ ಸಿರಿಯ ಹೊಳೆಯವರೆಗೆ ಸಮರ್ಪಕ ರಸ್ತೆಯಿಲ್ಲದ ಕಾರಣ ಇಲ್ಲಿ ಸಚಿವರು ಸುಮಾರು ಅರ್ಧ ಕಿ.ಮೀ. ಕಾಲ್ನಡಿಗೆಯಲ್ಲಿ ಸಾಗಿ ಹೊಳೆಯ ಬಂಡೆಯ ಮೇಲೆ ಕುಳಿತು ಪರಿಸರವನ್ನು ಆಸ್ವಾದಿಸಿದರು. ಸೇತುವೆಯ ಅಗತ್ಯತೆಗಳನ್ನು ಪರಿಶೀಲಿಸಿದರು. ವಾಪಸ್ ಬರುವಾಗ ಸ್ಥಳೀಯರ ಜೀಪಿನಲ್ಲಿ ಬಂದರು.