ಬಾಲ್ಯದಲ್ಲೇ ಮಕ್ಕಳಿಗೆ ಪರಿಸರ ಜಾಗೃತಿ ಮೂಡಿಸಿ

ಪಂಚನಹಳ್ಳಿ: ಪರಿಸರವನ್ನು ಬೆಳೆಸಿ ಪೋಷಣೆ ಮಾಡಿ ಉಳಿಸಿಕೊಳ್ಳುವ ಕಾರ್ಯ ಸುಲಭವಲ್ಲ. ಪರಿಸರ ಸಂರಕ್ಷಿಸಲು ಹೃದಯವಂತಿಕೆ ಬೇಕು ಎಂದು ಸಿಂಗಟಗೆರೆ ಸರ್ಕಾರಿ ಮಾದರಿ ಹಿರಿಯ ಪ್ರಾಥಮಿಕ ಶಾಲೆ ಎಸ್‌ಡಿಎಂಸಿ ಅಧ್ಯಕ್ಷ ಗಿರೀಶ್ ಆರಾಧ್ಯ ತಿಳಿಸಿದರು.

ಸಿಂಗಟಗೆರೆ ಸರ್ಕಾರಿ ಮಾದರಿ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ಇಕೋ ಕ್ಲಬ್ನಿಂದ ಪಪ್ಪಾಯಿ, ಗುಲಾಬಿ, ನಲ್ಲಿ ಗಿಡ ಸೇರಿದಂತೆ ವಿವಿಧ ಜಾತಿಯ 47 ಔಷಧ ಗಿಡಗಳನ್ನು ನೆಡುವ ಮೂಲಕ ಹೊಸ ವರ್ಷ ಆಚರಣೆ ಕಾರ್ಯಕ್ರಮಕ್ಕೆ ಚಾಲನೆ ನೀಡಿ ಮಾತನಾಡಿ, ಪ್ರಾಥಮಿಕ ಶಿಕ್ಷಣದ ಹಂತದಲ್ಲಿ ಮಕ್ಕಳಿಗೆ ಪರಿಸರದ ಬಗ್ಗೆ ಜಾಗೃತಿ ಮೂಡಿಸಿ ಪರಿಸರ ಅಸಮತೋಲನದಿಂದಾಗುವ ಅಪಾಯದ ಬಗ್ಗೆ ಅರಿವು ಮೂಡಿಸಬೇಕು. ಶಾಲಾ ಆವರಣದಲ್ಲಿ ಮತ್ತು ವಿವಿಧ ಔಷಧ ಗಿಡಗಳನ್ನು ಬೆಳೆಸಿ ಸಸ್ಯಗಳ ಬೆಳವಣಿಗೆ ವಾಸ್ತವತೆಯನ್ನು ಮಕ್ಕಳಿಗೆ ತಿಳಿಸಬೇಕು ಎಂದರು.

ಇಕೋ ಕ್ಲಬ್ನಿಂದ ಹಸಿಕಸ, ಒಣ ಕಸ ವಿಂಗಡನೆ ಮಾಡುವ ಪರಿಕರಗಳನ್ನು ವಿತರಿಸಲಾಯಿತು. ಎಸ್‌ಡಿಎಂಸಿ ಸದಸ್ಯರಾದ ರಿಯಾಜ್, ರಾಜಣ್ಣ ಬಾಬು, ತಾರಾಮಣಿ, ಹೇಮಾವತಿ, ಮುಖ್ಯಶಿಕ್ಷಕಿ ಜಯಂತಿ, ಸಹ ಶಿಕ್ಷಕರಾದ ಜಗದೀಶ್ ಉಮೇಶ್, ರಾಜಶೇಖರ್, ರೇಖಾ, ಅಭಿಲಾಷ, ರೇಖಾ, ಲೋಕನಾಯ್ಕ, ಹಳೆ ವಿದ್ಯಾರ್ಥಿ ಸಂಘದ ಅಧ್ಯಕ್ಷ ಮಲ್ಲಿಕಾರ್ಜುನ್, ಗೌರವಾಧ್ಯಕ್ಷ ಉದಯ್ ಕುಮಾರ್ , ಮಕ್ಕಳ ಮನೆ ಶಿಕ್ಷಕಿಯರು ಇದ್ದರು.