ಎಂಡೋ ಸಂತ್ರಸ್ತರಿಗಿಲ್ಲ ಸವಲತ್ತು : ತಾಯಂದಿರ ಕಣ್ಣೀರ ಪ್ರಶ್ನೆಗೆ ಲಭಿಸದ ಉತ್ತರ : 1,031 ಮಂದಿಯ ಸ್ಥಿತಿ ಅತಂತ್ರ

ತಜ್ಞ ವೈದ್ಯಕೀಯ ತಂಡದಿಂದ ತಪಾಸಣೆಗೊಳಪಟ್ಟು ಎಂಡೋಸಲ್ಫಾನ್ ಸಂತ್ರಸ್ತರ ಪಟ್ಟಿಗೆ ಸೇರ್ಪಡೆಗೊಳಿಸಲು ಬಾಕಿ ಉಳಿದಿರುವ ಹೆಸರನ್ನು ತಕ್ಷಣ ಸೇರ್ಪಡೆಗೊಳಿಸಿ ಅಗತ್ಯ ವೈದ್ಯಕೀಯ ಸವಲತ್ತು ಒದಗಿಸುವಂತೆ ಸಂತ್ರಸ್ತರ ತಾಯಂದಿರ ಕೂಗು ಮತ್ತೆ ಮುನ್ನೆಲೆಗೆ ಬಂದಿದೆ.

ಎಂಡೋಸಲ್ಫಾನ್ ದುಷ್ಪರಿಣಾಮ ಪೀಡಿತರನ್ನು ಗುರುತಿಸುವ ನಿಟ್ಟಿನಲ್ಲಿ 2017ರಲ್ಲಿ ನಡೆಸಿದ ವಿಶೇಷ ವೈದ್ಯಕೀಯ ಶಿಬಿರದಲ್ಲಿ ಗುರುತಿಸಲಾದ 1,031 ಮಂದಿಯನ್ನು ಕಾಸರಗೋಡು ಪ್ಯಾಕೇಜ್‌ನಲ್ಲಿ ಸೇರ್ಪಡೆಗೊಳಿಸುವುದರ ಜತೆಗೆ ಅವರಿಗೆ ವೈದ್ಯಕೀಯ ಸವಲತ್ತು ಒದಗಿಸುವ ಬಗ್ಗೆ ಸಿಎಂ ಪಿಣರಾಯಿ ವಿಜಯನ್ ವಿಧಾನಸಭೆಯಲ್ಲಿ ನೀಡಿದ ಘೋಷಣೆ ಈವರೆಗೆ ಪಾಲನೆಯಾಗಿಲ್ಲ.

2024 ಜುಲೈ 10ರಂದು ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ವಿಧಾನಸಭೆಯಲ್ಲಿ ಘೋಷಣೆ ಮಾಡಿ ಒಂದೂವರೆ ವರ್ಷ ಕಳೆದರೂ ಈವರೆಗೆ ಉಚಿತ ಚಿಕಿತ್ಸೆ ಲಭ್ಯವಾಗಿಲ್ಲ. ಈ ಬಗ್ಗೆ ಜಿಲ್ಲಾಧಿಕಾರಿ ಕಚೇರಿಯಲ್ಲಿ ಸಂತ್ರಸ್ತರ ತಾಯಂದಿರು, ಅಸೌಖ್ಯ ಪೀಡಿತ ಮಕ್ಕಳ ಪ್ರತಿಭಟನೆ ನಂತರ ಸಚಿವ ಸಂಪುಟ ಸಭೆ ಮತ್ತೊಂದು ನಿರ್ಧಾರ ತೆಗೆದುಕೊಂಡು ಅರ್ಹ 1,031 ಮಂದಿ ಸಂತ್ರಸ್ತರಿಗೆ ಸವಲತ್ತು ನೀಡಲು ನಿರ್ಧಾರ ಕೈಗೊಂಡಿತ್ತು. ಸಂತ್ರಸ್ತರ ಪಟ್ಟಿಯಲ್ಲಿ ಒಳಗೊಂಡಿದ್ದ ಎಲ್ಲ 1,031 ಮಂದಿಗೆ ಸವಲತ್ತು ನೀಡುವುದಾಗಿ ಭರವಸೆ ನೀಡಲಾಗಿತ್ತು. ಇದಕ್ಕಾಗಿ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಕಾಸರಗೋಡು ಪ್ಯಾಕೇಜ್‌ನಲ್ಲಿ ಒಳಪಡಿಸಿ ಸಹಾಯ ಒದಗಿಸುವುದಾಗಿ ತಿಳಿಸಿರುವುದಲ್ಲದೆ ವಿಧಾನಸಭೆಯಲ್ಲೂ ಭರವಸೆ ನೀಡಿದ್ದರು.

2017ರ ಏ.5ರಿಂದ 9ರವರೆಗೆ ಜಿಲ್ಲೆಯ 5 ಕೇಂದ್ರಗಳಲ್ಲಿ ನಡೆದ ತಜ್ಞ ವೈದ್ಯರನ್ನೊಳಗೊಂಡ ವಿಶೇಷ ವೈದ್ಯಕೀಯ ಶಿಬಿರದಿಂದ 1,905 ಜನರನ್ನು ತಪಾಸಣೆಗೊಳಪಡಿಸಿ, ಅವರನ್ನು ಸಂತ್ರಸ್ತರ ಪಟ್ಟಿಯಲ್ಲಿ ಸೇರ್ಪಡೆಗೊಳಿಸಿರುವುದಾಗಿ ಎಂಡೋಸಲ್ಫಾನ್ ಸೆಲ್‌ನ ಅಂದಿನ ಸಹಾಯಕ ಜಿಲ್ಲಾಧಿಕಾರಿ ಸ್ಪಷ್ಟಪಡಿಸಿದ್ದರು. ನಂತರ ಸಕಾರಣವಿಲ್ಲದೆ ಈ ಸಂಖ್ಯೆಯನ್ನು 287ಕ್ಕೆ ಕಡಿತಗೊಳಿಸಲಾಗಿತ್ತು. ಈ ಸಂದರ್ಭ ಪೀಪಲ್ಸ್ ್ರಂಟ್ ನೇತೃತ್ವದಲ್ಲಿ ನಡೆದ ಹೋರಾಟದ ಹಿನ್ನೆಲೆಯಲ್ಲಿ 76 ಮಂದಿ ಸಂತ್ರಸ್ತರನ್ನು ಪಟ್ಟಿಗೆ ಸೇರ್ಪಡೆಗೊಳಿಸಲಾಗಿದೆ. ಬಾಕಿ ಉಳಿದ ಎಲ್ಲ ಸಂತ್ರಸ್ತರನ್ನು ಪಟ್ಟಿಗೆ ಸೇರ್ಪಡೆಗೊಳಿಸುವಂತೆ 2019 ಜ.30ರಂದು ರಾಜ್ಯ ಸೆಕ್ರೆಟರಿಯೇಟ್ ಮುಂದೆ ತಾಯಂದಿರು ಉಪವಾಸ ಸತ್ಯಾಗ್ರಹ ಆರಂಭಿಸಿದ್ದರು. ಮುಖ್ಯಮಂತ್ರಿ ಜತೆಗಿನ ಚರ್ಚೆಯಲ್ಲಿ 18 ವರ್ಷದೊಳಗಿನ ಮಕ್ಕಳನ್ನು ಸೇರಿಸಿಕೊಳ್ಳಲು, ಉಳಿದವರ ವೈದ್ಯಕೀಯ ದಾಖಲೆ ಪರಿಶೀಲಿಸಲು ನಿರ್ಧರಿಸಲಾಗಿತ್ತು. 18 ವರ್ಷದೊಳಗಿನ 511 ಮಕ್ಕಳನ್ನು ಪಟ್ಟಿಯಲ್ಲಿ ಸೇರಿಸಲಾಗಿದ್ದರೂ, ಉಳಿದ 1,031 ಜನರ ಬಗ್ಗೆ ಯಾವುದೇ ನಿರ್ಧಾರ ತೆಗೆದುಕೊಳ್ಳಲಾಗಿಲ್ಲ.

ಕಾಞಂಗಾಡು ಮಿನಿ ಸಿವಿಲ್ ಸ್ಟೇಶನ್ ವಠಾರದಲ್ಲಿ ತಾಯಂದಿರು ಹಲವು ತಿಂಗಳ ಕಾಲ ನಡೆಸಿದ್ದ ಧರಣಿಯಲ್ಲಿ ಜಿಲ್ಲೆಯ ಶಾಸಕರು ಪಾಲ್ಗೊಂಡು ಮುಖ್ಯಮಂತ್ರಿ, ಪ್ರತಿಭಟನಾಕಾರರ ನಡುವೆ ಮಾತುಕತೆಗೆ ವೇದಿಕೆ ಸಿದ್ಧಪಡಿಸಿದ ಪರಿಣಾಮ 1,031 ಮಂದಿಯನ್ನು ಸಂತ್ರಸ್ತರ ಪಟ್ಟಿಗೆ ಸೇರ್ಪಡೆಗೊಳಿಸಲು ಅಗತ್ಯ ಕ್ರಮ ತೆಗೆದುಕೊಳ್ಳಲಾಗುವುದು ಎಂದು ಮುಖ್ಯಮಂತ್ರಿ ಭರವಸೆ ನೀಡಿದ್ದರು. ಈ ಹಿನ್ನೆಲೆಯಲ್ಲಿ ಕಾಞಂಗಾಡ್‌ನಲ್ಲಿ ಹಲವು ತಿಂಗಳ ಕಾಲ ನಡೆದ ಅನಿರ್ದಿಷ್ಟಾವಧಿ ಮುಷ್ಕರ ಹಿಂತೆಗೆದುಕೊಳ್ಳಲಾಗಿತ್ತು. ಆದರೆ ಈ ಭರವಸೆಯೆಲ್ಲ ಸುಳ್ಳಾಗಿದೆ.