ತಮ್ಮ ಪ್ರಾಣವನ್ನು ಪಣಕ್ಕಿಟ್ಟು ತಮ್ಮಕುಟುಂಬದವರ ಹಿತವನ್ನು ನಿರ್ಲಕ್ಷಿ್ಯಸಿ ಕರೊನಾ ಪೀಡಿತರನ್ನು, ಶಂಕಿತರನ್ನು ಕಾಪಾಡಲು ಸಲ್ಲಿಸುತ್ತಿರುವ ವೈದ್ಯರ ಸೇವೆ ಪ್ರಶಂಸೆಗೆ ಪಾತ್ರವಾಗಿದೆ. ದಿನದ 24 ಗಂಟೆಯೂ ಸರ್ಕಾರಿ, ಖಾಸಗಿ ಆಸ್ಪತ್ರೆಗಳು ಕಾರ್ಯನಿರ್ವಹಿಸುತ್ತಿವೆ. ಬೆಂಗಳೂರಿನ ರಾಜೀವ್ ಗಾಂಧಿ ಆರೋಗ್ಯ ಕೇಂದ್ರ, ಇಎಸ್ಐ ಆಸ್ಪತ್ರೆ, ವಿಕ್ಟೋರಿಯಾ, ಕೆಸಿ ಜನರಲ್ ಆಸ್ಪತ್ರೆ, ಜಿಲ್ಲಾ ಆರೋಗ್ಯ ಕೇಂದ್ರಗಳು ಸೇರಿದಂತೆ ಎಲ್ಲ ಆಸ್ಪತ್ರೆಗಳಲ್ಲಿ ವೈದ್ಯ ಸಿಬ್ಬಂದಿ ತಂಡಗಳು ಸಮರೋಪಾದಿಯಲ್ಲಿ ಸೋಂಕು ತಡೆಗೆ ಕಾರ್ಯನಿರ್ವಹಿಸುತ್ತಿವೆ. ಸರ್ಕಾರಿ ಆಸ್ಪತ್ರೆ ವೈದ್ಯರೆಂದರೆ ಆಸ್ಪತ್ರೆಯಲ್ಲಿ ಇರುವುದೇ ಇಲ್ಲ, ಸಮಯಕ್ಕೆ ಸರಿಯಾಗಿ ಹಾಜರಾಗುವುದಿಲ್ಲ, ರೋಗಿಗಳ ಬಗ್ಗೆ ಕಾಳಜಿಯೇ ತೋರುವುದಿಲ್ಲ ಎಂಬಿತ್ಯಾದಿ ಅರೋಪಗಳು ಸಾಮಾನ್ಯವಾಗಿದ್ದವು. ಆದರೆ, ಕೋವಿಡ್ - 19 ನಿಂದಾಗಿ ಜೀವದ ಹಂಗು ತೊರೆದು ಸೇವೆ ನೀಡುತ್ತಿದ್ದಾರೆ. ಮುಂಜಾನೆಯಿಂದ ಸಂಜೆವರೆಗೂ ಪಾಳಿ ಅನುಸಾರ ಕೆಲಸ ಮಾಡುತ್ತಿದ್ದವರು ರಾಜ್ಯದಲ್ಲಿ ಕೋವಿಡ್ ಆವರಿಸಿದಾಗಿನಿಂದಲೂ ಸಮಯದ ಲೆಕ್ಕವಿಲ್ಲದೆ ಹಗಲಿರುಳು ರೋಗಿಗಳ ಸೇವೆ ಮಾಡುತ್ತಿದ್ದಾರೆ.
