ಮೊದಲೇ ಮಲೆನಾಡು ಭಾಗದಲ್ಲಿ ಕಾಡಾನೆಗಳ ಉಪಟಳದಿಂದ ಬೇಸತ್ತು ಕಂಗೆಟ್ಟಿರುವ ಕಾಫಿ ಬೆಳೆಗಾರರಿಗೆ ಗಾಯದ ಮೇಲೆ ಬರೆ ಎಂಬಂತೆ ಈಗ ಕಾಫಿಗೆ ಉತ್ತಮ ಬೆಲೆ ಇದ್ದರೂ ಕಾಫಿ ನೆಲಕ್ಕುರುಳಿ ಕೈಗೆ ಬಾರದಂತಾಗಿದೆ. ಇದರೊಂದಿಗೆ ಮೆಣಸು, ಅಡಕೆ ಸಹ ಉದರುತ್ತಿದೆ. ಅಲ್ಲದೆ ಒಂದೆಡೆ ಕಾರ್ಮಿಕರ ಸಮಸ್ಯೆ, ಮತ್ತೊಂದೆಡೆ ಕಾಡಾನೆ ಸಮಸ್ಯೆಗಳ ನಡುವೆಯೇ ಕಾಫಿ ಹಣ್ಣಾಗಿ ನೆಲಕ್ಕುದುರುತ್ತಿರುವುದರಿಂದ ಬೆಳೆಗಾರರಿಗೆ ದಿಕ್ಕು ತೋಚದಾಗಿದ್ದಾರೆ. ಜತೆಗೆ ಕಳೆದರೆಡು ದಿನಗಳ ಹಿಂದೆ ಸುರಿದ ಮಳೆಗೆ ಮಲೆನಾಡಿನ ನಾರ್ವೆ-ಸುಂಡೇಕೆರೆ ಗ್ರಾಮಗಳ ನಡುವಿನ ಸಂಪರ್ಕದ ಸೇತುವೆಯ ಮೇಲೆ ಎರಡು ಅಡಿ ನೀರು ಹರಿದಿದ್ದರಿಂದ ಜನರು ಓಡಾಡಲು ಪರದಾಡುವಂತಾಗಿತ್ತು. ನಿತ್ಯ ಸಂಜೆ ಸಮಯ ಗುಡುಗು ಸಿಡಿಲಿನಿಂದ ಪ್ರಾರಂಭವಾಗುತ್ತಿರುವ ಮಳೆ ರಾತ್ರಿ ಪೂರ್ತಿ ಬಿಡುವಿಲ್ಲದೆ ಬರುತಿದೆ. ಸಂಜೆ ನಂತರ ಮನೆಯಿಂದ ಯಾರೂ ಹೊರ ಬಾರದ ಸ್ಥಿತಿ ನಿರ್ಮಾಣವಾಗಿದೆ. ಈಗಾಗಲೇ ಅತಿವೃಷ್ಟಿಯಿಂದ ತೋಟದಲ್ಲಿನ ಕಾಫಿ, ಮೆಣಸು, ಅಡಕೆ ಬೆಳೆ ಕಳೆದುಕೊಂಡು ರೈತರು ಕಂಗೆಟ್ಟಿದ್ದು, ರೈತರಿಗೆ ಸರ್ಕಾರ ಎನ್ಡಿಆರ್ಎಫ್ ಮಾದರಿಯಲ್ಲಿ ಸೂಕ್ತ ಪರಿಹಾರ ನೀಡಬೇಕೆಂದು ಬೆಳೆಗಾರರು ಆಗ್ರಹಿಸಿದ್ದಾರೆ.
