ಲೋಕೋಪಯೋಗಿ, ಸಾರಿಗೆ, ಸಮಾಜ ಕಲ್ಯಾಣ ಅಥವಾ ಗ್ರಾಮೀಣಾಭಿವೃದ್ಧಿ ಪೈಕಿ ಯಾವುದಾದರೂ ಒಂದು ಖಾತೆ ಕೊಡಿ, ಜನರ ಜತೆಗೆ ಬೆರೆಯಲು ಸಾಧ್ಯವಾಗುತ್ತದೆ ಎಂದು ಎಂಟಿಬಿ ನಾಗರಾಜ್ ವಾದ ಮಂಡಿಸಿದ್ದಾರೆ. ವಸತಿ ಖಾತೆ ನೀಡುವ ಭರವಸೆ ಈಡೇರಿಲ್ಲ, ಪೌರಾಡಳಿತ ಮತ್ತು ಸಣ್ಣ ಕೈಗಾರಿಕೆ ಖಾತೆ ಕೊಟ್ಟಿದ್ದರಿಂದ ಹಿಂಬಡ್ತಿಯಾದಂತಿದೆ, ‘ತ್ಯಾಗ’ಕ್ಕೆ ಬೆಲೆಯಿಲ್ಲದಂತಾಗಿದೆ ಎಂಬ ಸಿಡಿಮಿಡಿ ವ್ಯಕ್ತಪಡಿಸಿದ್ದಾರೆ. ಸಾವಧಾನವಾಗಿ ಎಲ್ಲವನ್ನು ಕೇಳಿಸಿಕೊಂಡ ಬೊಮ್ಮಾಯಿ, ಮನವೊಲಿಸಲು ಪ್ರಯತ್ನಿಸಿದ್ದಾರೆ. ಜತೆಗೆ ವರಿಷ್ಠರೊಂದಿಗೆ ಈ ಬಗ್ಗೆ ಮಾತುಕತೆ ನಡೆಸುವೆ ಎಂದಷ್ಟೇ ಹೇಳಿದ್ದಾರೆ. ಈ ನಡುವೆ ಎಂಟಿಬಿ ನಾಗರಾಜ್ ಹಟ ಹಿಡಿದಿರುವುದಕ್ಕೆ ಕೆಲವು ವಲಸಿಗ ಮಿತ್ರರು ಆಕ್ಷೇಪವೆತ್ತಿದ್ದು, ಈಗ ಕೊಟ್ಟಿರುವ ಖಾತೆ ಸಮರ್ಥವಾಗಿ ನಿಭಾಯಿಸಿ ಸಾಕು ಎಂಬ ಸಲಹೆ ನೀಡಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
