ನಿರಂತರ ಮಳೆಯಿಂದ ಕಾಫಿ ಫಸಲಿಗೆ ಕಂಟಕ

ಶನಿವಾರಸಂತೆ: ಕೊಡಗು ಜಿಲ್ಲೆಯಲ್ಲಿ ಕಳೆದ ಮೇ ತಿಂಗಳಿಂದ ಸುರಿಯುತ್ತಿರುವ ಗಾಳಿ, ಮಳೆಗೆ ಕಾಫಿ ಬೆಳೆಗಾರರು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಶನಿವಾರಸಂತೆ ಭಾಗದಲ್ಲಿ ಪ್ರತಿ ವರ್ಷ ಕಾಫಿ ಬೆಳೆಗಾರರು ಒಂದಲ್ಲಾ ಒಂದು ಸಮಸ್ಯೆ ಎದುರಿಸುತ್ತಿದ್ದು, ಪ್ರಾರಂಭದಲ್ಲಿ ಮಳೆ ಬಾರದೆ ತೊಂದರೆ ಆದ ನಂತರ ಮಳೆ ಹೆಚ್ಚು ಬಂದು ಮತ್ತೆ ತೊಂದರೆ ಎದುರಿಸುವಂತಾಗಿದೆ. ಈ ವರ್ಷ ಮೇ ತಿಂಗಳಿನಿಂದ ಮಳೆ ನಿಗದಿಗಿಂತ ಹೆಚ್ಚು ಬಂದಿದ್ದು, ಜೂನ್‌ನಲ್ಲೂ ಅಧಿಕ ಮಳೆ ಸುರಿದಿದೆ. ಹೀಗೆ ಮುಂದುವರಿದಿದೆ.

ಶನಿವಾರಸಂತೆಯಲ್ಲಿ ಗುರುವಾರ ನಂ.1 ಕನ್ನಡ ದಿನಪತ್ರಿಕೆ ವಿಜಯವಾಣಿ ಆಯೋಜಿಸಿದ್ದ ಸಂವಾದದಲ್ಲಿ ಕಾಫಿ ಬೆಳೆಗಾರರು ಅಳಲು ತೋಡಿಕೊಂಡರು.

ಈ ಭಾಗದಲ್ಲಿ ಕಾಫಿ ಫಸಲು ಉತ್ತಮವಾಗಿತ್ತು. ಆದರೆ ಇದೀಗ ಸುರಿಯುತ್ತಿರುವ ಮಳೆಯಿಂದ ಕಾಫಿ ನೆಲ ಕಚ್ಚುತ್ತಿದೆ. ಕೈಗೆ ಬಂದ ಫಸಲನ್ನು ಉಳಿಸಿಕೊಳ್ಳಲು ಸಾಧ್ಯವಾಗದ ಪರಿಸ್ಥಿತಿ ಇದೆ. ಜತೆಗೆ ಕಾಳುಮೆಣಸು ಆದಾಯ ತರುವ ಬೆಳೆ ಆಗಿದ್ದು ನಿರಂತರವಾಗಿ ಸುರಿಯುತ್ತಿರುವ ಮಳೆಯಿಂದ ಬಳ್ಳಿಯಲ್ಲಿ ದಾರ ಕಟ್ಟುತ್ತಿಲ್ಲ ಎಂದು ಬೆಳೆಗಾರರು ತಮ್ಮ ಅಳಲು ತೋಡಿಕೊಂಡರು.

ಇದೇ ರೀತಿ ಮಳೆ ಮುಂದುವರಿದರೆ ಕಾಫಿ ಬೆಳೆಗಾರರು ತೀರಾ ಸಂಕಷ್ಟಕ್ಕೆ ಸಿಲುಕುವ ಸಾಧ್ಯತೆ ಹೆಚ್ಚಿದೆ. ಮಳೆಗೆ ಅರೇಬಿಕಾ ಕಾಫಿ ಬೆಳೆಯಲ್ಲಿ ಕೊಳೆ ರೋಗ ಸೇರಿದಂತೆ ಕಾಂಡ ಕೊರಕ ರೋಗ ಹೆಚ್ಚಾಗಿದ್ದು, ಇದನ್ನು ನಿಯಂತ್ರಣ ಮಾಡಲು ಸಾಧ್ಯವಾಗುತ್ತಿಲ್ಲ. ಗಾಳಿಗೆ ದೊಡ್ಡ ಮರಗಳು ಕಾಫಿ ಗಿಡಗಳ ಮೇಲೆ ಬೀಳುತ್ತಿರುವುದರಿಂದ ಇನ್ನಷ್ಟು ತೊಂದರೆ ಎದುರಿಸುವಂತಾಗಿದೆ ಎನ್ನುತ್ತಾರೆ ಕಾಫಿ ಬೆಳೆಗಾರರ ಸಂಘದ ಅಧ್ಯಕ್ಷ ಉಮಾಶಂಕರ್.

ಕಾಫಿ ತೋಟದಲ್ಲಿ ಇನ್ನು ಅನೇಕ ಕೆಲಸಗಳು ಬಾಕಿ ಉಳಿದಿವೆ. ಪ್ರತಿವರ್ಷ ಜೂನ್ ನಂತರ ಮಳೆಯಾಗುತ್ತಿತ್ತು. ಆದರೆ ಈ ಬಾರಿ ಒಂದು ತಿಂಗಳು ಮುಂಚೆನೇ ಮಳೆ ಆಗಿರುವುದರಿಂದ ಮರದ ರೆಂಬೆ ತೆಗೆಸಲು ಸಾಧ್ಯವಾಗಿಲ್ಲ, ತೋಟಕ್ಕೆ ಹಾಕಿದ ರಾಸಾಯನಿಕ ಗೊಬ್ಬರ ನೀರು ಪಾಲಾಗಿದೆ. ಒಂದೆಡೆ ರಸಗೊಬ್ಬರ ಬೆಲೆ ಗಗನಕ್ಕೆ ಏರಿದೆ. ಇನ್ನೊಂದೆಡೆ ಕಾರ್ಮಿಕರ ವೇತನ ಹೆಚ್ಚಾಗುತ್ತಿದೆ. ಕಾಫಿ ಬೆಳೆಗರಾರು ಕಾಫಿ ತೋಟವನ್ನು ಕಾಪಾಡಿಕೊಳ್ಳಲು ಹರಸಾಹಸ ಪಡುವಂತಾಗಿದೆ ಎಂದು ಮೀನಾ ಗಿರೀಶ್ ಹೇಳಿದರು.

ಕಾಫಿ ಹಾಗೂ ಕಾಳು ಮೆಣಸು ಉತ್ತಮ ಬೆಲೆ ಪ್ರಾರಂಭದಲ್ಲಿ ಇತ್ತು. ಆದರೆ ಅನೇಕ ಬೆಳೆಗಾರರು ಮಾರಾಟ ಮಾಡಿಲ್ಲ. ಜೂನ್ ಅಥವಾ ಜುಲೈ ತಿಂಗಳಿನಲ್ಲಿ ಪ್ರತಿ ವರ್ಷದಂತೆ ಈ ವರ್ಷವೂ ಮಾರುಕಟ್ಟೆಯಲ್ಲಿ ಬೆಲೆ ಹೆಚ್ಚಾಗುತ್ತದೆ ಎಂದು ಬೆಳೆದ ಕಾಫಿ ಹಾಗೂ ಕಾಳು ಮೆಣಸನ್ನು ಸಂಗ್ರಹಣೆ ಮಾಡಿ ಇಟ್ಟಿದ್ದಾರೆ. ಆದರೆ ನಿರಂತರವಾಗಿ ಮಳೆ ಬರುತ್ತಿರುವುದರಿಂದ ಮಾರುಕಟ್ಟೆಯಲ್ಲಿ ಬೆಳೆಯಲ್ಲೂ ತುಂಬ ಏರಿಳಿತವಾಗಿದ್ದು ಇದು ಇನ್ನಷ್ಟು ಸಂಕಷ್ಟಕ್ಕೆ ಸಿಲುಕುವಂತೆ ಮಾಡಿದೆ.