ಸಚಿವರೊಂದಿಗೆ ಸಿಎಂ ಸಿದ್ದರಾಮಯ್ಯ ರಹಸ್ಯ ಸಭೆ, ಏನೇನು ಚರ್ಚಿಸಿದರು ?

ಕೊಪ್ಪಳ: ವಿಜಯಪುರದಿಂದ ಬೆಂಗಳೂರಿಗೆ ತೆರಳುವ ಮುನ್ನ ತಾಲೂಕಿನ ಬಸಾಪುರ ವಿಮಾನ ನಿಲ್ದಾಣದಲ್ಲಿ ಸೋಮವಾರ ಸಂಜೆ ಸಿಎಂ ಸಿದ್ದರಾಮಯ್ಯ ಸಚಿವರಾದ ಎಂ.ಬಿ.ಪಾಟೀಲ್​ ಹಾಗೂ ಕೆ.ಎನ್​.ರಾಜಣ್ಣ ಜತೆ ಅರ್ಧ ಗಂಟೆಗೂ ಹೆಚ್ಚು ಕಾಲ ಗುಪ್ತವಾಗಿ ಚರ್ಚೆ ನಡೆಸಿದ್ದು ಚರ್ಚೆಗೆ ಗ್ರಾಸವಾಗಿದೆ.

ವಿಜಯಪುರದಿಂದ ಹೆಲಿಕಾಪ್ಟರ್​ನಲ್ಲಿ ಬಂದ ಸಿಎಂ, ಸಚಿವರೊಂದಿಗೆ ನೆರವಾಗಿ ಪ್ರತ್ಯೇಕ ಕೊಠಡಿಗೆ ತೆರಳಿದರು. ಮೂವರನ್ನು ಹೊರತುಪಡಿಸಿ ಬೇರೆಯವರನ್ನು ಒಳ ಬಿಟ್ಟುಕೊಳ್ಳಲಿಲ್ಲ. ಹೀಗಾಗಿ ಏನೇನು ಚರ್ಚಿಸಿದರೆಂಬ ಕುತೂಹಲ ಹೊರಗಿದ್ದವರಿಗೆ ಕಾಡಿತು. ಈ ವೇಳೆ ದೆಹಲಿಯಿಂದ ಕರೆ ಬಂದಿದ್ದು, ಸದ್ಯದ ರಾಜಕೀಯ ಕುರಿತು ಕೈ ಹೈಕಮಾಂಡ್​ ಮಾಹಿತಿ ಪಡೆದಿದ್ದು, ಕೆಲ ಸೂಚನೆಗಳನ್ನು ನೀಡಿದೆ ಎನ್ನಲಾಗುತ್ತಿದೆ.

ಸಭೆ ಬಳಿಕ ಹೊರ ಬಂದ ಸಿಎಂ ಈ ಬಗ್ಗೆ ಯಾವುದೇ ಪ್ರತಿಕ್ರಿಯೆ ನೀಡದೆ ವಿಮಾನ ಏರಿದರು. ಬೆಳಗ್ಗೆ ಮಾಜಿ ಸಿಎಂ ಎಚ್​ಡಿಕೆ ವಿರುದ್ಧ ಹರಿಹಾಯ್ದಿದ್ದ ಸಿದ್ದರಾಮಯ್ಯ, ಸರ್ಕಾರ ರಚನೆಗೆ ನನ್ನ ಬಳಿ ಬಂದಿದ್ದ ನಾಯಿ ಯಾವುದು ಎಂಬ ಎಚ್ಡಿಕೆ ಹೇಳಿಕೆಗೂ ಸಣ್ಣ ಪ್ರತಿಕ್ರಿಯೆ ನೀಡಲಿಲ್ಲ.

ಸಚಿವ ಎಂ.ಬಿ.ಪಾಟೀಲ್​ ಪ್ರತಿಕ್ರಿಯಿಸಿ, ತೆರಳಲು ಸಮಯವಿದ್ದ ಕಾರಣ ವಿವಿಧ ವಿಷಯಗಳ ಕುರಿತು ಸಿಎಂ ಜತೆ ಮಾತನಾಡುತ್ತಾ ಕುಳಿತಿದ್ದೆವು. ದೆಹಲಿಯಿಂದ ಯಾವುದೇ ಕರೆ ಬಂದಿಲ್ಲ. ನಿಮಗೆ ಯಾರೂ ತಿಳಿಸಿದರು ಗೊತ್ತಿಲ್ಲ ಎಂದರು. ಆದರೆ, ಯಾವ ವಿಷಯ ಕುರಿತು ಸಿಎಂ ಜತೆ ಚರ್ಚಿಸಿದರೆಂಬ ಬಗ್ಗೆ ಗುಟ್ಟು ಬಿಟ್ಟುಕೊಡಲಿಲ್ಲ.