ಕರೊನಾ ಕಾಟ, ಕಲಾವಿದರ ಪರದಾಟ

ಲಕ್ಷೆ್ಮೕಶ್ವರ: ವೃತ್ತಿ ರಂಗಭೂಮಿ- ನಾಟಕ ಕಂಪನಿಗಳು ಮತ್ತು ಕಲಾವಿದರು ಕರೊನಾದಿಂದಾಗಿ ಜರ್ಜರಿತರಾಗಿದ್ದಾರೆ. ಕೋವಿಡ್ ಕಾರಣದಿಂದ ಆಟ ನಿಲ್ಲಿಸಿದ್ದ ನಾಟಕ ಕಂಪನಿಗಳು ಮರು ಪ್ರಾರಂಭವಾಗಿವೆ. ಆದರೆ, ಕರೊನಾ ಭೀತಿಯೋ ಅಥವಾ ನಾಟಕ ನೋಡುವ ಪ್ರವೃತ್ತಿ ಜನರಲ್ಲಿ ಕಡಿಮೆಯಾಗಿದೆಯೋ ಗೊತ್ತಿಲ್ಲ ನಾಟಕ ನೋಡಲು ನಿರೀಕ್ಷಿತ ಪ್ರೇಕ್ಷಕರು ಬಾರದಾಗಿದ್ದಾರೆ. ಪರಿಣಾಮ ಕಲಾವಿದರ ಬದುಕು ಅತಂತ್ರವಾಗಿದೆ.

ಪಟ್ಟಣದಲ್ಲಿ 5 ತಿಂಗಳ ಹಿಂದೆ ಬಿಡಾರ ಹೂಡಿರುವ ನವಲಗುಂದದ ಶ್ರೀಗುರು ಕುಮಾರೇಶ್ವರ ನಾಟ್ಯ ಸಂಘ ನಿತ್ಯ ಎರಡು ಆಟಗಳನ್ನು ಪ್ರದರ್ಶಿಸುತ್ತಿದೆ. ಆದರೆ, ಪ್ರೇಕ್ಷಕರು ಬಾರದ್ದರಿಂದ ಕಲಾವಿದರು ಎರಡು ಹೊತ್ತಿನ ಊಟಕ್ಕೂ ಪರದಾಡಬೇಕಾದ ಪರಿಸ್ಥಿತಿ ನಿರ್ವಣವಾಗಿದೆ. ರಾಜ್ಯದಲ್ಲಿ ನಡೆಯಬೇಕಿದ್ದ ದೊಡ್ಡ ಜಾತ್ರೆಗಳು ಕರೊನಾದಿಂದಾಗಿ ರದ್ದಾಗಿವೆ. ಹೀಗಾಗಿ, ನಾಟಕ ಕಂಪನಿ ನಡೆಸುವುದು ಹೇಗೆ ಎಂಬ ಆತಂಕ ಕಂಪನಿ ಮಾಲೀಕರು ಮತ್ತು ಕಲಾವಿದರದ್ದು.

ಸಹಾಯಧನದ ನಿರೀಕ್ಷೆಯಲ್ಲಿ ಕಲಾವಿದರು: ನಾಡಿನ ಸಂಸ್ಕೃತಿ, ಕಲೆ, ಸಂಗೀತ, ಸಾಹಿತ್ಯ ಉಳಿಸಿ- ಬೆಳೆಸುವ ಕಾರ್ಯ ಮಾಡುತ್ತಿರುವ ಕಲಾವಿದರು ಇಂದು ಊಟ, ಬಟ್ಟೆಗೂ ಪರದಾಡುವ ಪರಿಸ್ಥಿತಿ ಎದುರಾಗಿದೆ. ನಾಟಕ ಟೆಂಟ್​ನಲ್ಲಿ ಹಳೆಯ ಪರದೆಗಳು, ತಗಡಿನ ಶೆಡ್, ಮಡಚಲು ಬಾರದ ಕುರ್ಚಿಗಳು, ಹರಿದ ಕಟೌಟ್, ಬ್ಯಾನರ್, ಹಳೆಯ ಹಾಮೋನಿಯಂ, ಹರಿದ ತಬಲಾ ಯಾವುದನ್ನೂ ಬದಲಾಯಿಸದಂತಹ ದುಸ್ಥಿತಿ. ಆರ್ಥಿಕ ಮುಗ್ಗಟ್ಟಿನಿಂದಾಗಿ ಕಲಾವಿದರ ಬದುಕು ಮೂರಾಬಟ್ಟೆಯಾಗಿದೆ. ಇವತ್ತಲ್ಲ ನಾಳೆ ಪರಿಸ್ಥಿತಿ ಸುಧಾರಿಸುತ್ತದೆ, ಸರ್ಕಾರ ಸಹಾಯಧನ ನೀಡುತ್ತದೆ ಎಂಬ ಆಶಾಭಾವದೊಂದಿಗೆ ನಾಟಕ ಕಲಾವಿದರು ಬದುಕು ಸಾಗಿಸುತ್ತಿದ್ದಾರೆ.

5 ಸಾವಿರ ರೂ. ಕೂಡ ಗಿಟ್ಟದು: ಮಹಿಳಾ ಕಲಾವಿದರು, ಸಹ ಕಲಾವಿದರು, ಸಂಗೀತ ಕಲಾವಿದರು, ತಾಂತ್ರಿಕ ಸಹಾಯಕರು ಸೇರಿ 20 ಕಲಾವಿದರ ತಂಡ ಇಲ್ಲಿದೆ. ಕಲಾವಿದರಿಗೆ ಗೌರವಧನ, ಊಟೋಪಚಾರ, ಆರೋಗ್ಯ, ಕಂಪನಿಯ ಇತರ ಖರ್ಚು ಸೇರಿ ದಿನಕ್ಕೆ 10 ಸಾವಿರ ರೂ. ಬೇಕು. ಆದರೆ, ನಿತ್ಯ ಸಂಜೆ ಮತ್ತು ರಾತ್ರಿ 2 ಆಟ ಪ್ರದರ್ಶಿಸಿದರೂ 5 ಸಾವಿರ ರೂ. ಸಂಗ್ರಹವಾಗುತ್ತಿಲ್ಲ. ಅಲ್ಲದೆ, ಪ್ರತಿವರ್ಷ ಕೆಲವು ನಾಟಕ ಕಂಪನಿಗಳಿಗೆ ನೀಡುವ ವಾರ್ಷಿಕ ಸಹಾಯಧನವನ್ನು ಕೂಡ ಸರ್ಕಾರ ನೀಡಿಲ್ಲ. ಹೀಗಾಗಿ, ನಾಟಕ ಕಂಪನಿ ನಿಭಾಯಿಸಿಕೊಂಡು ಹೋಗುವುದು ಕಷ್ಟವಾಗುತ್ತಿದೆ ಎನ್ನುತ್ತಾರೆ ಕಂಪನಿ ವ್ಯವಸ್ಥಾಪಕ ಕೆ.ಎನ್. ನಾಯಕ.