ಮಂಗಳೂರು ರಾಷ್ಟ್ರೀಯ 39ನೇ ಅಂಡರ್ 11 ಚೆಸ್ ಚಾಂಪಿಯನ್‌ಶಿಪ್‌ಗೆ ತೆರೆ

ಓಪನ್ ವಿಭಾಗದಲ್ಲಿ ಪಶ್ಚಿಮ ಬಂಗಾಳದ ಎಫ್‌ಎಂ ಮಣಿಯ್ ಸರ್ಬರ್ಥೋ ಅತ್ಯುತ್ತಮ ಪ್ರದರ್ಶನ ನೀಡಿ 10.5 ಅಂಕಗಳೊಂದಿಗೆ ಚಾಂಪಿಯನ್ ಆಗಿ ಹೊರಹೊಮ್ಮಿದರು. ಅಂತಿಮ 11ನೇ ಸುತ್ತಿನಲ್ಲಿ ಕೇರಳದ ದೇವನಾರಾಯಣನ್ ಕಲ್ಲಿಯಾತ್ ಅವರನ್ನು ಮಣಿಸುವ ಮೂಲಕ ಪ್ರಶಸ್ತಿಯನ್ನು ಖಚಿತಪಡಿಸಿಕೊಂಡರು.

ಒಡಿಶಾದ ಸಿಎಂ ಸಾತ್ವಿಕ್ ಶ್ವೈನ್ 9.5 ಅಂಕಗಳೊಂದಿಗೆ ದ್ವಿತೀಯ ಸ್ಥಾನ ಪಡೆದರು. ಅವರು ಅಂತಿಮ ಸುತ್ತಿನಲ್ಲಿ ಉತ್ತರ ಪ್ರದೇಶದ ಅನ್ಶ್ ಕಬ್ರಾ ಅವರನ್ನು ಸೋಲಿಸಿದರು.

ಮಹಾರಾಷ್ಟ್ರದ ಎಫ್‌ಎಂ ಅದ್ವಿಕ್ ಅಮಿತ್ ಅಗರ್ವಾಲ್ 9 ಅಂಕಗಳೊಂದಿಗೆ ಮೂರನೇ ಸ್ಥಾನ ಪಡೆದರೆ, ಅದೇ ಅಂಕ ಗಳಿಸಿದ ಮಹಾರಾಷ್ಟ್ರದ ಪರ್ವ್ ಎಚ್. ಹಕಾನಿ ನಾಲ್ಕನೇ ಸ್ಥಾನ ಪಡೆದರು. ಕರ್ನಾಟಕದ ಸ್ರಗ್ವಿಧಾ ಎಸ್. 8.5 ಅಂಕಗಳೊಂದಿಗೆ ಐದನೇ ಸ್ಥಾನ ಗಳಿಸಿದರು.

ಅಂತಿಮ ಸುತ್ತಿನಲ್ಲಿ ಪಶ್ಚಿಮ ಬಂಗಾಳದ ಓಯ್ಶಿಕ್ ಮಂಡಲ್ ಅವರು ಬಿಹಾರದ ದೇವಾಂಶ್ ಕೇಶ್ರಿ ಅವರನ್ನು ಸೋಲಿಸಿದರು. ಕರ್ನಾಟಕದ ಸ್ರಗ್ವಿಧಾ ಎಸ್. ಗೋವಾದ ರಿಷಿತ್ ಗವಾಸ್ ಅವರನ್ನು ಮಣಿಸಿದರು. ಮಹಾರಾಷ್ಟ್ರದ ಅನಿಶ್ ಅಭಿಜೀತ್ ಜವಾಲ್ಕರ್ ಅವರು ತಮಿಳುನಾಡಿನ ಎಐಎಂ ಲಿಶಾಂತ್ ಬಿ. ವಿರುದ್ಧ ಗೆಲುವು ಸಾಧಿಸಿದರು. ಗುಜರಾತ್‌ನ ಧ್ಯಾನ್ ಪಟೇಲ್ ಹಾಗೂ ಮಹಾರಾಷ್ಟ್ರದ ಮೇಧಾಂಶ್ ದಿನೇಶ್ ಪೂಜಾರಿ ನಡುವಿನ ಪಂದ್ಯ ಡ್ರಾದಲ್ಲಿ ಅಂತ್ಯಗೊಂಡಿತು.

ಬಾಲಕಿಯರ ವಿಭಾಗದಲ್ಲೂ ಅಂತಿಮ ಸುತ್ತು ಕುತೂಹಲ ಮೂಡಿಸಿತು. ಕೇರಳದ ಡಬ್ಲ್ಯುಸಿಎಂ ದಿವಿ ಬಿಜೇಶ್ 9.5 ಅಂಕಗಳೊಂದಿಗೆ ರಾಷ್ಟ್ರೀಯ ಅಂಡರ್ 11 ಬಾಲಕಿಯರ ಚಾಂಪಿಯನ್‌ಶಿಪ್ ಗೆದ್ದರು.

ಅಂತಿಮ ಸುತ್ತಿನ ಪ್ರಮುಖ ಪಂದ್ಯದಲ್ಲಿ ದಿವಿ ಬಿಜೇಶ್ ಅವರು ಕರ್ನಾಟಕದ ಡಬ್ಲ್ಯುಸಿಎಂ ನಕ್ಷತ್ರ ಗುಮುದವೇಳ್ಳಿ ಅವರನ್ನು ಸೋಲಿಸಿದರು. ಈ ಗೆಲುವಿನೊಂದಿಗೆ ದಿವಿ ಪ್ರಶಸ್ತಿಯನ್ನು ತಮ್ಮದಾಗಿಸಿಕೊಂಡರು.

ದೆಹಲಿಯ ವಂಶಿಕಾ ರಾವತ್ 9 ಅಂಕಗಳೊಂದಿಗೆ ದ್ವಿತೀಯ ಸ್ಥಾನ ಪಡೆದರು. ಅವರು ಅಂತಿಮ ಸುತ್ತಿನಲ್ಲಿ ಪಂಜಾಬ್‌ನ ರಾಧ್ಯಾ ಮಲ್ಹೋತ್ರಾ ಅವರನ್ನು ಮಣಿಸಿದರು.

ಮಹಾರಾಷ್ಟ್ರದ ಎಎಫ್‌ಎಂ ಪ್ರಿಷಾ ಘೋಲಪ್ 8.5 ಅಂಕಗಳೊಂದಿಗೆ ಮೂರನೇ ಸ್ಥಾನ ಪಡೆದರು. ಅವರು ತೆಲಂಗಾಣದ ಸಯ್ಯದ್ ರೌದಾ ವಿರುದ್ಧ ಡ್ರಾ ಸಾಧಿಸಿದರು.

ಕೇರಳದ ಸಹ್ಯಾ ಕೈಲಾಸ್, ಮಹಾರಾಷ್ಟ್ರದ ಮಿಷ್ಕಾ ತ್ರಿಪಾಠಿ ಹಾಗೂ ತೆಲಂಗಾಣದ ಅನಯಾ ಶರ್ಮಾ ತಲಾ 8.5 ಅಂಕ ಗಳಿಸಿ ಕ್ರಮವಾಗಿ ಐದು, ಆರು ಮತ್ತು ಏಳನೇ ಸ್ಥಾನ ಪಡೆದರು.

ಅಂತಿಮ ಸುತ್ತಿನಲ್ಲಿ ಸಹ್ಯಾ ಕೈಲಾಸ್ ಅವರು ತಮಿಳುನಾಡಿನ ಡೆನಿಯಾ ವಿ. ಅವರನ್ನು, ಮಿಷ್ಕಾ ತ್ರಿಪಾಠಿ ಅವರು ತಮಿಳುನಾಡಿನ ಶ್ರೀಯಾ ಎಸ್. ಅವರನ್ನು ಸೋಲಿಸಿದರು. ಯಕ್ಷಿಣಿ ಪಿ. ಅವರು ತೆಲಂಗಾಣದ ವಂಶಿಕಾ ಬೋಗಾ ವಿರುದ್ಧ ಗೆಲುವು ಸಾಧಿಸಿದರು. ತಮಿಳುನಾಡಿನ ಹರ್ಷಿಕಾ ಎಂ. ಅವರು ಪಶ್ಚಿಮ ಬಂಗಾಳದ ಉಪಧೃತಿ ಭಟ್ಟಾಚಾರ್ಯ ಅವರನ್ನು ಮಣಿಸಿದರು. ಮಹಾರಾಷ್ಟ್ರದ ಡಬ್ಲ್ಯುಸಿಎಂ ಅನ್ವಿ ದೀಪಕ್ ಹಿಂಗೆ ಅವರು ಕರ್ನಾಟಕದ ಎಸಿಎಂ ನಿಯೋಲಾ ಪಿಂಟೊ ವಿರುದ್ಧ ಜಯ ಗಳಿಸಿದರು.

ಚಾಂಪಿಯನ್‌ಶಿಪ್‌ನ ಸಮಾರೋಪ ಸಮಾರಂಭದಲ್ಲಿ ವಿಜೇತರಿಗೆ ಬಹುಮಾನ ವಿತರಿಸಲಾಯಿತು. ಕರ್ನಾಟಕ ರಾಜ್ಯ ಚೆಸ್ ಸಂಸ್ಥೆಯ ಖಜಾಂಚಿ ಐಎ ವಸಂತ್ ಭ, ಅಫಿಲ್ಯಾಂಕ್ ಸೊಲ್ಯೂಷನ್ಸ್ ಸಂಸ್ಥಾಪಕ ಅವಿನಾಶ್ ಶೆಟ್ಟಿ, ನಿವ್ಸ್ ಸೊಲ್ಯೂಷನ್ಸ್‌ನ ಹಿರಿಯ ವ್ಯವಸ್ಥಾಪಕ ಹರಿಪ್ರಸಾದ್ ಪಾಂಗಲ್, ದಕ್ಷಿಣ ಕನ್ನಡ ಚೆಸ್ ಅಸೋಸಿಯೇಷನ್ ಅಧ್ಯಕ್ಷೆ ಡಾ. ಅಮರಶ್ರೀ ಅಮರನಾಥ ಶೆಟ್ಟಿ, ಕೆಎಸ್‌ಸಿಎ ಅಧ್ಯಕ್ಷ ಟಿ.ಎನ್. ಮಧುಕರ್, ಉಪಾಧ್ಯಕ್ಷ ರಮೇಶ್ ಕೋಟೆ ಹಾಗೂ ಕಾಮನ್‌ವೆಲ್ತ್ ಚೆಸ್ ಅಸೋಸಿಯೇಷನ್ ಅಧ್ಯಕ್ಷ ಭರತ್ ಸಿಂಗ್ ಚೌಹಾಣ್ ಉಪಸ್ಥಿತರಿದ್ದರು. ದೇಶದ ವಿವಿಧ ಭಾಗಗಳಿಂದ ಆಗಮಿಸಿದ್ದ ಕಿರಿಯ ಆಟಗಾರರಿಗೆ ರಾಷ್ಟ್ರೀಯ ಮಟ್ಟದಲ್ಲಿ ತಮ್ಮ ಸಾಮರ್ಥ್ಯವನ್ನು ಪ್ರದರ್ಶಿಸಲು ಮಂಗಳೂರು ವೇದಿಕೆಯಾಯಿತು.