ಅತ್ತಾವರ ಕೆಎಂಸಿ ಆಸ್ಪತ್ರೆಯಲ್ಲಿ ಸಮಗ್ರ ಬೊಜ್ಜು ಕ್ಲಿನಿಕ್

ಮಂಗಳೂರು: ಬೊಜ್ಜು ಮತ್ತು ಮೆಟಾಬಾಲಿಕ್ ಅಸ್ವಸ್ಥತೆಗಳು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಮಂಗಳೂರಿನ ಅತ್ತಾವರದ ಕೆಎಂಸಿ ಆಸ್ಪತ್ರೆಯಲ್ಲಿ ಸಮಗ್ರ ಬೊಜ್ಜು ಮತ್ತು ಮೆಟಾಬಾಲಿಕ್ ಕ್ಲಿನಿಕ್ ಅನ್ನು ಪ್ರಾರಂಭಿಸಲಾಗಿದೆ.

ಕೆಎಂಸಿ ಮಂಗಳೂರಿನ ವೈದ್ಯಕೀಯ ಅಧೀಕ್ಷಕ ಡಾ. ಎಂ. ಚಕ್ರಪಾಣಿ, ಡೀನ್ ಡಾ. ಉಣ್ಣಿಕೃಷ್ಣನ್ ಹಾಗೂ ಎಂಡೋಕ್ರೈನಾಲಜಿ ವಿಭಾಗದ ಸಹಾಯಕ ಪ್ರಾಧ್ಯಾಪಕ ಡಾ. ಸಚಿನ್ ಕೃಷ್ಣರಾಜ್ ಅವರು ಶುಕ್ರವಾರ ಸುದ್ದಿಗೋಷ್ಠಿಯಲ್ಲಿ ಈ ವಿಷಯವನ್ನು ತಿಳಿಸಿದರು.

ಈ ಕ್ಲಿನಿಕ್ ಬೊಜ್ಜು ಮತ್ತು ಅದಕ್ಕೆ ಸಂಬಂಧಿಸಿದ ವಿವಿಧ ಆರೋಗ್ಯ ಸಮಸ್ಯೆಗಳ ತಡೆಗಟ್ಟುವಿಕೆ ಹಾಗೂ ಚಿಕಿತ್ಸೆಗಾಗಿ ಹಲವು ವೈದ್ಯಕೀಯ ವಿಭಾಗಗಳನ್ನು ಒಂದೇ ಸೂರಿನಡಿ ತರಲಿದೆ. ಟೈಪ್ 2 ಮಧುಮೇಹ, ಅಧಿಕ ರಕ್ತದೊತ್ತಡ, ಹೃದಯ ರೋಗ, ಫ್ಯಾಟಿ ಲಿವರ್, ನಿದ್ರಾಹೀನತೆ, ಕೀಲು ನೋವು ಮತ್ತಿತರ ದೀರ್ಘಕಾಲದ ಕಾಯಿಲೆಗಳು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಈ ಕ್ಲಿನಿಕ್ ಅತ್ಯಂತ ಪರಿಣಾಮಕಾರಿಯಾಗಲಿದೆ. ವಿವಿಧ ವಿಭಾಗಗಳ ತಜ್ಞರನ್ನು ಒಳಗೊಂಡಂತಹ ತಂಡದ ಮೂಲಕ ಸಂಪೂರ್ಣ ತಪಾಸಣೆ ಮತ್ತು ಚಿಕಿತ್ಸಾ ಯೋಜನೆಯನ್ನು ಒದಗಿಸಲಾಗುತ್ತದೆ.

ಪ್ರತಿಯೊಬ್ಬ ರೋಗಿಗೂ ಮೆಟಾಬಾಲಿಕ್ ಮೌಲ್ಯಮಾಪನ, ವೈದ್ಯಕೀಯ ತೂಕ ನಿರ್ವಹಣೆ, ಆಹಾರ ಪದ್ಧತಿಯ ಸಲಹೆ (ಡಯಟ್ ಕೌನ್ಸೆಲಿಂಗ್), ವ್ಯಾಯಾಮದ ಬಗ್ಗೆ ತಿಳಿಯಪಡಿಸಲಾಗುತ್ತದೆ. ಬೊಜ್ಜು ಎನ್ನುವುದು ದೀರ್ಘಕಾಲದ ವೈಜ್ಞಾನಿಕ ನಿರ್ವಹಣೆಯ ಅಗತ್ಯವಿರುವ ಒಂದು ಸಂಕೀರ್ಣ ವೈದ್ಯಕೀಯ ಸ್ಥಿತಿಯಾಗಿದೆ. ಆರಂಭಿಕ ಹಂತದ ತಪಾಸಣೆ ಮತ್ತು ಬಹುವಿಭಾಗೀಯ ಚಿಕಿತ್ಸಾ ವಿಧಾನವು ಬೊಜ್ಜು ಸಂಬಂಧಿತ ತೊಂದರೆಗಳನ್ನು ಗಣನೀಯವಾಗಿ ಕಡಿಮೆ ಮಾಡುತ್ತದೆ, ಜೀವನಮಟ್ಟವನ್ನು ಸುಧಾರಿಸುತ್ತದೆ ಎಂದರು.

ವಿವಿಧ ವಿಭಾಗಗಳನ್ನು ಒಂದೇ ಸೂರಿನಡಿ ತರುವುದರಿಂದ ರೋಗಿಗಳು ಅತ್ತಿತ್ತ ಅಲೆದಾಡುವುದು ತಪ್ಪುತ್ತದೆ. ಸುಧಾರಿತ ಮತ್ತು ಸಂಪೂರ್ಣ ಆರೋಗ್ಯ ಸೇವೆಯನ್ನು ಕ್ಲಿನಿಕ್‌ನ ಮೂಲಕ ನೀಡಲಾಗುತ್ತದೆ. ಸಮಗ್ರ ಬೊಜ್ಜು ಮತ್ತು ಮೆಟಾಬಾಲಿಕ್ ಕ್ಲಿನಿಕ್ ಆ. 1ರಿಂದ ಪೂರ್ಣ ಪ್ರಮಾಣದಲ್ಲಿ ಅತ್ತಾವರದ ಕೆಎಂಸಿ ಆಸ್ಪತ್ರೆಯಲ್ಲಿ ಕಾರ್ಯಾಚರಿಸಲಿದೆ ಎಂದವರು ತಿಳಿಸಿದರು. ಗಣೇಶ್ ಹೆಗ್ಡೆ ಸುದ್ದಿಗೋಷ್ಠಿಯಲ್ಲಿದ್ದರು.