ಸುಮಾರು 27 ವರ್ಷಗಳ ಕಾಲ ರೈತ ಅಶೋಕ ಗಾಮನಗಟ್ಟಿ ಕುಟುಂಬಕ್ಕಾಗಿಯೇ ದುಡಿದ ರಾಮ ಇಂದು(ಗುರುವಾರ) ಸಾವನ್ನಪ್ಪಿದ್ದು, ಕುಟುಂಬಸ್ಥರ ಆಕ್ರಂದನ ಮುಗಿಲು ಮುಟ್ಟಿದೆ. ರಾಮ ಮಾಡಿದ ಸೇವೆಯನ್ನು ಮನೆ ಮಂದಿ ಮಾತ್ರವಲ್ಲದೆ ಗ್ರಾಮಕ್ಕೆ ಗ್ರಾಮವೇ ಮೆಲುಕು ಹಾಕುತ್ತಿದೆ. ಮೃತ ರಾಮನಿಗೆ ಅಂತಿಮ ಸಂಸ್ಕಾರ ಮಾಡಲು ನಿರ್ಧರಿಸಿದ್ದ ಕುಟುಂಬಸ್ಥರು, ಟ್ರ್ಯಾಕ್ಟರ್ನಲ್ಲಿ ಪಾರ್ಥಿವ ಶರೀರವನ್ನು ಇಟ್ಟು ಸಕಲ ವಾದ್ಯ ಮೇಳದೊಂದಿಗೆ ಊರಲ್ಲಿ ಮೆರವಣಿಗೆ ಮಾಡಿದರು. ಗ್ರಾಮದ ಒಬ್ಬ ಗಣ್ಯವ್ಯಕ್ತಿ ನಿಧನರಾದರೆ ಯಾವ ರೀತಿಯಲ್ಲಿ ಮೆರವಣಿಗೆ ಮಾಡುತ್ತಾರೋ ಅದೇ ರೀತಿಯಲ್ಲಿ ಮೂಕಪ್ರಾಣಿ ರಾಮನಿಗೂ ಗೌರವ ಸಲ್ಲಿಸಲಾಯಿತು. ಇನ್ನೂ ಪ್ರತಿವರ್ಷ ಹುಟ್ಟು ಹಬ್ಬದಲ್ಲಿ ವಿಶೇಷವಾಗಿ ಆಚರಣೆ ಮಾಡಲಾಗುತ್ತಿತ್ತು.ಆದರೆ ಇಂದು ನಿಧನ ಹೊಂದಿದ ರಾಮನಿಗೆ ಗಾಮನಗಟ್ಟಿ ರೈತ ಕುಟುಂಬ ಕಣ್ಣೀರು ಸಮರ್ಪಣೆ ಮಾಡಿದೆ.
