ತಂಡದೊಂದಿಗೆ ಆಗಮಸಿದ್ದ ಯುನೆಸ್ಕೊ ಸಹ ನಿರ್ದೇಶಕಿ ಜ್ಯೋತಿ ಹೊಸಅಗ್ರಹಾರ ಮಾತನಾಡಿ, ದಶಕದ ಹಿಂದೆಯೇ ಹಳೇಬೀಡು ಮತ್ತು ಬೇಲೂರು ಪಟ್ಟಣದಲ್ಲಿರುವ ವಿವಿಧ ಪಾರಂಪರಿಕ ಸ್ಥಳಗಳನ್ನು ನಾವು ಗುರುತಿಸಿ ಯುನೆಸ್ಕೊ ಮಾನ್ಯತೆ ಪಡೆಯಲು ಯೋಜನೆ ರೂಪಿಸಿದ್ದೆವು. ಅದು ಕಳೆದ ವರ್ಷ ಅಂದರೆ 2023ರ ಸೆಪ್ಟೆಂಬರ್ನಲ್ಲಿ ಸಾಕಾರಗೊಂಡಿದೆ. ಪ್ರಾಚೀನ ಪರಂಪರೆಯನ್ನು ಉಳಿಸಲು ಯಾವೆಲ್ಲ ಮಾರ್ಗಗಳನ್ನು ಅನುಸರಿಸಬೇಕು ಎಂಬುದರ ಬಗ್ಗೆ ಸಂಸ್ಥೆಗೆ ಅಗಾಧ ಅನುಭವವಿದೆ. ಇಂತಹ ಸ್ಮಾರಕಗಳ ಸಂರಕ್ಷಣೆಯು ಸಂಯೋಜನೆ, ಸಹಕಾರ ಮತ್ತು ಸಕಾರಾತ್ಮಕ ಆಡಳಿತದಿಂದ ಮಾತ್ರ ಯಶ್ವಿಯಾಗುತ್ತದೆ. ಮಾನವ ಪೀಳಿಗೆಯ ಬಗ್ಗೆ ತಿಳಿದುಕೊಳ್ಳಲು ಹೊರಟರೆ, ಶಿಲಾಯುಗದಿಂದಲೂ ಆತನು ಚಿತ್ರಕಲೆ ಮತ್ತು ಶಿಲ್ಪಕಲೆಯಲ್ಲಿ ವಿಕಾಸಗೊಳ್ಳುತ್ತಾ ಬಂದಿರುವುದು ಗೊತ್ತಾಗುತ್ತದೆ. ಅಂತಹ ಪರಂಪರೆಯನ್ನು ಯಾವ ಬೆಲೆ ತೆತ್ತಾದರೂ ನಾವು ಉಳಿಸಿಕೊಳ್ಳಬೇಕಾಗುತ್ತದೆ ಎಂದು ಹೇಳಿದರು.
