ದೇಶದಲ್ಲಿ ಅತಿಹೆಚ್ಚು ತೆಂಗು ಬೆಳೆಯುವ ಕೇರಳ ಹಾಗೂ ತಮಿಳುನಾಡಿನಲ್ಲಿ ಇಳುವರಿ ಕುಸಿತಗೊಂಡಿದೆ. ಮಂಡ್ಯ, ಕರಾವಳಿ ಭಾಗದಲ್ಲೂ ಈ ಮೊದಲಿನಂತೆ ಇಳುವರಿ ಬರುತ್ತಿಲ್ಲ. ಇದಕ್ಕೆ ನಿಖರ ಕಾರಣ ತಿಳಿದಿಲ್ಲವಾದರೂ ಜಾಗತಿಕ ತಾಪಮಾನದ ಪ್ರಭಾವ ಇದ್ದಿರಬಹುದು ಎನ್ನಲಾಗುತ್ತಿದೆ. ತೆಂಗಿನಕಾಯಿ ಹೂವು ಬಿಡುವ ಸಂದರ್ಭದಲ್ಲಿ ಅಕಾಲಿಕ ಮಳೆಯಿಂದಾಗಿ ಅವು ಉದುರಿ ಕಾಯಿ ಬಿಡುವ ಸಂಖ್ಯೆ ಕಡಿಮೆಯಾಗುತ್ತಿದೆ. ಸೆಕೆಯ ಪ್ರಮಾಣ ಹೆಚ್ಚಾಗುತ್ತಿದ್ದು ಎಳನೀರಿಗೆ ಬೇಡಿಕೆ ಇದೆ. ಮಾರುಕಟ್ಟೆಯಲ್ಲಿ ಒಂದು ಎಳನೀರಿಗೆ 45ರಿಂದ 60ರೂ. ದರವಿದ್ದು, ಹೆಚ್ಚಿನ ಲಾಭವೂ ಸಿಗುವುದರಿಂದ ಬೆಳೆಗಾರರು ತೆಂಗಿನಕಾಯಿಯ ಬದಲು ಎಳನೀರು ಮಾರಾಟ ಮಾಡುತ್ತಿದ್ದಾರೆ. ರಾಜ್ಯದಲ್ಲಿ ಲಭಿಸುವ ತೆಂಗಿನಕಾಯಿಗಳು ಅರಸಿಕೆರೆ, ತಿಪಟೂರು ಭಾಗಗಳಲ್ಲಿರುವ ಕಾಯಿ ಫ್ಯಾಕ್ಟರಿಗೆ ರವಾನೆಯಾಗುತ್ತಿದೆ. ಅದನ್ನು ಡ್ರೈ ಪೌಡರ್ ಮಾಡಿ, ಹೆಚ್ಚಿನ ದರಕ್ಕೆ ಉತ್ತರ ಭಾರತದ ಪ್ರದೇಶಗಳಲ್ಲಿ ಮಾರಾಟ ಮಾಡಲಾಗುತ್ತಿದೆ. ಹೀಗಾಗಿ ಬೇಡಿಕೆಯಷ್ಟು ತೆಂಗು ಲಭಿಸದ್ದರಿಂದ ದರ ಏರುತ್ತಲಿದೆ.
