ಬಟಾಬಯಲಾದ ಜನತಾ ಬಜಾರ್

ಹುಬ್ಬಳ್ಳಿ: ಜನತಾ ಬಜಾರ್ ಮಾರುಕಟ್ಟೆ ಪ್ರದೇಶ ತೆರವು ಗುರುವಾರವೂ ಮುಂದುವರಿಯಿತು. ವ್ಯಾಪಾರಿಗಳು ಖಾಲಿ ಮಾಡಿಕೊಟ್ಟ ಅಂಗಡಿ, ಕಟ್ಟೆಗಳನ್ನು ಜೆಸಿಬಿ ಬಳಸಿ ನೆಲಸಮಗೊಳಿಸಲಾಗಿದೆ.

ತರಕಾರಿ, ಹೂವು-ಹಣ್ಣು, ಮೊಟ್ಟೆ, ಬಾಳೆ ಗಿಡ, ಪೂಜಾ ಸಾಮಗ್ರಿ, ಇತ್ಯಾದಿ ವಸ್ತುಗಳನ್ನು ಮಾರಾಟ ಮಾಡುತ್ತಿದ್ದ ಬಹುತೇಕ ವ್ಯಾಪಾರಿಗಳು ಬುಧವಾರವೇ ಸಾಮಾನು-ಸರಂಜಾಮುಗಳನ್ನು ಬೇರೆಡೆ ಸಾಗಿಸಿ ಅಂಗಡಿ, ಕಟ್ಟೆಗಳನ್ನು ಖಾಲಿ ಮಾಡಿದ್ದರು. ಹೀಗೆ ಖಾಲಿ ಮಾಡಿದ ಕಟ್ಟಡಗಳನ್ನು ಬೆಳಗ್ಗೆ 5.30ರಿಂದ ಜೆಸಿಬಿ ಬಳಸಿ ಕೆಡವಲಾಯಿತು. ಕೆಲ ವ್ಯಾಪಾರಿಗಳು ಅಂಗಡಿಯ ಸಾಮಾನುಗಳನ್ನು ಗುರುವಾರ ಮಧ್ಯಾಹ್ನದವರೆಗೂ ಸಾಗಿಸುತ್ತಿದ್ದರು. ಸಂಜೆ ವೇಳೆಗೆ ಜಿ ಪ್ಲಸ್ 1 ಮಾದರಿಯ ಸಂಕೀರ್ಣ ಹೊರತುಪಡಿಸಿ ಜನತಾ ಬಜಾರ್ ಮಾರುಕಟ್ಟೆ ಪ್ರದೇಶ ಗ್ರೌಂಡ್ ಜಿರೋ (ನೆಲಸಮ) ಮಾಡಲಾಗಿತ್ತು.

ಜಿ ಪ್ಲಸ್ 1 ಮಾದರಿಯ ಕಟ್ಟಡದಲ್ಲಿ ಕಿರಾಣಿ ಸಾಮಾನು, ಸ್ಟೇಷನರಿ ಸೇರಿ 29 ಮಳಿಗೆಗಳಿವೆ. ಇವರಲ್ಲಿ ನೆಲ ಮಹಡಿ ಅಂಗಡಿಕಾರರಿಗೆ ಹೊಸೂರಿನಲ್ಲಿ ಹಾಗೂ ಮೊದಲ ಮಹಡಿ ಅಂಗಡಿಕಾರರಿಗೆ ಜನತಾ ಬಜಾರ್ ಮಾರುಕಟ್ಟೆಯಲ್ಲಿನ ಜಿ ಪ್ಲಸ್ 2 ಮಾದರಿ ಕಟ್ಟಡದಲ್ಲಿ ಅವಕಾಶ ಕಲ್ಪಿಸಲಾಗಿದೆ. ಈಗಾಗಲೇ ಕೆಲವರು ಸ್ಥಳಾಂತರಗೊಂಡಿದ್ದು, ಇನ್ನುಳಿದವರು ಸ್ಥಳಾಂತರಗೊಳ್ಳಲು 2 ದಿನಗಳ ಕಾಲಾವಕಾಶ ಕೋರಿದ್ದಾರೆ. ಜಿ ಪ್ಲಸ್ 1 ಮಾದರಿ ಕಟ್ಟಡವನ್ನು ಶನಿವಾರ ಅಥವಾ ಭಾನುವಾರ ನೆಲಸಮಗೊಳಿಸಲಾಗುವುದು ಎಂದು ಹು-ಧಾ ಸ್ಮಾರ್ಟ್ ಸಿಟಿ ಲಿಮಿಟೆಡ್ ವಿಶೇಷಾಧಿಕಾರಿ ಎಸ್.ಎಚ್. ನರೇಗಲ್ ತಿಳಿಸಿದ್ದಾರೆ.

ಹೊಸೂರಿನಲ್ಲಿ 51 ಮಳಿಗೆಗಳನ್ನು ನಿರ್ವಿುಸಲಾಗಿದೆ. ತಮಗೆ ಹಂಚಿಕೆಯಾದ ಮಳಿಗೆಗಳಿಗೆ ಒಬ್ಬೊಬ್ಬರಾಗಿಯೇ ಸ್ಥಳಾಂತರಗೊಳ್ಳುತ್ತಿದ್ದಾರೆ. ಪೂಜೆ ಮಾಡಿ ಹೊಸ ಮಳಿಗೆಗೆ ಪ್ರವೇಶ ಮಾಡಿದರು. ನಂತರ ಸಾಮಾನುಗಳನ್ನು ತಂದು ಜೋಡಿಸಿಟ್ಟುಕೊಂಡರು.

ಇನ್ನೊಂದೆಡೆ ಜನತಾ ಬಜಾರ್​ನ ತರಕಾರಿ, ಹೂವು ಹಣ್ಣು ಮಾರಾಟಗಾರರು, ಬೀದಿ ಬದಿ ವ್ಯಾಪಾರಿಗಳು ಗೋಕುಲ ರಸ್ತೆ ಕ್ಲಾರ್ಕ್ಸ್ ಇನ್ ಹೋಟೆಲ್ ಪಕ್ಕದ ಸ್ಥಳಕ್ಕೆ ಸ್ಥಳಾಂತರಗೊಳ್ಳಲಿಲ್ಲ. ಇಲ್ಲಿ ವ್ಯಾಪಾರಿಗಳು ಕುಳಿತುಕೊಳ್ಳುವಂತೆ ಸ್ಥಳ ಗುರುತು ಹಾಕುವ ಮಾರ್ಕಿಂಗ್ ಕೆಲಸವನ್ನು ಗುರುವಾರ ನಡೆಸಲಾಗಿದೆ. ಶೆಡ್​ನಲ್ಲಿ 20 ಜನ ವ್ಯಾಪಾರಿಗಳು ಕುಳಿತುಕೊಳ್ಳಲು ತಲಾ 6 ಅಡಿ ಪ್ಲಸ್ 6 ಅಡಿ ಜಾಗವನ್ನು ಗುರುತಿಸಲಾಗಿದೆ. ಉಳಿದ ವ್ಯಾಪಾರಿಗಳಿಗೆ ಪೇವರ್ಸ್ ಮೇಲೆ ಕುಳಿತುಕೊಳ್ಳಲು ಅವಕಾಶ ಕಲ್ಪಿಸಲಾಗಿದೆ. ಆದರೆ, ಒಟ್ಟು 177 ಬೀದಿ ಬದಿ ವ್ಯಾಪಾರಿಗಳಿಗೆ ಇಲ್ಲಿ ಸ್ಥಳಾವಕಾಶ ಕಲ್ಪಿಸುವುದು ಕಷ್ಟಕರವಾಗಿದೆ. ಶುಕ್ರವಾರವೂ ತರಕಾರಿ ಮಾರುಕಟ್ಟೆ ನೆಲೆಗೊಳ್ಳುವ ನಿರೀಕ್ಷೆ ಇಲ್ಲ.

ಸ್ಮಾರ್ಟ್​ಸಿಟಿ ಯೋಜನೆಯ 18.35 ಕೋಟಿ ರೂ. ವೆಚ್ಚದಲ್ಲಿ ಜನತಾ ಬಜಾರ್ ಮಾರುಕಟ್ಟೆಯಲ್ಲಿ ನೂತನ ಮಾರುಕಟ್ಟೆ ಸಂಕೀರ್ಣ ನಿರ್ವಣವಾಗಲಿದೆ. 18 ತಿಂಗಳ ಅವಧಿಯಲ್ಲಿ ನಿರ್ಮಾಣ ಕಾಮಗಾರಿ ಪೂರ್ಣಗೊಳ್ಳಲಿದೆ ಎಂದು ಹು-ಧಾ ಸ್ಮಾರ್ಟ್ ಸಿಟಿ ಲಿಮಿಟೆಡ್ ಕಂಪನಿ ಹೇಳಿದೆ. ಮೇ. ಎಸ್​ಕೆಎಸ್ ಕಾರ್ಕಳ ಇನ್ಪ್ರಾ ಪ್ರಾಜೆಕ್ಟ್ಸ್ ಪ್ರೖೆವೇಟ್ ಲಿಮಿಟೆಡ್ ಗುತ್ತಿಗೆ ಪಡೆದಿದೆ.