ಅನೈತಿಕ ಚಟುವಟಿಕೆಗಳ ತಾಣ ರಟ್ಟಿಹಳ್ಳಿ ಸರ್ಕಾರಿ ಪದವಿ ಪೂರ್ವ ಕಾಲೇಜ್ ಕಟ್ಟಡ

ರಟ್ಟಿಹಳ್ಳಿ: ಪಟ್ಟಣದ ಹೊರವಲಯದಲ್ಲಿರುವ ಸರ್ಕಾರಿ ಪದವಿ ಪೂರ್ವ ಕಾಲೇಜ್ ಕಟ್ಟಡ ಅನೈತಿಕ ಚಟುವಟಿಕೆಗಳ ತಾಣವಾಗುವ ಜತೆಗೆ ಕಿಡಿಗೇಡಿಗಳ ಕೃತ್ಯದಿಂದಾಗಿ ಕಟ್ಟಡದಲ್ಲಿನ ಸೌಲಭ್ಯಗಳು ಹಾನಿಗೀಡಾಗುತ್ತಿವೆ.

ಪಟ್ಟಣದ ಹಿರೇಕೆರೂರ ರಸ್ತೆಯಲ್ಲಿರುವ ಸರ್ಕಾರಿ ಪದವಿ ಪೂರ್ವ ಕಾಲೇಜ್ ಪ್ರತ್ಯೇಕ ಎರಡು ಕಟ್ಟಡ ಹೊಂದಿದೆ.

ಒಂದು ಹಳೆಯ ಕಟ್ಟಡವಿದೆ. ಇತ್ತೀಚೆಗೆ ಹೊಸದಾಗಿ ನೆಲಮಹಡಿ ಮತ್ತು ಮೇಲ್ಮಹಡಿ ಸೇರಿ ಒಟ್ಟು 6 ಕೊಠಡಿ ನಿರ್ವಿುಸಲಾಗಿದೆ. ಹೊಸ ಕಟ್ಟಡದಲ್ಲಿ ಕಲಾ ಮತ್ತು ವಾಣಿಜ್ಯ ವಿಭಾಗದ ವಿದ್ಯಾರ್ಥಿಗಳಿಗೆ ಶಿಕ್ಷಣ ನೀಡಲಾಗುತ್ತಿದೆ.

ಪ್ರಸ್ತುತ ಕಾಲೇಜ್​ಗಳಿಗೆ ರಜೆ ಇರುವ ಕಾರಣ ಕಟ್ಟಡ ಅನೈತಿಕ ಚಟುವಟಿಕೆಗೆ ಬಳಕೆಯಾಗುತ್ತಿದೆ. ಮದ್ಯವ್ಯಸನಿಗಳು, ಕೀಡಿಗೇಡಿಗಳು ಕಟ್ಟಡವನ್ನು ಮದ್ಯ ಸೇವಿಸುವ ತಾಣವಾಗಿಸಿಕೊಂಡಿದ್ದಾರೆ.

ಕುಡಿದ ಮತ್ತಿನಲ್ಲಿ ಕಿಟಿಕಿಯ ಎಲ್ಲ ಗಾಜುಗಳನ್ನು ಒಡೆದು ಹಾಕಿದ್ದಾರೆ. ಕಟ್ಟಡದ ನೆಲ ಮಹಡಿ ಮತ್ತು ಮೇಲ್ಮಹಡಿಯಲ್ಲಿ ಮದ್ಯ ಸೇವಿಸಿ, ಅಲ್ಲಿಯೇ ತಂಬಾಕು ಜಗಿದು ಎಲ್ಲೆಂದರಲ್ಲಿ ಉಗಿದು ಗಲೀಜು ಮಾಡಿದ್ದಾರೆ. ಜೂಜಾಟ ಆಡಿ ಅಲ್ಲಿಯೇ ಕಾರ್ಡ್ ಎಸೆದಿದ್ದಾರೆ.

ಕಾಲೇಜ್​ನ ಸಾಮಗ್ರಿಗಳಿಗೆ ಹಾನಿ

ಕಟ್ಟಡದ ಎಲ್ಲ ಕಿಟಕಿಗಳಿಗೆ ಅಳವಡಿಸಿದ ಗಾಜುಗಳನ್ನು ಒಡೆದು ಹಾಕಿದ್ದಾರೆ. ವಿದ್ಯುತ್ ಮೀಟರ್​ಗೆ ಅಳವಡಿಸಿರುವ ಪ್ಯೂಸ್, ಗೋಡೆಗೆ ಅಳವಡಿಸಲಾಗಿರುವ ಸ್ವಿಚ್ ಬೋರ್ಡ್​ಗಳನ್ನು ಕಲ್ಲಿನಿಂದ ಒಡೆದು ಹಾಕಿದ್ದಾರೆ.

ಕಾಲೇಜ್​ನಲ್ಲಿ ನಡೆಯುತ್ತಿರುವ ಅನೈತಿಕ ಚಟುವಟಿಕೆ ಕುರಿತು ಹಾಗೂ ಪದೇಪದೆ ಕಾಲೇಜ್​ನ ಸೌಕರ್ಯಗಳಿಗೆ ಹಾನಿ ಮಾಡುತ್ತಿರುವ ಕುರಿತು ಇತ್ತೀಚೆಗೆ ಪೊಲೀಸ್ ಠಾಣೆಗೆ ದೂರು ನೀಡಲಾಗಿದೆ.

ರಾತ್ರಿ ವೇಳೆ ಪೊಲೀಸ್ ಬೀಟ್​ಗೆ ವ್ಯವಸ್ಥೆ ಮಾಡುವಂತೆ ಮನವಿ ಮಾಡಲಾಗಿದೆ ಎಂದು ಪ್ರಾಚಾರ್ಯ ರಮೇಶ ಭೇಟಿ ತಿಳಿಸಿದ್ದಾರೆ.