ಬಹುಗ್ರಾಮಕ್ಕೆ ರಸ್ತೆ, ಚರಂಡಿ ಆಹುತಿ ALIKE

ಪುತ್ತೂರು: ಬಹುಗ್ರಾಮ ಕುಡಿಯುವ ನೀರಿನ ಯೋಜನೆ ಅನುಷ್ಠಾನದಲ್ಲಿ ಸರ್ಕಾರಿ ಅಧಿಕಾರಿಗಳು ಕರ್ತವ್ಯಲೋಪ ಎಸಗುತ್ತಿದ್ದಾರೆಂದು ಲೋಕಾಯುಕ್ತದಲ್ಲಿ ಪ್ರಕರಣ ದಾಖಲಾದರೂ ಅಧಿಕಾರಿಗಳು ಕ್ಯಾರೇ ಎನ್ನುತ್ತಿಲ್ಲ. ರಸ್ತೆ, ಚರಂಡಿ ಸೇರಿ ಸಾರ್ವಜನಿಕ ಸೊತ್ತುಗಳು ಮತ್ತೆ ಮತ್ತೆ ಬಹುಗ್ರಾಮ ಯೋಜನೆಯ ಕಾಮಗಾರಿಗೆ ಆಹುತಿಯಾಗುತ್ತಿದ್ದು, ಇದನ್ನು ದುರಸ್ತಿ ಮಾಡುವವರು ಯಾರೆಂಬ ಪ್ರಶ್ನೆ ಮೂಡುತ್ತಿದೆ. ಈ ಬಗ್ಗೆ ದೂರು ನೀಡಿದರೂ, ಅಽಕಾರಿ ವರ್ಗ ತನಗೂ ಅದಕ್ಕೂ ಸಂಬಂಧವೇ ಇಲ್ಲದಂತೆ ವರ್ತಿಸುತ್ತಿದೆ.

ಅಸಮರ್ಪಕ ಕಾಮಗಾರಿ: ತಾಲೂಕಿನ ಕೆಲವು ಗ್ರಾಮದಲ್ಲಿ ಕಳೆದ ವರ್ಷ ನಡೆಸಿದ ಅಸಮರ್ಪಕ ಕಾಮಗಾರಿಯನ್ನು ಲೋಕಾಯುಕ್ತ ಅಧಿಕಾರಿಗಳು ತನಿಖೆಯ ಸಂದರ್ಭ ಪರಿಶೀಲನೆ ನಡೆಸಿದ್ದಾರೆ. ಆದರೆ ಅದೇ ಸಮಸ್ಯೆಗಳು ಮತ್ತೆ ನಡೆಯುತ್ತಿದ್ದರೂ ಸರಿಪಡಿಸಬೇಕಾದ ಅಽಕಾರಿಗಳು ಇತ್ತ ತಲೆಹಾಕುತ್ತಿಲ್ಲ. ಸ್ಥಳದಲ್ಲಿ ಜೆಸಿಬಿ ಆಪರೇಟರ್ ಹಾಗೂ ಆತನ ಸಹಾಯಕ ಮಾಡಿದ್ದೇ ಕೆಲಸ ಎಂಬಂಥ ಪರಿಸ್ಥಿತಿ ನಿರ್ಮಾಣವಾಗಿದೆ.

ಗುತ್ತಿಗೆ ಕಂಪನಿಯು ಕಾಮಗಾರಿ ನಡೆಯುವ ಸ್ಥಳಗಳಲ್ಲಿ ಅಪಾಯದ ಪ್ಲಾಸ್ಟಿಕ್ ಟೇಪ್‌ಗಳನ್ನು ಬಳಸಿ ಬಳಿಕ ಅಲ್ಲೇ ಎಸೆದು ಹೋಗುತ್ತಿದ್ದಾರೆ. ಕಾರ್ಮಿಕರಿಗೆ ಊಟ, ತಿಂಡಿ ಪಾರ್ಸಲ್ ಸರ್ವಿಸ್ ನೀಡಿ ಅದರ ತಟ್ಟೆ, ಪ್ಲಾಸ್ಟಿಕ್ ತೊಟ್ಟೆಗಳನ್ನು ರಸ್ತೆಯ ಬದಿ, ಮರದ ಬುಡಗಳಿಗೆ ಎಸೆಯಲಾಗುತ್ತಿದೆ. ಸರ್ಕಾರಿ ಕಾಮಗಾರಿಯನ್ನು ನಡೆಸುವ ಸಂದರ್ಭವೇ ಪ್ಲಾಸ್ಟಿಕ್ ವಸ್ತುಗಳಿಗೆ ಸೂಕ್ತ ವ್ಯವಸ್ಥೆ ಮಾಡದ ಇಲಾಖೆಗಳು ಸ್ವಚ್ಛ ಭಾರತದ ಬಗ್ಗೆ ಜನರಿಗೆ ಕಾರ್ಯಾಗಾರಗಳನ್ನು ನಡೆಸುವ ದುಸ್ಥಿತಿಯಿದೆ.

ಜಿಲ್ಲಾ ಹಾಗೂ ತಾಲೂಕುಮಟ್ಟದ ಅಧಿಕಾರಿಗಳು ಕಾಮಗಾರಿ ನಡೆಯುವ ಸ್ಥಳಕ್ಕಾಗಮಿಸದೆ ಕರ್ತವ್ಯಲೋಪ ಎಸಗುತ್ತಿದ್ದಾರೆ. ಗ್ರಾಮಮಟ್ಟದ ಅಧಿಕಾರಿಗಳು ಸಮರ್ಪಕ ಕಾಮಗಾರಿ ನಡೆಯುತ್ತಿಲ್ಲ ಎಂದರೂ ಗುತ್ತಿಗೆದಾರರಿಂದ ಸರಿಯಾಗಿ ಅನುಷ್ಠಾನವಾಗುತ್ತಿಲ್ಲ. ಲಕ್ಷಾಂತರ ರೂಪಾಯಿ ವ್ಯಯಿಸಿ ನಡೆದ ರಸ್ತೆ ಕಾಮಗಾರಿಗಳು ಕ್ಷಣಾರ್ಧದಲ್ಲಿ ಆಹುತಿಯಾಗುತ್ತಿವೆ. ಬಹುಗ್ರಾಮ ಯೋಜನೆಗಾಗಿ ರಸ್ತೆ ಬದಿ ಅಗೆದು ಬಳಿಕ ದುರಸ್ತಿ ಕಾರ್ಯವನ್ನು ಗುತ್ತಿಗೆ ಕಂಪನಿ ಮಾಡದ ಕಾರಣ ಜನ ಸಾಮಾನ್ಯರು ವರ್ಷಾನುಗಟ್ಟಲೆ ಮುಂದಿನ ಅನುದಾನಕ್ಕಾಗಿ ಕಾಯುವಂತಾಗುತ್ತಿದೆ.

ಕಲ್ಲಡ್ಕ- ವಿಟ್ಲ ರಸ್ತೆ ಇತ್ತೀಚೆಗೆ ಮರು ಡಾಂಬರೀಕರಣಗೊಂಡು ವಾಹನ ಸವಾರರಿಗೆ ನೆಮ್ಮದಿಯನ್ನು ನೀಡುತ್ತಿದ್ದರೆ, ಈಗ ಬಹುಗ್ರಾಮ ಯೋಜನೆಗಾಗಿ ರಸ್ತೆಯ ಬದಿ ಅಗೆದು ಪೈಪ್ ಅಳವಡಿಸಿ ಬಳಿಕ ಅಗೆದ ಮಣ್ಣನ್ನು ಸರಿಯಾಗಿ ಹಾಕಿ ಗಟ್ಟಿ ಮಾಡದಿರುವ ಕಾರಣ ರಸ್ತೆಯ ಬದಿ ಕಿತ್ತು ಹೋಗಲು ಪ್ರಾರಂಭವಾಗಿದೆ. ಇದೇ ರೀತಿಯಲ್ಲಿ ಮಜಿ ಓಣಿ ಕೋಡಪದವು ರಸ್ತೆಯನ್ನು ಅಗೆದು ಹಾನಿಗೊಳಿಸಲಾಗಿದೆ. ಒಳ ರಸ್ತೆಗಳ ಮಧ್ಯಕ್ಕೆ ಮಣ್ಣು ಸುರಿದು, ಬಳಿಕ ಜೆಸಿಬಿಯಿಂದ ಈ ಮಣ್ಣನ್ನು ತೆರವು ಮಾಡುವ ವೇಳೆ ರಸ್ತೆಯ ಮೇಲ್ಪದರ ಕಿತ್ತು ಬರುತ್ತಿದೆ.

೨೦೨೫ರಲ್ಲಿ ಬಹುಗ್ರಾಮ ಯೋಜನೆಯ ಪೈಪ್‌ಲೈನ್ ಕಾಮಗಾರಿ ಮಾರ್ಚ್, ಏಪ್ರಿಲ್ ತಿಂಗಳಲ್ಲಿ ನಡೆದಿದ್ದು ನಂತರ ಸುರಿದ ಮಳೆಗೆ ರಸ್ತೆ ಕೆಸರು ಮಯವಾಗಿ, ಚರಂಡಿಗಳ ಮಣ್ಣು ತಗ್ಗುಪ್ರದೇಶಕ್ಕೆ ನುಗ್ಗಿ ಜನಜೀವನಕ್ಕೆ ಸಮಸ್ಯೆಯಾಗಿ ಪರಿಣಮಿಸಿತ್ತು. ಆ ಬಳಿಕ ಕಾಮಗಾರಿ ಸ್ಥಗಿತಗೊಂಡಿತ್ತು. ಈ ವರ್ಷವೂ ಮಳೆ ಬರುವ ಸಂದರ್ಭದಲ್ಲಿ ಕೆಲವು ಚರಂಡಿಗಳನ್ನು, ಮುಖ್ಯ ರಸ್ತೆಗಳ ಬದಿಯನ್ನು ಅಗೆಯುವುದಕ್ಕೆ ಪ್ರಾರಂಭಿಸಿದ್ದಾರೆ. ಇನ್ನು ಮಳೆಗಾಲದಲ್ಲಿ ಕಾಮಗಾರಿಯ ಪರಿಣಾಮವನ್ನು ಜನಸಾಮಾನ್ಯರು ಅನುಭವಿಸಬೇಕಾಗಿದೆ.

ಕಾಂಕ್ರೀಟ್ ಅಥವಾ ಡಾಂಬರು ರಸ್ತೆಯ ಅಂಚಿನಲ್ಲೇ ಚರಂಡಿ ಅಗೆಯಲಾಗುತ್ತಿದೆ. ಗುತ್ತಿಗೆ ಕಂಪನಿಗೆ ವಿಧಿಸಿದ ಷರತ್ತುಗಳನ್ವಯ ಹಿಂದಿನ ರೀತಿಯಲ್ಲೇ ಕಾಮಗಾರಿ ಮಾಡಿಕೊಂಡಬೇಕೆಂಬ ನಿಯಮ ಇದ್ದರೂ, ಮಳೆ ನೀರು ಹರಿದು ಹೋಗುವ ಚರಂಡಿಗಳನ್ನು ಬೇಕಾಬಿಟ್ಟಿ ಅಗೆದು ಮಣಿನ ರಾಶಿ ಹಾಕಿ ಹೋಗುತ್ತಿದ್ದಾರೆ. ಕೆಲವು ಮೋರಿಗಳನ್ನು ಮಣ್ಣು ತುಂಬಿ ಮುಚ್ಚಲಾಗಿದೆ. ಪೈಪ್ ಅಳವಡಿಸುವುದಕ್ಕೆ ರಸ್ತೆಗಳನ್ನು ಅಗೆದರೂ, ಅದನ್ನು ಸರಿಪಡಿಸುವ ಗೋಜಿಗೆ ಹೋಗುತ್ತಿಲ್ಲ. ಸಮಸ್ಯೆಗಳು ಪುನರಾವರ್ತನೆಯಾಗುತ್ತಿದ್ದರೂ, ಸರ್ಕಾರಿ ಇಂಜಿನಿಯರ್‌ಗಳು ಕ್ರಮ ಕೈಗೊಳ್ಳದೆ ಕರ್ತವ್ಯಲೋಪ ಎಸಗುತ್ತಿರುವ ಆರೋಪ ಕೇಳಿಬಂದಿದೆ.

"

ಅಭಿವೃದ್ಧಿ ಹೆಸರಿನಲ್ಲಿ ಹಳೆಯ ಕಾಮಗಾರಿಗಳನ್ನು ಹಾಳು ಮಾಡುತ್ತಿದ್ದರೂ ಯಾರೂ ಕೇಳುವವರು ಇಲ್ಲದಂತಾಗಿದೆ. ನಿರಂತರ ನಿರ್ಲಕ್ಷ್ಯ ತೋರುತ್ತಿರುವ ಅಽಕಾರಿಗಳನ್ನು ಸರಿಮಾಡುವವರು ಯಾರೆಂಬ ಪ್ರಶ್ನೆ ಮೂಡುತ್ತಿದೆ. ಜಡ್ಡುಗಟ್ಟಿರುವ ಸರ್ಕಾರಿ ವ್ಯವಸ್ಥೆಯನ್ನು ಸರಿಪಡಿಸುವ ನಿಟ್ಟಿನಲ್ಲಿ ಲೋಕಾಯುಕ್ತಕ್ಕೆ ಎರಡನೇ ಸಲ ದೂರು ನೀಡುವುದಕ್ಕೆ ಸಿದ್ಧತೆ ಮಾಡುತ್ತಿದ್ದೇವೆ.

— ವೆಂಕಟ್ರಮಣ ಪುಣಚ, ಲೋಕಾಯುಕ್ತ ದೂರುದಾರರು.