ಕನಿಷ್ಠ 500 ಕೋಟಿ ರೂ. ನಿವ್ವಳ ಸಂಪತ್ತು ಹೊಂದಿದ, ವಾರ್ಷಿಕ 1 ಸಾವಿರ ಕೋಟಿ ರೂ. ಮತ್ತು ಅದಕ್ಕಿಂತ ಹೆಚ್ಚು ವಹಿವಾಟು ನಡೆಸಿ 5 ಕೋಟಿ ರೂ. ನಿವ್ವಳ ಲಾಭ ಮಾಡುವ ಕಂಪನಿಗಳು ಸಿಎಸ್ಆರ್ ನಿಧಿ ಖರ್ಚು ಮಾಡಬೇಕು. ಒಂದು ಅಂದಾಜಿನ ಪ್ರಕಾರ ದೇಶದಲ್ಲಿ ಕಳೆದ ಐದು ವರ್ಷದಲ್ಲಿ 77 ಸಾವಿರ ಕೋಟಿ ರೂ. ಸಿಎಸ್ಆರ್ ನಿಧಿ ವೆಚ್ಚ ಮಾಡಬೇಕಿತ್ತು. ಆದರೆ, 55 ಸಾವಿರ ಕೋಟಿ ರೂ. ಮಾತ್ರ ಖರ್ಚು ಮಾಡಲಾಗಿದೆ. ಈ ವ್ಯತ್ಯಾಸದ ಹಣವನ್ನು ಬಳಸಿ ವೈಯಕ್ತಿಕ ರಕ್ಷಣಾ ಕಿಟ್, ವೆಂಟಿಲೇಟರ್ ಸೇರಿ ವಿವಿಧ ಅಗತ್ಯತೆ ನೀಗಿಸಿಕೊಳ್ಳಲು ಕೇಂದ್ರ ಸರ್ಕಾರ ಉದ್ದೇಶಿಸಿದೆ. ಇದೇ ವೇಳೆ ರಾಜ್ಯದ ಆಶಯ ಬೇರೆ ರೀತಿಯದ್ದಾಗಿದೆ. ಈಗ ರಾಜ್ಯ ಸರ್ಕಾರಗಳು ಕಾಪೋರೇಟ್ ಕಂಪನಿಗಳಿಗೆ ದೇಣಿಗೆ ಕೇಳಿದಾಗ ಅವು ನಿರಾಕರಿಸದೆ ಕೆಲವು ಲಕ್ಷ ಅಥವಾ ಒಂದೆರೆಡು ಕೋಟಿ ನೀಡಿ ಜವಾಬ್ದಾರಿ ಮೆರೆಯುತ್ತಿವೆ. ನಿರ್ದಿಷ್ಟ ತೆರಿಗೆ ವಿನಾಯಿತಿ ಪಡೆಯುತ್ತಿವೆ. ಒಂದು ವೇಳೆ ರಾಜ್ಯ ಸರ್ಕಾರವೂ ಸಿಎಸ್ಆರ್ ನಿಧಿ ಬಳಸಿಕೊಳ್ಳಲು ಅವಕಾಶ ಸಿಕ್ಕರೆ ಹೆಚ್ಚಿನ ಅನುಕೂಲವಾಗುತ್ತದೆ ಎಂಬ ಅಭಿಪ್ರಾಯವಿದೆ.
