ಕೋವಿಡ್-19 ಚಿಕಿತ್ಸೆಗಿಂತ ಟೆಸ್ಟ್ ಶುಲ್ಕಕ್ಕೆ ಬೆದರಿದ ಸಿಂಧನೂರು ತಾಲೂಕಿನ ಜನ

ಸಿಂಧನೂರು: ತಾಲೂಕಿನಲ್ಲಿ ಕೋವಿಡ್-19 ಚಿಕಿತ್ಸೆಯ ವೆಚ್ಚಕ್ಕಿಂತ ಸಿಟಿ ಸ್ಕ್ಯಾನ್, ರಕ್ತ ಪರೀಕ್ಷೆಯ ಶುಲ್ಕಕ್ಕೆ ಜನರು ಬೆದರಿ ಹೋಗಿದ್ದಾರೆ.

ಹದಿನೈದು ದಿನಗಳಿಂದ ತಾಲೂಕಿನಲ್ಲಿ ಕೋವಿಡ್-19 ಸೋಂಕಿತರ ಸಂಖ್ಯೆ ಹೆಚ್ಚುತ್ತಿದ್ದು ಈಗಾಗಲೇ ಒಂದು ಸಾವಿರಕ್ಕೂ ಅಧಿಕ ಕೋವಿಡ್-19 ಪ್ರಕರಣಗಳು ದಾಖಲಾಗಿದ್ದು, ಚಿಕಿತ್ಸೆಗಾಗಿ ಜನರು ಪರದಾಡುತ್ತಿದ್ದಾರೆ. ಸಾರ್ವಜನಿಕ ಆಸ್ಪತ್ರೆಯಲ್ಲಿ ಕೋವಿಡ್ ಆಸ್ಪತ್ರೆ ವ್ಯವಸ್ಥೆ ಮಾಡಿದ್ದರೂ ಅದು ಆಟಕ್ಕುಂಟು ಲೆಕ್ಕಕ್ಕಿಲ್ಲ ಎಂಬಂತಿದೆ. ಬೆಡ್, ಆಕ್ಸಿಜನ್ ಸಮಪರ್ಕವಾಗಿಲ್ಲ ಎನ್ನುವ ದೂರುಗಳಿವೆ.

ಇನ್ನೂ ನಗರದ ಮೂರು ಖಾಸಗಿ ಆಸ್ಪತ್ರೆಗಳಲ್ಲಿ ಕೋವಿಡ್-19 ಚಿಕಿತ್ಸಾ ಕೇಂದ್ರಗಳನ್ನಾಗಿಸಿದ್ದು ಅಲ್ಲಿ ಬೆಡ್, ಆಕ್ಸಿಜನ್ ಶುಲ್ಕ ವಿಧಿಸಲಾಗುತ್ತದೆ. ಅದಕ್ಕಿಂತ ದುಬಾರಿಯಾಗಿದ್ದು ಸಿಟಿ ಸ್ಕ್ಯಾನ್, ರಕ್ತ ಪರೀಕ್ಷೆಯ ಶುಲ್ಕ. ಸಿಟಿ ಸ್ಕ್ಯಾನ್‌ಗೆ ಒಬ್ಬ ಕೋವಿಡ್-19 ಸೋಂಕಿತರಿಗೆ 4 ಸಾವಿರ ರೂ. ಹಾಗೂ ರಕ್ತ ಪರೀಕ್ಷೆಗೆ 3500 ಸಾವಿರ ರೂ. ನಿಗದಿಪಡಿಸಿದ್ದು ಈ ಶುಲ್ಕ ಬಡ ಸೋಂಕಿತರಿಗೆ ಹೊರೆಯಾಗಿದೆ.

ಮೊದಲೇ ಕೋವಿಡ್-19 ಸೋಂಕಿನ ಭಯದ ಜತೆಗೆ ಈಗ ಶುಲ್ಕದ ಹೊರೆ ಭಾರಿ ಪೆಟ್ಟು ನೀಡಿದೆ. ಈಗಾಗಲೇ ಸಚಿವ ಸುಧಾಕರ ಕೂಡ ಸಿಟಿ ಸ್ಕ್ಯಾನ್ 1500 ರೂ. ಪಡೆಯಬೇಕೆಂಬ ಆದೇಶವನ್ನು ಕೂಡ ಮಾಡಿದ್ದಾರೆ. ಆದರೆ, ಖಾಸಗಿ ಆಸ್ಪತ್ರೆಗಳು ಆದೇಶ ಪಾಲಿಸುವ ಖಾತ್ರಿ ಇಲ್ಲ. ಈ ಬಗ್ಗೆ ತಾಲೂಕು ಆಡಳಿತ ಹಾಗೂ ಆರೋಗ್ಯ ಇಲಾಖೆಯೇ ಕ್ರಮಕ್ಕೆ ಮುಂದಾಗಬೇಕಿದೆ.