ಉಪ್ಪಿನಂಗಡಿ ಗ್ರಾಮದ ಕಜೆಕ್ಕಾರ್ ಎಂಬಲ್ಲಿನ ಭಾಗಿ(40) ಎಂಬುವರ ಮನೆ ಸರ್ಕಾರಿ ವ್ಯವಸ್ಥೆಯ ನೈಜತೆಯನ್ನು ಅನಾವರಣಗೊಳಿಸುವಂತಿದೆ. ಈ ಶೋಷಿತ ಸಮುದಾಯದ ಉದ್ಧಾರಕ್ಕೆಂದೇ ಸಮಾಜ ಕಲ್ಯಾಣ ಇಲಾಖೆ ಇದೆ. ಪ್ರತಿ ಬಜೆಟ್ನಲ್ಲಿಯೂ ಕೋಟ್ಯಂತರ ರೂ. ಹಣ ಮೀಸಲಿಸಲಾಗುತ್ತಿದೆ. ಆದರೆ ದಾಖಲೆ, ಪತ್ರಿಕೆಗಳಲ್ಲಿ ಕಾಣಸಿಗುವ ಸವಲತ್ತು ಇಂತಹ ಬಡ ಅರ್ಹ ಮಂದಿಗೆ ಲಭಿಸುತ್ತಿಲ್ಲ ಎನ್ನುವುದೇ ವಿಪರ್ಯಾಸ. ಸ್ಥಳೀಯ ಗ್ರಾಪಂನಿಂದ ಒದಗಿಸಿದ ನೀರಿನ ಟ್ಯಾಂಕ್ ಹೊರತುಪಡಿಸಿದರೆ ಈ ಮಹಿಳೆಯ ಮನೆಯಲ್ಲಿ ಹೇಳಿಕೊಳ್ಳುವ ಯಾವ ವ್ಯವಸ್ಥೆಯೂ ಇಲ್ಲ. ಮನೆಗೆ ಟಾರ್ಪಾಲು ಹೊದಿಕೆ, ಟಾರ್ಪಾಲು ಗೋಡೆ, ಬ್ಯಾನರ್ ಒಂದನ್ನು ಬಾಗಿಲು ಮಾಡಿಕೊಂಡು ಜೀವನ ನಡೆಸುತ್ತಿದ್ದಾರೆ.
