11 ಲಕ್ಷ ಬಡ್ಡಿ ಪಾವತಿಸುವಂತೆ ಆದೇಶಿಸಿದ ನ್ಯಾಯಾಲಯ
ಪಬ್ಲಿಕ್ ಪ್ರಾವಿಡೆಂಟ್ ಫಂಡ್(ಪಿ.ಪಿ.ಎಫ್) ನಲ್ಲಿ ಹಣ ತೊಡಗಿಸಿದ ಕಾರ್ಕಳದ ಹಿರಿಯ ನಾಗರಿಕ ವೆಂಕಟೇಶ್ ಕಾಮತ್ ಅವರಿಗೆ 11 ಲಕ್ಷ ರೂ. ಬಡ್ಡಿ ಮೊತ್ತವನ್ನು ಪಾವತಿಸಲು ಜಿಲ್ಲಾ ಬಳಕೆದಾರರ ಆಯೋಗ ಆದೇಶಿಸಿದೆ.
2001ರಲ್ಲಿ ತೆರೆದ ಖಾತೆ 2016ರಲ್ಲಿ ಮುಕ್ತಾಯಗೊಂಡಿದೆ. ಆದರೆ ಪಿ.ಪಿ.ಎಫ್ ಖಾತೆಯನ್ನು ವಿಸ್ತರಿಸಲು ಕಾನೂನಿನಲ್ಲಿ ಅವಕಾಶವಿದೆ ಎಂದು ಅಂಚೆ ಮಾಸ್ಟರರು ನೀಡಿದ ಮಾರ್ಗದರ್ಶನದಂತೆ 2026ರವರೆಗೆ ಮುಂದುವರಿಸಿದರು. ಆದರೆ ಕಳೆದ ವರ್ಷ ಇವರಿಗೆ ನೋಟಿಸ್ ನೀಡಿ ನಿಮ್ಮ ಖಾತೆಯನ್ನು ಮುಕ್ತಾಯಗೊಳಿಸಲಾಗಿದೆ. 2016ರನಂತರದ ಹಣಕ್ಕೆ ಬಡ್ಡಿ ನೀಡುವುದಿಲ್ಲ. ಅಸಲು ಮಾತ್ರ ಕೊಡುತ್ತೇವೆ ಎಂಬುದಾಗಿ ಹೇಳಿ ರೂ.22,19,616 ಮೊತ್ತಕ್ಕೆ ಚೆಕ್ ನೀಡಿದ್ದರು. ಇದೇ ವೇಳೆ, ಕಾಮತರ ಪಿ.ಪಿ.ಎಫ್ ಖಾತೆಯಿಂದ ಹಿಂಪಡೆಯಲಾದ ಸುಮಾರು 11,00,444 ರೂ. ಪಡೆಯಲು ಉಡುಪಿಯ ಬಳಕೆದಾರರ ನ್ಯಾಯಾಲಯದಲ್ಲಿ ದಾವೆ ಹೂಡಲಾಯಿತು.
ಸುದೀರ್ಘ ವಿಚಾರಣೆಯ ನಂತರ ಇದೀಗ ಬಳಕೆದಾರರ ಆಯೋಗವು ತೀರ್ಪು ಪ್ರಕಟಿಸಿದ್ದು ಕಾಮತರ ಖಾತೆಯ ಬಡ್ಡಿ ಹಣ ಸುಮಾರು 11,00,444 ರೂ. ಹಾಗೂ ಅಂಚೆ ಇಲಾಖೆಯ ಸೇವಾ ನ್ಯೂನತೆಗಾಗಿ 50,000 -ರೂ. ನೀಡಲು ಆದೇಶಿಸಿದೆ. ಆದರೆ ಆದೇಶ ಬಂದು 3 ತಿಂಗಳಾದರೂ ಹಣ ಪಾವತಿಯಾಗಿಲ್ಲ. ಹೀಗಾಗಿ ನ್ಯಾಯಾಂಗ ನಿಂದನೆ ಪ್ರಕರಣ ದಾಖಲಿಸಲಾಗುವುದು ಎಂದು ಹೇಳಿದರು. ವೆಂಕಟೇಶ್ ಕಾಮತ್ ಉಪಸ್ಥಿತರಿದ್ದರು.
