ಹೃದಯಿ ಶಿವ ಗೌರವ ಗ್ರಂಥ ಕುರಿತು ಮಾತನಾಡಿದ ಖ್ಯಾತ ವಾಗ್ಮಿ ಪ್ರೊ.ಎಂ.ಕೃಷ್ಣೇಗೌಡ, ಮಂಡ್ಯದ ಕ್ರಿಯಾಜ್ಞಾನಕ್ಕೆ ಬಿ.ಶಿವಲಿಂಗಯ್ಯ ಅವರು ನಿದರ್ಶನ. ಸಮಾಜಕ್ಕೆ ಅವರು ನೀಡಿರುವ ಕೊಡುಗೆ ಪ್ರತ್ಯಕ್ಷ ಮತ್ತು ಪರೋಕ್ಷವಾಗಿದೆ. ಅವರು ರಚಿಸಿರುವ ‘ಕಾವೇರಿ ಪ್ರಕೃತಿಯ ಪ್ರಸಾದ-ಮನುಷ್ಯರ ವಿವಾದ ಓದುಗರಿಗೆ ಅನೇಕ ಮಾಹಿತಿಗಳನ್ನು ನೀಡುತ್ತವಲ್ಲದೆ ಜ್ಞಾನದ ಕಣಜವಾಗಿ ಕಂಡುಬರುತ್ತದೆಂದು ಬಣ್ಣಿಸಿದರು.
ಮಳೆ ನೀರಿನಿಂದ ಉಂಟಾಗುವ ಪ್ರವಾಹ ನಿರ್ವಹಣೆ ಹೇಗೆ ಎಂಬ ಕುರಿತು ಡಾ.ಬಿ.ಶಿವಲಿಂಗಯ್ಯ ಅವರು 1980ರಲ್ಲೇ ಕೆನಡಾದಲ್ಲಿ ಪ್ರಬಂಧ ಮಂಡಿಸಿದ್ದರು ಎಂಬುದು ಎಲ್ಲರಿಗೂ ಅಚ್ಚರಿಯ ಸಂಗತಿ. ಇಂದು ಬೆಂಗಳೂರು, ಚೈನ್ಯನಂತಹ ನಗರಗಳಲ್ಲಿ ಮಳೆ ನೀರಿನ ಪ್ರವಾಹ ಜನಜೀವನವನ್ನೇ ಸ್ತಬ್ಧಗೊಳಿಸುತ್ತಿವೆ. ಈಗ ಸರ್ಕಾರಗಳು ಇದರ ನಿರ್ವಹಣೆ ಹೇಗೆ ಎಂದು ತಲೆಕೆಡಿಸಿಕೊಂಡಿದ್ದರೆ, ಶಿವಲಿಂಗಯ್ಯ ಅವರು 40 ವರ್ಷದ ಹಿಂದೆಯೇ ಆ ಬಗ್ಗೆ ಅಧ್ಯಯನ ನಡೆಸಿದ್ದರೆಂದರೆ ಅವರ ಕ್ರಿಯಾಶಕ್ತಿಯನ್ನು ನಾವು ಅರಿಯಬಹುದು. ಹಾಗಾಗಿ ಅವರಿಗೆ ಸಾಕಷ್ಟು ಅವಕಾಶಗಳು ಸಿಗಬೇಕಿತ್ತು. ಎಸ್.ಎಂ.ಕೃಷ್ಣ ಅವರಿಗೇ ಪ್ರಧಾನಮಂತ್ರಿಯಾಗುವ ಅವಕಾಶ ಬಂದಿತ್ತು. ಆದರೆ ಕೈ ತಪ್ಪಿತಲ್ಲ. ಅದೇ ರೀತಿ ಶಿವಲಿಂಗಯ್ಯ ಅವರಿಗೂ ಅವಕಾಶಗಳು ಕೈತಪ್ಪಿವೆ ಎಂದು ಅಭಿಪ್ರಾಯಪಟ್ಟರು.
ಆದಿಚುಂಚನಗಿರಿ ಮಠದ ಪೀಠಾಧ್ಯಕ್ಷ ಡಾ.ನಿರ್ಮಲಾನಂದನಾಥ ಸ್ವಾಮೀಜಿ ಸಾನಿಧ್ಯ ವಹಿಸಿದ್ದರು. ಕೊಮ್ಮೇರಹಳ್ಳಿ ಶಾಖಾ ಮಠದ ಮುಖ್ಯಸ್ಥ ಪುರುಷೋತ್ತಮಾನಂದನಾಥ ಸ್ವಾಮೀಜಿ, ವಿಧಾನ ಪರಿಷತ್ ಮಾಜಿ ಉಪಸಭಾಪತಿ ಮರಿತಿಬ್ಬೇಗೌಡ, ಶಾಸಕ ರವಿಕುಮಾರ ಗಣಿಗ, ಮಾಜಿ ಸಚಿವರಾದ ಸಿ.ಎಸ್.ಪುಟ್ಟರಾಜು, ಎಂ.ಎಸ್.ಆತ್ಮಾನಂದ, ಮಾಜಿ ಶಾಸಕ ಡಾ.ಕೆ.ಅನ್ನದಾನಿ, ವಿಧಾನ ಪರಿಷತ್ ಮಾಜಿ ಸದಸ್ಯ ಕೆ.ಟಿ.ಶ್ರೀಕಂಠೇಗೌಡ, ಎಸ್ಬಿಇಟಿ ಕಾರ್ಯದರ್ಶಿ ಮೀರಾಶಿವಲಿಂಗಯ್ಯ, ಅಭಿನಂದನಾ ಸಮಿತಿ ಅಧ್ಯಕ್ಷ ಡಾ.ರಾಮಲಿಂಗಯ್ಯ ಇತರರಿದ್ದರು.
ಕಾರ್ಯಕ್ರಮಕ್ಕೂ ಮುನ್ನ ಗಣ್ಯರನ್ನು ಪೂರ್ಣಕುಂಭ ಸ್ವಾಗತದೊಂದಿಗೆ ಮೆರವಣಿಗೆ ಮೂಲಕ ವೇದಿಕೆಗೆ ಕರೆತರಲಾಯಿತು. ವೇದಿಕೆಯಲ್ಲಿ ಡಾ.ಬಿ.ಶಿವಲಿಂಗಯ್ಯ ಅವರು ಬೆಳೆದುಬಂದ ಹಾದಿ, ಸಾಧನೆಗಳು ಮತ್ತು ಸಂದ ಗೌರವಗಳ ಕುರಿತು ಕಿರುಚಿತ್ರ ಪ್ರದರ್ಶನ ನಡೆಯಿತು.
