ಕಲಬುರಗಿ: ಜಿಲ್ಲಾ ಉಸ್ತುವಾರಿ ಸಚಿವ ಪ್ರಿಯಾಂಕ್ ಖರ್ಗೆ ಬೇಕಾಬಿಟ್ಟಿ ಹೇಳಿಕೆಗಳಿಂದ ಜಿಲ್ಲೆಯಲ್ಲಿ ಅಪರಾಧ ಪ್ರಕರಣಗಳು ಹೆಚ್ಚುತ್ತಿದ್ದು, ಕಲಬುರಗಿಯಲ್ಲಿ ಸಿರಿಯಾ, ಇರಾನ್, ಇರಾಕ್ ಮಾದರಿಯಲ್ಲಿ ಮರ್ಮಾಂಗಕ್ಕೆ ಒದ್ದು, ಶಾಕ್ ಟ್ರೀಟ್ಮೆಂಟ್ ನೀಡುವ ಪೈಶಾಚಿಕ ಕೃತ್ಯಗಳು ನಡೆಯುತ್ತಿವೆ ಎಂದು ಆಂದೋಲಾದ ಶ್ರೀ ಸಿದ್ಧಲಿಂಗ ಸ್ವಾಮೀಜಿ ಕಿಡಿ ಕಾರಿದರು.
ಕಲಬುರಗಿ ಭಯೋತ್ಪಾದಕ ತಾಣವಾಗಿ ಮಾರ್ಪಟ್ಟಿದ್ದು, ಕೋಟನೂರ, ಲಾಡಮುಗಳಿ ಘಟನೆ ಮರೆ ಮಾಚುವ ಮುನ್ನವೇ ನಗರದಲ್ಲಿ ಅನಾಗರಿಕ ಸಂಸ್ಕೃತಿಯ, ಪೈಶಾಚಿಕ ಕೃತ್ಯ ನಡೆದಿದೆ. ಹೊಟ್ಟೆ ಪಾಡಿಗಾಗಿ ಸೆಕೆಂಡ್ ಹ್ಯಾಂಡ್ ಕಾರ್ ಮಾರಾಟ ವ್ಯಾಪಾರ ಮಾಡುತ್ತಿದ್ದ ಅರ್ಜುನ್ಗೆ ದಲಿತ ಸಂಘಟನೆಯ ರಮೇಶ ದೊಡ್ಡಮನಿ, ಇಮ್ರಾನ ಮತ್ತೀತರರು ಸೇರಿ ನಗ್ನಗೊಳಿಸಿ ಮಾರಣಾಂತಿಕ ಹಲ್ಲೆ ಮಾಡಿ, ಕರೆಂಟ್ ಶಾಕ್ ಕೊಟ್ಟಿರುವುದು ಇಡೀ ಸಮಾಜ ತಲೆ ತಗ್ಗಿಸುವಂತಹ ವಿಷಯ ಎಂದು ಭಾನುವಾರ ಸುದ್ದಿಗೋಷ್ಠಿಯಲ್ಲಿ ಆರೋಪಿಸಿದರು.
ಹಾಗರಗಾ ಕ್ರಾಸ್ ಬಳಿ ಮನೆಯೊಂದರಲ್ಲಿ ಮುಸ್ಲಿಂ ಗುಂಡಾಪಡೆಯು ೧೦ ಲಕ್ಷ ರೂ. ನೀಡಬೇಕು, ಪ್ರತಿ ತಿಂಗಳು ಒಂದು ಲಕ್ಷ ರೂ. ನೀಡಬೇಕು ಎಂದು ಒತ್ತಡ ಹೇರಿ ಮಚ್ಚುಗಳಿಂದ ದಾಳಿ ಮಾಡಿ, ಮರ್ಮಾಂಗಕ್ಕೆ ಸ್ಟನ್ ಗನ್ ಮೂಲಕ ಶಾಕ್ ನೀಡಿದ್ದಾರೆ. ಕಾನೂನು ಸುವ್ಯವಸ್ಥೆ ಹದಗೆಟ್ಟಿದೆ ಎಂಬುದಕ್ಕೆ ಈ ಘಟನೆ ಸಾಕ್ಷಿ ಎಂದು ಹೇಳಿದರು.
