ಉದ್ದೇಶಿತ ಯೋಜನೆಯು ಎರಡೂ ಕೆರೆಗಳ ಮಧ್ಯವಿರುವ ಜೌಗು ಪ್ರದೇಶದಲ್ಲಿ ಹಾದುಹೋಗಲಿವೆ. ಈಗಲೂ ಅರ್ಧದಷ್ಟು ಪ್ರದೇಶದಲ್ಲಿ ಖಾಲಿ ಜಾಗವಿದೆ. ಕೆಲ ಹೊಸ ಬಡಾವಣೆಗಳ ಮೂಲಕ ಹಾದುಹೋಗುವ ರಾಜಕಾಲುವೆ ಬಳಿಯಷ್ಟೇ ಕಟ್ಟಡಗಳಿವೆ. ಆದರೆ, ರಾಜಕಾಲುವೆ ವಿಸ್ತರಿಸುವ ಭರದಲ್ಲಿ ಜೌಗು ಪ್ರದೇಶವನ್ನೂ ಸೇರಿಸಿಕೊಂಡು 100 ಅಡಿ ವಿಸ್ತಾರಕ್ಕೆ ಹಿಗ್ಗಿಸುವ ಔಚಿತ್ಯದ ಬಗ್ಗೆ ಪಾಲಿಕೆ ಸ್ಪಷ್ಟನೆ ನೀಡಿಲ್ಲ. ಮೂರು ವರ್ಷಗಳ ಹಿಂದೆ ಯಲಹಂಕ ಕೆರೆ ಕೋಡಿ ಬಳಿ ಪ್ರವಾಹ ಉಂಟಾಗಿ ಹಲವು ಮನೆಗಳು ಹಾಗೂ ಅಪಾರ್ಟ್ಮೆಂಟ್ಗಳಿಗೆ ನೀರು ನುಗ್ಗಿತ್ತು. ಯಲಹಂಕದ ಇತಿಹಾಸದಲ್ಲಿ ಮೊದಲ ಬಾರಿಗೆ ಉಂಟಾದ ಈ ಅವಘಡದಿಂದಾಗಿ ಸ್ಥಳಿಯರು ಅಚ್ಚರಿ ವ್ಯಕ್ತಪಡಿಸಿದ್ದರು. ಒಂದೆರಡು ಅಪಾರ್ಟ್ಮೆಂಟ್ಗಳು ರಾಜಕಾಲುವೆ ಒತ್ತುವರಿ ಮಾಡಿಕೊಂಡಿದ್ದಕ್ಕೆ ಪ್ರವಾಹ ಉಂಟಾಗಲು ಕಾರಣ ಎಂಬುದನ್ನು ಪಾಲಿಕೆ ತನಿಖೆಯಿಂದ ಬಹಿರಂಗಗೊಂಡಿತ್ತು. ಒತ್ತುವರಿ ತೆರವುಗೊಳಿಸಿ ಕೋಡಿ ಭಾಗದಿಂದ ಕೆರೆನೀರು ಸರಾಗವಾಗಿ ಹರಿದುಹೋಗಲು ವ್ಯವಸ್ಥೆ ಮಾಡುವುದಾಗಿ ಅಧಿಕಾರಿ ವರ್ಗ ಸಮಜಾಯಿಷಿ ನೀಡಿತ್ತಾದರೂ, ಬಳಿಕ ಕೆಲಸ ಮಾಡಲಿಲ್ಲ. ಆದರೂ, ನೀರುಗಾಲುವೆಯನ್ನು ಕಾಂಕ್ರೀಟ್ ತಡೆಗೋಡೆ ಮಾದರಿಯಲ್ಲಿ ಅಭಿವೃದ್ಧಿಪಡಿಸುವ ಕೆಲಸವಷ್ಟೇ ಕೈಗೊಳ್ಳಲಾಯಿತು.
