ಡಕೋಟಾ ಈಗ ಚಿಗರಿ ಸರದಿ

ಹುಬ್ಬಳ್ಳಿ : ಸರಿಯಾಗಿ ನಿರ್ವಹಣೆ ಮಾಡದ ಕಾರಣಕ್ಕೆ ವಾಕರಸಾ ಸಂಸ್ಥೆಯ ಬಸ್​ಗಳನ್ನು ಡಕೋಟಾ ಎನ್ನುವುದುಂಟು. ಗುಜರಿಗೆ ಸೇರುವಂತದ್ದಾದರೂ ಇಂಥ ಬಸ್​ಗಳು ಈಗಲೂ ರಸ್ತೆಗಿಳಿಯುತ್ತಿವೆ. ಈ ಮಧ್ಯೆ ಬಹುನಿರೀಕ್ಷೆಯಿಂದ ಆರಂಭವಾದ ಚಿಗರಿ (ಬಿಆರ್​ಟಿಎಸ್) ಬಸ್​ಗಳೂ ಪಾಳೆ ಹಚ್ಚಿ ಗುಜರಿಯಾಗಿ ಇವೂ ಡಕೋಟಾ ಸಾಲಿಗೆ ಸೇರಲಾರಂಭಿಸಿವೆ.

ಸಕಾಲಕ್ಕೆ ಬಿಡಿಭಾಗಗಳು ಸಿಗದಾಗಿ ಚಲಿಸದೆ ನಿಂತಿರುವ ಬಿಆರ್​ಟಿಎಸ್ ಬಸ್​ಗಳ ಸಾಲಿಗೆ ಇಲ್ಲಿನ ಭೈರಿದೇವರಕೊಪ್ಪದಲ್ಲಿ ಭಾನುವಾರ ಅಪಘಾತಗೊಂಡ ಮತ್ತೊಂದು ಬಸ್ ಸೇರಿದಂತಾಗಿದೆ.

ಹುಬ್ಬಳ್ಳಿಯಿಂದ ಧಾರವಾಡಕ್ಕೆ ಚಲಿಸುತ್ತಿದ್ದ ಬಿಆರ್​ಟಿಎಸ್ ಬಸ್, ಸ್ಟೇರಿಂಗ್ ಲಾಕ್ ಆಗಿದ್ದರಿಂದ ಕಾರಿಡಾರ್ ಬಿಟ್ಟು ರಸ್ತೆ ಪಕ್ಕದ ವಿದ್ಯುತ್ ಕಂಬ ಹಾಗೂ ಕಟ್ಟಡವೊಂದಕ್ಕೆ ಗುದ್ದಿದೆ. ಈಗಾಗಲೇ ಬಿಆರ್​ಟಿಎಸ್​ನ 6-7 ಬಸ್​ಗಳು ರಿಪೇರಿಯಿಂದಾಗಿ ಡಿಪೋದಲ್ಲಿ ಸಾಲುಗಟ್ಟಿ ನಿಂತಿವೆ. ಅವುಗಳ ಸಾಲಿಗೆ ಮತ್ತೊಂದು ಅಪಘಾತಗೊಂಡ ಬಸ್ ಸೇರಿದೆ.

ಹುಬ್ಬಳ್ಳಿ-ಧಾರವಾಡ ಮಧ್ಯೆ ಸಂಚರಿಸುವ ಬಿಆರ್​ಟಿಎಸ್ ಬಸ್​ಗಳನ್ನು ನಿರ್ವಿುಸಿದ್ದು ಚೀನಾ ಮೂಲದ ‘ಯುಡಿ’ ಎಂಬ ಕಂಪನಿ. ಹೀಗಾಗಿ, ಈ ಬಸ್​ಗಳ ಬಿಡಿಭಾಗಗಳು ಸಿಗುವುದು ಕಷ್ಟಸಾಧ್ಯ. ಹೀಗಾಗಿ ಬಿಆರ್​ಟಿಎಸ್ ಡಕೋಟಾ ಆಗಲಾರಂಭಿಸಿವೆ. ಜನರ ಪ್ರಾಣ ತೆಗೆಯಲಾರಂಭಿಸಿವೆ.

ಈಗಾಗಲೇ ಸಂಚರಿಸುತ್ತಿರುವ ಅನೇಕ ಬಸ್​ಗಳಲ್ಲಿ ಹವಾನಿಯಂತ್ರಿತ ವ್ಯವಸ್ಥೆ (ಎಸಿ) ಸಮರ್ಪಕವಾಗಿ ಕಾರ್ಯನಿರ್ವಹಿಸುತ್ತಿಲ್ಲ ಎಂಬ ದೂರುಗಳು ಪ್ರಯಾಣಿಕರಿಂದ ಕೇಳಿಬರುತ್ತಿವೆ. ಅನೇಕ ಬಾರಿ ಬಸ್​ನ ಬಾಗಿಲು ಸರಿಯಾಗಿ ತೆಗೆದುಕೊಳ್ಳುವುದಿಲ್ಲ ಹಾಗೂ ಮುಚ್ಚಿಕೊಳ್ಳುವುದಿಲ್ಲ. ಇವುಗಳನ್ನೆಲ್ಲ ದುರಸ್ತಿ ಮಾಡಬೇಕೆಂದರೆ ಸಕಾಲಕ್ಕೆ ಬಿಡಿಭಾಗಗಳು ಸಿಗುತ್ತಿಲ್ಲ ಎಂಬ ಅಸಹಾಯಕತೆ ಅಧಿಕಾರಿಗಳದು.

ಬಸ್​ಗಳ ನಿರ್ವಹಣೆಯನ್ನು ಬಿಆರ್​ಟಿಎಸ್ ಅಧಿಕಾರಿಗಳು ಮಾಡುತ್ತಾರೆ. ಆದರೆ, ಸಂಚಾರ ಮತ್ತು ಸಿಬ್ಬಂದಿ ನಿರ್ವಹಣೆಯ ಜವಾಬ್ದಾರಿ ಸಾರಿಗೆ ಸಂಸ್ಥೆಯದು.

ಈಗಾಗಲೇ ಕೆಟ್ಟು ನಿಂತಿರುವ ಬಸ್​ಗಳ ದುರಸ್ತಿಗೆ ಸಾರಿಗೆ ಸಂಸ್ಥೆಯು ಬಿಆರ್​ಟಿಎಸ್​ಗೆ ಹಣ ಪಾವತಿಸಿದ್ದರೂ, ಬಿಡಿಭಾಗಗಳ ಕೊರತೆಯಿಂದಾಗಿ ಅವುಗಳ ದುರಸ್ತಿ ಸಾಧ್ಯವಾಗುತ್ತಿಲ್ಲ ಎಂದು ಹೇಳಲಾಗುತ್ತಿದೆ.

ಸರಿಯಾದ ಕಾಲಕ್ಕೆ ಬಸ್​ಗಳ ಬಿಡಿಭಾಗಗಳ ಬದಲಾವಣೆ ಮಾಡಿ, ಸುಸ್ಥಿತಿಯಲ್ಲಿ ಇಟ್ಟರೆ ಅಪಘಾತಗಳ ಸಂಖ್ಯೆಯೂ ಕಡಿಮೆಯಾಗುತ್ತದೆ. ಬಿಡಿಭಾಗಗಳು ಸಿಗದ ಕಾರಣ ಇರುವ ಸ್ಥಿತಿಯಲ್ಲಿಯೇ ಬಸ್​ಗಳನ್ನು ಓಡಿಸುವ ಅನಿವಾರ್ಯತೆ ಎದುರಾಗುತ್ತದೆ.

ಅಗತ್ಯ ಇರುವಷ್ಟು ಬಿಡಿಭಾಗಗಳನ್ನು ಸಂಗ್ರಹ ಮಾಡಿಕೊಳ್ಳದೇ ಇರುವ ಅಧಿಕಾರಿಗಳ ನಿರ್ಲಕ್ಷ್ಯದಿಂದಾಗಿ ಪ್ರಯಾಣಿಕರು ಜೀವ ಕೈಯಲ್ಲಿ ಹಿಡಿದುಕೊಂಡು ಬಿಆರ್​ಟಿಎಸ್ ಬಸ್​ಗಳಲ್ಲಿ ಓಡಾಡುವಂತಾಗಿದೆ. ಬಿಆರ್​ಟಿಎಸ್ ವಿರುದ್ಧ ಈಗಾಗಲೇ ಹಲವಾರು ದೂರುಗಳು ಕೇಳಿಬರುತ್ತಿದ್ದು, ಬಿಡಿಭಾಗಗಳ ಕೊರತೆ ಪ್ರಯಾಣಿಕರನ್ನು ಮತ್ತಷ್ಟು ಆತಂಕಕ್ಕೆ ತಳ್ಳಿದೆ.