ಸಿಐಎಲ್ಗೂ ಸುಸ್ತಿಬಾಕಿದಾರ: ಸಿಂಗರೇಣಿ ಕಂಪನಿಯಿಂದ ಕಲ್ಲಿದ್ದಲು ಖರೀದಿ ಬಾಕಿ ಪಾವತಿಸಬೇಕಾಗಿದೆ ಎಂದು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಒಪ್ಪಿಕೊಂಡಿದ್ದಾರೆ. ಸಿಂಗರೇಣಿ ಮೂಗು ಹಿಡಿದ ಬಳಿಕ ಸರ್ಕಾರ ಬಾಯಿ ತೆರೆದಿದೆ. ಇನ್ನೆರಡು ದಿನಗಳಲ್ಲಿ ಬಾಕಿ ಚುಕ್ತಾ ಮಾಡಲು ಮುಂದಾಗಿದೆ. ಸಿಐಎಲ್ಗೆ ಒಟ್ಟು 20,000 ಕೋಟಿ ರೂ. ಬಾಕಿ ಇದ್ದು, ಈ ರಾಜ್ಯಗಳಲ್ಲಿ ಕರ್ನಾಟಕ ಸಹ ಸೇರಿದೆ. ಲಭ್ಯ ಮಾಹಿತಿ ಪ್ರಕಾರ ಮಹಾರಾಷ್ಟ್ರ- 2,600, ಪಂಜಾಬ್- 1,200, ತಮಿಳುನಾಡು- 1,100, ಮಧ್ಯಪ್ರದೇಶ- 1000, ಆಂಧ್ರಪ್ರದೇಶ-250 ಮತ್ತು ಕರ್ನಾಟಕ 230 ಕೋಟಿ ರೂ. ಬಾಕಿ ಪಾವತಿಸಬೇಕಾಗಿದೆ. ಸಂಕಷ್ಟ ಪರಿಹಾರ ಸೂತ್ರವಾಗಿ ಮಳೆಗಾಲಕ್ಕೆ ಪ್ರತಿ ಸ್ಥಾವರದಲ್ಲಿ ತಲಾ 3-4 ಲಕ್ಷ ಟನ್ ಕಲ್ಲಿದ್ದಲು ದಾಸ್ತಾನು ಮಾಡಲಾಗುತ್ತಿತ್ತು. ಒಡಿಶಾ, ಮಹಾರಾಷ್ಟ್ರ, ಸಿಂಗರೇಣಿ ಗಣಿಗಳಿಂದ ಪ್ರತಿದಿನ ತಲಾ 7-8 ರೇಕ್ಗಳಲ್ಲಿ ಕಲ್ಲಿದ್ದಲು ಪೂರೈಕೆಗೆ ವ್ಯವಸ್ಥೆಯಾಗುತ್ತಿತ್ತು. ಸಿಎಂ ನೀಡಿದ ಅಂಕಿ-ಅಂಶಗಳ ಪ್ರಕಾರ ಮೂರು ಸ್ಥಾವರಗಳಲ್ಲಿ ಒಟ್ಟಾರೆ 98,863 ಮೆಟ್ರಿಕ್ ಟನ್ ಕಲ್ಲಿದ್ದಲಿದೆ. ಪ್ರತಿದಿನ 10 ರೇಕ್ಗಳಲ್ಲಿ ಪೂರೈಕೆಯಾಗುತ್ತಿದ್ದು, ಹೆಚ್ಚುವರಿಯಾಗಿ ಇನ್ನೆರಡಕ್ಕೆ ಕಸರತ್ತು ನಡೆಸಿದೆ. ದಾಸ್ತಾನು ಪ್ರಮಾಣ ಮತ್ತು ಪೂರೈಕೆ ಗಮನಿಸಿದರೆ ಸರ್ಕಾರದ ನಿರ್ಲಕ್ಷ್ಯ ಎದ್ದುಕಾಣುತ್ತಿದೆ. ಜತೆಗೆ ಅಧಿಕಾರಿಗಳ ತಪು್ಪ ಮಾಹಿತಿ ನಂಬಿ ಸರ್ಕಾರ ಮುಗ್ಗರಿಸಿದೆ ಎಂದು ಹೇಳಲಾಗುತ್ತಿದೆ. ನವೀಕರಿಸಬಹುದಾದ ಇಂಧನ ಮೂಲಗಳ ಉತ್ಪಾದನೆ ಹೆಚ್ಚಿದೆ. ಹೇಗಿದ್ದರೂ ಮಳೆಗಾಲದಲ್ಲಿ ವಿದ್ಯುತ್ ಬೇಡಿಕೆ ಕಡಿಮೆಯಿರುತ್ತದೆ. ಉತ್ಪಾದನಾ ವೆಚ್ಚ ಜಾಸ್ತಿಯಿರುವ ಥರ್ಮಲ್ ಸ್ಥಾವರಗಳಿಗೆ ಪ್ರಾಮುಖ್ಯತೆ ಕಡಿಮೆ ಮಾಡಿದರೆ ಲೇಸು. ಪ್ರತಿ ಸ್ಥಾವರಕ್ಕೆ 3-4 ಲಕ್ಷ ಟನ್ ಕಲ್ಲಿದ್ದಲು ಸಂಗ್ರಹ (ಪ್ರತಿ ಟನ್ ಕಲ್ಲಿದ್ದಲು ದರ 4,200 ರೂ)ಕ್ಕೆ ನೂರಾರು ಕೋಟಿ ರೂ. ಅಗತ್ಯವಿದೆ. ಮುಂದೆ ನೋಡೋಣವೆಂಬ ಅಧಿಕಾರಿಗಳ ಲೆಕ್ಕಾಚಾರವನ್ನೇ ಸರಿಯೆಂದು ಭಾವಿಸಿದ ಸರ್ಕಾರ ಕೈಸುಟ್ಟುಕೊಂಡಿದೆ.
