ಮೈಸೂರು: ಬಸವಣ್ಣನವರ ಕಾಲದಲ್ಲಿಯೇ ಸಂಸತ್ತಿನ ರೂಪುರೇಷೆಗಳು ಪ್ರಬುದ್ಧಮಾನಕ್ಕೆ ಬಂದಿತ್ತು ಎನ್ನುವುದನ್ನು ಯಾರಿಂದಲೂ ಅಲ್ಲಗಳೆಯಲು ಸಾಧ್ಯವಿಲ್ಲ ಎಂದು ಹೈಕೋರ್ಟ್ ನ್ಯಾಯಮೂರ್ತಿ ಕೃಷ್ಣ ಎಸ್.ದೀಕ್ಷಿತ್ ಹೇಳಿದರು.
ಮೈಸೂರು ವಕೀಲರ ಸಂಘದಿಂದ ನಗರದ ನ್ಯಾಯಾಲಯದ ಆವರಣದಲ್ಲಿ ಶನಿವಾರ ಆಯೋಜಿಸಿದ್ದ ಬಸವ ಜಯಂತಿ ಕಾರ್ಯಕ್ರಮ ಉದ್ಘಾಟಿಸಿ ಅವರು ಮಾತನಾಡಿದರು.
ಸಂಸತ್ತಿನ ರೂಪುರೇಷೆಗಳು ಬಸವಣ್ಣನ ಕಾಲದಲ್ಲಿ ಪ್ರಬುದ್ಧಮಾನಕ್ಕೆೆ ಬಂದಿತ್ತು ಎನ್ನುವುದನ್ನು ಯಾರಿಂದಲೂ ಅಲ್ಲಗಳೆಯಲು ಸಾಧ್ಯವಿಲ್ಲ. ಇದಕ್ಕೆೆ ಸಾಕ್ಷಿ, ಪುರಾವೆಗಳೂ ಇವೆ. 12ನೇ ಶತಮಾನದಲ್ಲಿ ಸ್ಥಾಪನೆ ಮಾಡಿದ ಅನುಭವ ಮಂಟಪ ಒಂದು ಅದ್ಭುತ ಸಂಸತ್ತಿನಂತಿತ್ತು ಎಂದು ಬಣ್ಣಿಸಿದರು.
ಬಸವಣ್ಣನವರ ಅನುಭವ ಮಂಟಪದಲ್ಲಿ ಚಮ್ಮಾರ, ಕುಂಬಾರ, ಕಮ್ಮಾರ ಸೇರಿದಂತೆ ಎಲ್ಲರಿಗೂ ಅವಕಾಶ ನೀಡಲಾಗಿತ್ತು. ಎಲ್ಲರಿಗೂ ರೊಟ್ಟಿ, ಅನ್ನ ಬಡಿಸಲಾಗುತ್ತಿತ್ತು. ಜತೆಗೆ ಚರ್ಚೆಯನ್ನೂ ಮಾಡಲಾಗುತ್ತಿತ್ತು. ಎಲ್ಲದಕ್ಕಿಂತ ಹೆಚ್ಚಾಗಿ ಸ್ತ್ರೀಯರಿಗೆ ಬಹಳ ವಿಶೇಷ ಸ್ಥಾನವನ್ನು ನೀಡಲಾಗಿತ್ತು ಎಂದು ವಿವರಿಸಿದರು.
ಅಲ್ಲಿದ್ದ ಎಲ್ಲರೂ ಅಧ್ಯಯನಶೀಲರಾಗಿದ್ದರು. ಬಸವಣ್ಣನವರು ವೇದ-ಉಪನಿಷತ್ತುಗಳನ್ನು ವಿರೋಧಿಸಲಿಲ್ಲ. ಅಲ್ಲಿದ್ದ ಸಾರವನ್ನು ಸರಳೀಕೃತವಾಗಿ ಜನಸಾಮಾನ್ಯರಿಗೆ ಅರ್ಥವಾಗುವಂತೆ ತಿಳಿಸಿದ್ದಾರೆ. ಕಾಯಕವೇ ಕೈಲಾಸ ಎನ್ನುವುದು ಶುಕ್ರ ನೀತಿಯಲ್ಲಿ ಬರುವ ಒಂದು ಮಂತ್ರ. ಅದನ್ನು ಸಂಸ್ಕೃತದಲ್ಲಿ ಹೇಳಿದರೇ ಯಾರಿಗೂ ಅರ್ಥವಾಗುವುದಿಲ್ಲ. ಆದರೆ ದನ ಕಾಯುವುದು, ಕಟ್ಟಿಗೆ ಕೆಲಸ ಮಾಡುವುದು, ಕುಂಬಾರಿಕೆ ಮಾಡುವುದು, ಚಮ್ಮಾರಿಕೆ ಮಾಡುವುದು ಸೇರಿದಂತೆ ಇನ್ನೂ ಹಲವು ಕೆಲಸ ಮಾಡುವುದೆಲ್ಲವೂ ಕಾಯಕವೇ ಎಂದು ಬಸವಣ್ಣ ಸರಳವಾಗಿ ತಿಳಿಸಿದ್ದಾರೆ ಎಂದು ವಿಶ್ಲೇಷಿಸಿದರು.
