ಪಟಾಕಿ ಚೀಟಿ ಹೆಸರಿನಲ್ಲಿ ಕೋಟ್ಯಂತರ ರೂ. ವಂಚನೆ!

ಕಿಂಗ್​ಪಿನ್​ ಭರತ್​ ಕಾಣೆ | ಸಾವಿರಾರು ಚೀಟಿದಾರರಿಂದ ಹಣಪಡೆದು ಪರಾರಿ

ಬಂಗಾರಪೇಟೆ: ಪಟಾಕಿ ಚೀಟಿ ಹೆಸರಿನಲ್ಲಿ ಸಾಮಗ್ರಿ ನೀಡುವುದಾಗಿ ಹೇಳಿ ಖಾತೆಗೆ ಹಣ ಹಾಕಿಸಿಕೊಂಡ ಆಸಾಮಿ ನಾಲ್ಕೆ$ದು ದಿನಗಳಿಂದ ಕಣ್ಮರೆಯಾಗಿದ್ದು, ಚೀಟಿ ನೆಪದಲ್ಲಿ ಕೋಟ್ಯಂತರ ರೂಪಾಯಿ ವಂಚಿಸಲಾಗಿದೆ ಎನ್ನಲಾಗಿದೆ.

ಪಟ್ಟಣದ ಭರತ್​ ಎಂಬುವವರ ಒಡೆತನದ ಶ್ರೀ ಚೌಡೇಶ್ವರಿ ಟ್ರೇಡರ್ಸ್​ ಮತ್ತು ಡೀರ್ಲಸ್​ ಎಂಬ ಹೆಸರಿನ ಸಂಸ್ಥೆಗೆ ಸುಮಾರು 15 ರಿಂದ 20 ಸಾವಿರ ಜನರು ತಿಂಗಳಿಗೆ 500 ರೂ. ನಂತೆ ವರ್ಷಕ್ಕೆ ತಲಾ 6 ಸಾವಿರ ರೂ.ವರೆಗೆ ಚೀಟಿ ಕಟ್ಟಿದ್ದರು. ಚೀಟಿ ಕಟ್ಟಿದವರಿಗೆ ವಿವಿಧ ಸಾಮಗ್ರಿ ನೀಡುವ ಆಮಿಷವೊಡ್ಡಲಾಗಿತ್ತು. ಹಬ್ಬ ಹತ್ತಿರ ಬರುತ್ತಿದ್ದಂತೆ ಹಣ ಕಟ್ಟಿಸಿಕೊಂಡವರು ನಾಪತ್ತೆಯಾಗಿದ್ದು, ಈಗ ಪಟ್ಟಣದ ಪುರಸಭೆ ಕಚೇರಿ ರಸ್ತೆಯಲ್ಲಿರುವ ಸಂಸ್ಥೆಯ ಕಚೇರಿ ಬಳಿ ಚೀಟಿ ಕಟ್ಟಿದ ಸಾವಿರಾರು ಮಂದಿ ಹಗಲು&ರಾತ್ರಿ ಎನ್ನದೇ ಜಮಾಯಿಸಿ ಅಲ್ಲೇ ಬಿಡಾರ ಹೂಡಿದ್ದಾರೆ.

ಕೋಲಾರ, ಬಂಗಾರಪೇಟೆ, ಕೆಜಿಎಫ್​, ಮುಳಬಾಗಿಲು, ಚಿಂತಾಮಣಿ, ಹೊಸಕೋಟೆ, ಬೆಂಗಳೂರು ಸೇರಿ ಸುತ್ತಮುತ್ತಲಿನ ತಾಲೂಕುಗಳ ಸಾವಿರಾರು ಮಂದಿ ಏಜೆಂಟ್​ಗಳು ಹಣ ಸಂಗ್ರಹಿಸಿ ಭರತ್​ಗೆ ಪಾವತಿಸಿದ್ದಾರೆ. ಏಜೆಂಟ್​ಗಳು ಸಂಸ್ಥೆ ಹೆಸರಿನಲ್ಲಿದ್ದ ಖಾತೆಗೆ ಡಿಜಿಟಲ್​ ಪೇಮೆಂಟ್​ ಮಾಡಿದ್ದು, 10 ರಿಂದ 12 ಕೋಟಿ ರೂ. ಜಮೆ ಆಗಿದೆ ಎಂದು ಹೇಳಲಾಗುತ್ತಿದೆ.

ಆಮಿಷ ತಂದಿಟ್ಟ ಸಂಕಷ್ಟ

ಒಬ್ಬ ಏಜೆಂಟ್​ 30 ಚೀಟಿದಾರರನ್ನು ನೋಂದಾಯಿಸಿದರೆ ಅಂತಹ ಏಜೆಂಟ್​ಗೆ 1 ಚೀಟಿ ಉಚಿತ ನೀಡಲಾಗುವುದು ಎಂಬ ಆಮಿಷ ಒಡ್ಡಿದ್ದ ಹಿನ್ನೆಲೆಯಲ್ಲಿ ಒಬ್ಬೊಬ್ಬ ಏಜೆಂಟ್​ 30 ರಿಂದ 600ಕ್ಕೂ ಹೆಚ್ಚು ಚೀಟಿದಾರರನ್ನು ನೋಂದಾಯಿಸಿದ್ದಾರೆ. ಚೀಟಿದಾರರಿಂದ ಹಣ ಪಡೆದು ಭರತ್​ ಸಂಸ್ಥೆಯ ಖಾತೆಗೆ ವರ್ಗಾಯಿಸಲಾಗಿದೆ.

2 ತಿಂಗಳ ಹಿಂದೆಯೇ ಏಜೆಂಟರ ಮೂಲಕ ಚೀಟಿದಾರರಿಗೆ ಪಟಾಕಿ ಸಾಮಗ್ರಿ ಕಳುಹಿಸಿ ಕೊಡುವುದಾಗಿ ಭರತ್​ ತಿಳಿಸಿದ್ದು, ಅದರಂತೆಯೇ ನೂರಾರು ಮಂದಿ ಏಜೆಂಟರು ಆತನ ಕಚೇರಿಗೆ ಆಗಮಿಸಿ ಸಂಪರ್ಕಿಸಿದಾಗ ಯಶವಂತಪುರ ಗೋದಾಮಿನಲ್ಲಿ ಸಾಮಗ್ರಿಗಳ ಪ್ಯಾಕಿಂಗ್​ ನಡೆಯುತ್ತಿದೆ ಎಂದು ಹೇಳಿ ದಿನ ದೂಡಿದ್ದಾನೆ. ದೀಪಾವಳಿ ಹತ್ತಿರ ಬರುತ್ತಿದ್ದಂತೆಯೇ ಭರತ್​ ಕಚೇರಿ ಕಡೆ ಬರುವುದನ್ನು ಕಡಿಮೆ ಮಾಡಿ, ಏಜೆಂಟ್​ರ ಸಂಪರ್ಕಕ್ಕೆ ಸಿಗದೆ ಇರುವುದು ಚೀಟಿದಾರರಲ್ಲಿ ಆತಂಕ ಸೃಷ್ಟಿಸಿದೆ.

ಏಜೆಂಟ್​ಗಳಿಗೂ ಆತಂಕ

ಚೀಟಿ ಕಟ್ಟಿದವರೆಲ್ಲರೂ ಏಜೆಂಟ್​ಗಳ ಮೂಲಕ ಕಟ್ಟಿದ್ದು, ಈಗ ಕಚೇರಿ ಬಳಿ ಅಲೆದಾಡಿದರೂ ಭರತ್​ ಸುಳಿವು ಸಿಗದೆ ಇರುವುದರಿಂದ ಚೀಟಿ ಹಾಕಿರುವವರು ಏಜೆಂಟರಿಗೆ ತರಾಟೆ ತೆಗೆದುಕೊಂಡು ಚೀಟಿ ಹಣ ವಾಪಸ್​ ಕೊಡಿ, ಇಲ್ಲವೇ ಪಟಾಕಿ ಸಾಮಗ್ರಿ ಕೊಡಿ ಎಂದು ಬೆನ್ನು ಬಿದ್ದಿದ್ದಾರೆ.

ಪಟಾಕಿ ಸಾಮಗ್ರಿಗಳು

ಎಸ್​.ಎನ್​.ಅಕ್ಕಿ 25 ಕೆಜಿ, ಹಂಸ ಬ್ರಾಂಡ್​ ಅಕ್ಕಿ 25 ಕೆಜಿ, ಗೋಲ್ಡ್​ ವಿನ್ನರ್​ ಆಯಿಲ್​ 15 ಕೆಜಿ, ಸಕ್ಕರೆ 5 ಕೆಜಿ, ಮೈದಾ 5 ಕೆಜಿ, ಗೋದಿಹಿಟ್ಟು 5 ಕೆಜಿ, ಬೆಲ್ಲ 3 ಕೆಜಿ, ಕೆಂಪು ಅಕ್ಕಿ 3 ಕೆಜಿ, ರವೆ 3 ಕೆಜಿ, ತೊಗರಿ ಬೇಳೆ 3 ಕೆಜಿ, ಉದ್ದಿನಬೇಳೆ 1 ಕೆಜಿ, ಹೆಸರುಕಾಳು 1 ಕೆಜಿ, ಕಡಲೆ 1 ಕೆಜಿ, ಬಟಾಣಿ 1 ಕೆಜಿ, ಅವಲಕ್ಕಿ 1 ಕೆಜಿ, ಕಡಲೆ ಹಿಟ್ಟು 1 ಕೆಜಿ, ಕಲ್ಲುಪ್ಪು 1 ಕೆಜಿ, ಕಳ್ಳೆ ಪೊಪ್ಪು ತಲಾ ಒಂದು ಕೆಜಿ, ಸಬ್ಬಕ್ಕಿ ನೂಡಲ್ಸ್​, ಸೊಯಾ ಬೀನ್ಸ್​, ಶುಂಠಿ ಬೆಳ್ಳುಳ್ಳಿ ಪೇಸ್ಟ್​ ತಲಾ 250 ಗ್ರಾಮ್​, ದ್ರಾಕ್ಷಿ&ಗೋಡಂಬಿ, ತುಪ್ಪ, ಟೀ ಪುಡಿ, ಹರಿಶಿನ ಪುಡಿ, ಮೆಣಸಿನ ಪುಡಿ, ದನಿಯಾ ಪುಡಿ, ಸಾಂಬರ್​ ಪುಡಿ, ಪುಳಿಯೊಗರೆ ತಲಾ 100 ಗ್ರಾಂ, ರಸಂ ಪುಡಿ, ಚಿಕನ್​ ಮಸಾಲ, ಮಟನ್​ ಮಸಾಲ, ಗರಂ ಮಸಾಲ, ಬಿಳಿ ಎಳ್ಳು, ಸೋಂಪು, ಮೆಣಸು, ಜೀರಿಗೆ, ಸಾಸಿವೆ, ಮೆಂತ್ಯ ತಲಾ 50 ಗ್ರಾಂ, ಸೇಮಿಯಾ, ಹರಿಶಿಣ ಕುಂಕುಮ ತಲಾ ಎರಡು ಪ್ಯಾಕೆಟ್​, ಅಪ್ಪಳ, ಉಪ್ಪಿನ ಕಾಯಿ, ಹರಿಶಿನ ಕೊಂಬು, ನೋಮು ಅಡಕೆ, ನೋಮು ದಾರ ಒಂದು ಪ್ಯಾಕೆಟ್​, ಸ್ವೀಟ್​ ಬಾಕ್ಸ್​, ಹಸಿರು ಪಟಾಕಿ ತಲಾ ಒಂದು ಬಾಕ್ಸ್​ ಸೇರಿ ಒಟ್ಟು 55 ಸಾಮಗ್ರಿ ನೀಡಲಾಗುವುದು ಎಂದು ಕಾರ್ಡ್​ನಲ್ಲಿ ತಿಳಿಸಲಾಗಿದೆ. ಹಂಸ ಬ್ರಾ$್ಯಂಡ್​ ಅಕ್ಕಿ ಮತ್ತು ಸ್ಟೀಲ್​ ಮೂಡಿ ಬಕೇಟ್​ ಬೇಡವಾದಲ್ಲಿ ಬದಲಾಗಿ ಸಿಂಗಲ್​ ಗ್ಯಾಸ್​ ಸ್ಟೌ ಅಥವಾ ರಾಗಿ ಕಳಶ ಬಿಂದಿಗೆ (ವರಲಕ್ಷಿ$್ಮ ಬಿಂದಿಗೆ) ಅಥವಾ 3 ಕೆಜಿ ಪಲಾವ್​ ಬಿಂದಿಗೆ ನೀಡಲಾಗುವುದು ಎಂದು ಕಾರ್ಡ್​ನಲ್ಲಿ ತಿಳಿಸಿದ್ದಾರೆ.

ಕೋಟ್ಯಂತರ ವ್ಯವಹಾರ! ಐಟಿ ಅಧಿಕಾರಿಗಳೆಲ್ಲಿ?

ಪಟಾಕಿ ಚೀಟಿ ವ್ಯವಹಾರದಲ್ಲಿ ಕೋಟ್ಯಾಂತರ ರೂ. ವ್ಯವಹಾರ ನಡೆದಿರುವುದು ಮೇಲ್ನೋಟಕ್ಕೆ ಕಂಡು ಬರುತ್ತಿದ್ದರೂ ಆದಾಯ ತೆರಿಗೆ ಅಧಿಕಾರಿಗಳು ಕಾನೂನು ಕ್ರಮಕ್ಕೆ ಏಕೆ ಮುಂದಾಗುತ್ತಿಲ್ಲ. ಸಾವಿರಾರು ಮಂದಿ ಡಿಜಿಟಲ್​ ಪೇಮೆಂಟ್​ ಮಾಡಿ ವ್ಯವಹಾರ ನಡೆಸಿದ್ದರೂ ಇವರಿಗೆ ಮಾಹಿತಿಯೇ ಇಲ್ಲವೇ?. ಪಟಾಕಿ ಚೀಟಿ ಹೆಸರಲ್ಲಿ ಮಿತಿ ಮೀರಿ ಹಣದ ವ್ಯವಹಾರ ನಡೆದಿರುವುದು ಕಂಡು ಬರುತ್ತಿದ್ದರೂ ಐಟಿ ಅಧಿಕಾರಿಗಳು ಏಕೆ ಕ್ರಮಕ್ಕೆ ಮುಂದಾಗಿಲ್ಲ ಅನ್ನೋದು ನಾಗರಿಕರ ಪ್ರಶ್ನೆಯಾಗಿದೆ. ಆದರೆ, ಪೊಲೀಸ್​ ಠಾಣೆಗೆ ಇದುವರೆವಿಗೂ ದೂರು ನೀಡಿದೆ ಇರುವುದು ಆಶ್ಚರ್ಯವನ್ನುಂಟು ಮಾಡಿದೆ.