ಬಾನಂಗಳದಿ ಬಣ್ಣಗಳ ಪಟಪಟ ಅಂತಾರಾಷ್ಟ್ರೀಯ ಗಾಳಿಪಟ ಉತ್ಸವ

ತಣ್ಣೀರುಬಾವಿ ಕಡಲ ತೀರದಲ್ಲಿ ಶನಿವಾರ ಜಗತ್ತಿನ ವಿವಿಧ ರಾಷ್ಟ್ರ ಹಾಗೂ ಭಾರತದ ವಿವಿಧ ರಾಜ್ಯಗಳ ಸಾಂಪ್ರದಾಯಿಕ, ಏರೋಫಾಯಿಲ್, ಇನ್‌ಪ್ಲೇಟಬಲ್, ಕ್ವಾಡ್‌ಲೈನ್ ಸ್ಪೋರ್ಟ್ ಗಾಳಿಪಟ ಸೇರಿದಂತೆ ವೈವಿಧ್ಯಮಯ ವರ್ಣರಂಜಿತ ಗಾಳಿಪಟಗಳು ಪ್ರವಾಸಿಗರ ಮನಸೂರೆಗೊಂಡಿತು.

ಬೃಹತ್ ಗಾತ್ರದ ಹನುಮಂತ, ಸ್ಪೈಡರ್ ಮನ್, ವಿವಿಧ ಮೀನುಗಳು, ಯಕ್ಷಗಾನದ ಮುಖವರ್ಣಿಕೆ, ಕಾರ್ಟೂನ್ ಪಾತ್ರಗಳನ್ನು ನೆನಪಿಸುವ ಗಾಳಿಪಟಗಳು ಮುಸ್ಸಂಜೆ ವೇಳೆ ಕಡಲ ತೀರಕ್ಕೆ ಆಗಮಿಸಿದ ಜನರಿಗೆ ಮುದ ನೀಡಿದವು. ಸುಯ್ಯನೆ ಗಾಳಿಯಲ್ಲಿ ಚುರುಕಾಗಿ ಓಡಾಡುವ ಭಾರಿ ಉದ್ದದ ಹಾವಿನಾಕಾರದ ಗಾಳಿಪಟವಂತೂ ಪುಟಾಣಿಗಳನ್ನು ಹೆಚ್ಚು ಸೆಳೆಯಿತು.

ಕರಾವಳಿ ಉತ್ಸವ ಅಂಗವಾಗಿ ಟೀಮ್ ಮಂಗಳೂರು, ಹವ್ಯಾಸಿ ಗಾಳಿಪಟ ತಂಡವು ಒಎನ್‌ಜಿಸಿ-ಎಂಆರ್‌ಪಿಎಲ್ ಹಾಗೂ ಇತರ ಖಾಸಗಿ ಸಂಸ್ಥೆಗಳ ಪ್ರಾಯೋಜಕತ್ವದಲ್ಲಿ ಜಿಲ್ಲಾಡಳಿತದ ಸಹಕಾರದೊಂದಿಗೆ ತಣ್ಣೀರುಬಾವಿ ಕಡಲ ತೀರದಲ್ಲಿ ಆಯೋಜಿಸಿದ 9ನೇ ವರ್ಷದ ಎರಡು ದಿನಗಳ (ಜ.18ರ ತನಕ) ಅಂತಾರಾಷ್ಟ್ರೀಯ ಗಾಳಿಪಟ ಉತ್ಸವ ಶನಿವಾರ ಉದ್ಘಾಟನೆಗೊಂಡಿತು.

ಇಂಗ್ಲೆಂಡ್, ಜರ್ಮನಿ, ನೆದರ್‌ಲ್ಯಾಂಡ್, ಸ್ಲೋವೆನಿಯಾ, ಇಟಲಿ, ಇಸ್ಟೊನಿಯಾ, ಸ್ವೀಡನ್, ಇಂಡೋನೇಷ್ಯಾ, ಪೋರ್ಚುಗಲ್ ಮೊದಲಾದ ವಿದೇಶಿ ಗಾಳಿಪಟ ತಂಡಗಳು ಹಾಗೂ ಒಡಿಶಾ, ರಾಜಸ್ಥಾನ, ಮಹಾರಾಷ್ಟ್ರ, ತೆಲಂಗಾನ, ಕೇರಳ, ಗುಜರಾತ್ ಮೊದಲಾದ ರಾಜ್ಯಗಳಿಂದ ಗಾಳಿಪಟ ತಂಡಗಳು ಭಾಗವಹಿಸಿವೆ. 30 ಅಂತರಾಷ್ಟ್ರೀಯ ಸಹಿತ 60ಕ್ಕೂ ಅಧಿಕ ಮಂದಿ ಗಾಳಿಪಟುಗಳು ಪಾಲ್ಗೊಂಡಿದ್ದಾರೆ.

ಗಾಳಿಪಟ ಉತ್ಸವಕ್ಕೆ ವಿವಿಧ ರಾಷ್ಟ್ರಗಳ ಪ್ರತಿನಿಧಿಗಳು ಹಾಗೂ ಸ್ಥಳೀಯರಿಂದ ಅತ್ಯುತ್ತಮ ಸಂ್ಪದನೆ ದೊರೆತಿದೆ. ಭಾನುವಾರ ಗರಿಷ್ಠ ಸಂಖ್ಯೆಯ ಜನರು ಈ ಅಪರೂಪದ ಕ್ಷಣಗಳಿಗೆ ಸಾಕ್ಷಿಯಾಗುವ ನಿರೀಕ್ಷೆ ಹೊಂದಲಾಗಿದೆ. ಆಕಾಶದಲ್ಲಿ ಹಾರುವ ವೈವಿಧ್ಯಮಯ ಗಾಳಿಪಟಗಳ ಕೆಳಗೆ ನಾವು ನಿಲ್ಲುವ ಕ್ಷಣ ಏಕತಾ ಭಾವನೆ ತುಂಬುತ್ತದೆ ಎಂದು ಟೀಮ್ ಮಂಗಳೂರಿನ ಸರ್ವೇಶ್ ರಾವ್ ತಿಳಿಸಿದರು.

ಅಂತಾರಾಷ್ಟ್ರೀಯ ಗಾಳಿಪಟ ಉತ್ಸವಕ್ಕೆ ವಿಧಾನಸಭೆ ಸ್ಪೀಕರ್ ಯು.ಟಿ.ಖಾದರ್ ಚಾಲನೆ ನೀಡಿದರು. ಮಂಗಳೂರಿನಲ್ಲಿ ನಡೆಯುತ್ತಿರುವ ಕರಾವಳಿ ಉತ್ಸವ ಯಶಸ್ವಿಯಾಗಿ ವೈವಿಧ್ಯಮಯ ಕಾರ್ಯಕ್ರಮಗಳೊಂದಿಗೆ ನಡೆಯುತ್ತಿದೆ. ದೇಶ ವಿದೇಶಗಳಿಂದ ಪ್ರವಾಸಿಗರು, ಸಾರ್ವಜನಿಕರು ಆಗಮಿಸುತ್ತಿದ್ದಾರೆ. ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು 2 ಕೋಟಿ ರೂ. ಅನುದಾನ ಒದಗಿಸಿದ್ದು, ಇಂತಹ ಉತ್ಸವ ಮುಂದೆಯೂ ಯೋಜಿಸಲು ಪ್ರೇರಣೆ ದೊರಕಿದೆ ಎಂದರು.

ವಿಧಾನ ಪರಿಷತ್ ಶಾಸಕ ಐವನ್ ಡಿಸೋಜ, ಜಿಲ್ಲಾಧಿಕಾರಿ ದರ್ಶನ್ ಎಚ್.ವಿ., ಜಿಪಂ ಸಿಇಒ ನರ್ವಾಡೆ ವಿನಾಯಕ ಕಾರ್ಬಾರಿ ಹಾಗೂ ಇತರ ಹಿರಿಯ ಅಧಿಕಾರಿಗಳು ಇದ್ದರು.