ತಾಲೂಕಿನ ಕುಮಟಾ ರಸ್ತೆಯ ಬೆಣ್ಣೆ ಹೊಳೆ ಜಲಪಾತ, ಮುರೇಗಾರ್ ಜಲಪಾತ, ಶಿವಗಂಗಾ ಜಲಪಾತ ಮತ್ತಿತರೆಡೆ ಈ ರೀತಿಯ ಫಲಕಗಳು ಪ್ರವಾಸಿಗರು ಗೊಂದಲಗೊಳ್ಳುವಂತೆ ಮಾಡಿದೆ. ಜೂನ್ ಮತ್ತು ಜುಲೈ ತಿಂಗಳಿನಲ್ಲಿ ಗಾಳಿ-ಅಬ್ಬರದ ಮಳೆ ಆರಂಭಗೊಂಡಾಗ ಪ್ರವಾಸಿ ತಾಣಗಳ ಭೇಟಿ ಕಷ್ಟಕರವಾಗಿತ್ತು. ನೀರಿನ ಪ್ರವಾಹ ಸಹ ಜಾಸ್ತಿ ಇತ್ತು. ಕೆಲ ಉತ್ಸಾಹಿಗಳು ಮಳೆ ಗಾಳಿಯನ್ನೂ ಲೆಕ್ಕಿಸದೇ ಜಲಪಾತಗಳಿಗೆ ತೆರಳಿ ನೀರಿಗಿಳಿಯುವ ದುಸ್ಸಾಹಸ ನಡೆಸುತ್ತಿದ್ದರು. ಇದರಿಂದಾಗುವ ಅಪಾಯ ತಪ್ಪಿಸುವ ಸಲುವಾಗಿ ಅರಣ್ಯ ಮತ್ತು ಪೊಲೀಸ್ ಇಲಾಖೆ ಈ ಪ್ರವಾಸಿ ತಾಣಗಳಲ್ಲಿ ಎಚ್ಚರಿಕೆ ಹಾಗೂ ಪ್ರವಾಸಿ ತಾಣದ ಪ್ರವೇಶ ನಿಷೇಧಿಸಿ ಫಲಕ ಅಳವಡಿಸಿದ್ದರು. ಈಗ ಮಳೆ ನಿಂತ ಕಾರಣ ಪ್ರವಾಸಿಗರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸುತ್ತಿದ್ದು, ಫಲಕಗಳು ಗೊಂದಲ ಮೂಡಿಸುತ್ತಿವೆ.
