ಭಾನುವಾರ ಸಂಜೆ ವೇಳೆಗೆ ಸುಬ್ರಹ್ಮಣ್ಯ ಪರಿಸರದಲ್ಲಿ ಸುರಿದ ಭಾರಿ ಮಳೆಗೆ ಇಲ್ಲಿಗೆ ಸಮೀಪದ ಕೈಕಂಬ ಎಂಬಲ್ಲಿ ಕೋಟೆಸಾರು ಹೊಳೆಗೆ ನಿರ್ಮಿಸಿದ ಸೇತುವೆ ಮುಳುಗಡೆಗೊಂಡಿತು. ಸಂಜೆ ವೇಳೆಗೆ ಗುಡುಗು ಮಿಂಚಿನ ಭಾರಿ ಮಳೆ ಸುರಿದು, ಅರ್ಧ ತಾಸು ಮಳೆಗೆ ಕೈಕಂಬದ ಬಳಿ ಹರಿಯುವ ಕೋಟೆಸಾರು ಹೊಳೆ ತುಂಬಿ ಹರಿಯಿತು. ಇದರಿಂದಾಗಿ ಸುಬ್ರಹ್ಮಣ್ಯ- ಉಪ್ಪಿನಂಗಡಿ- ಮಂಗಳೂರು ರಸ್ತೆಗೆ ನಿರ್ಮಿಸಲಾದ ಕೋಟೆಸಾರು ಸೇತುವೆ ಮುಳುಗಡೆಗೊಂಡಿತು. ರಸ್ತೆ ಸಂಚಾರ ಬಂದ್ ಆದ ಪರಿಣಾಮ ಸೇತುವೆಯ ಇಕ್ಕೆಲಗಳಲ್ಲಿ ವಾಹನ ಸಾಲುಗಟ್ಟಿ ನಿಂತವು. ಮಳೆ ಕಡಿಮೆಯಾದ ಬಳಿಕ ಪ್ರವಾಹ ಕಡಿಮೆಯಾಗಿ ಸಂಚಾರ ಸುಗಮಗೊಂಡಿತು. ಭಾನುವಾರ ಸಂಜೆ ಸುಬ್ರಹ್ಮಣ್ಯ, ನೆಟ್ಟಣ, ಬಿಳಿನೆಲೆ, ಕೈಕಂಬ, ಕುಲ್ಕುಂದ, ಐನೆಕಿದು, ಹರಿಹರ, ಕೊಲ್ಲಮೊಗ್ರು, ಬಾಳುಗೋಡು, ಗುತ್ತಿಗಾರು, ಪಂಜ, ಯೇನೆಕಲ್ಲು, ಬಳ್ಪ, ಬೀದಿಗುಡ್ಡೆ, ಕರಿಕ್ಕಳ, ನಿಂತಿಕಲ್ಲು ಪ್ರದೇಶದಲ್ಲಿ ಮಳೆಯಾಗಿದೆ. ಶನಿವಾರದಿಂದ ಸಂಜೆಯ ವೇಳೆ ಸುಬ್ರಹ್ಮಣ್ಯ ಪರಿಸರದಲ್ಲಿ ಮಳೆ ಆರಂಭವಾಗಿ, ಭಾನು ವಾರವೂ ಮುಂದುವರಿದಿತ್ತು.
