ವಾಯುಮಾಲಿನ್ಯ ನಿಯಂತ್ರಣಕ್ಕಾಗಿ ಚರ್ಚ್​ ಸ್ಟ್ರೀಟ್​ ವಾರಾಂತ್ಯ ಬಂದ್​

| ಗಿರೀಶ್ ಗರಗ ಬೆಂಗಳೂರು

ರಾಜಧಾನಿಯಲ್ಲಿ ವಾಯುಮಾಲಿನ್ಯ ಹತೋಟಿ ಮೀರಬಾರದು ಎಂಬ ಕಾರಣಕ್ಕಾಗಿ ನಗರ ಭೂಸಾರಿಗೆ ನಿರ್ದೇಶನಾಲಯ (ಡಲ್ಟ್) ‘ಕ್ಲೀನ್ ಏರ್​ಸ್ಟ್ರೀಟ್’ ಪರಿಕಲ್ಪನೆ ಅನುಷ್ಠಾನಗೊಳಿಸುತ್ತಿದೆ. ಅದರ ಮೊದಲ ಭಾಗವಾಗಿ ಚರ್ಚ್​ಸಿ್ಟ್ರಟ್​ನಲ್ಲಿ ಮೋಟಾರು ವಾಹನ ಸಂಚಾರಕ್ಕೆ ತಡೆಯೊಡ್ಡಲಾಗುತ್ತಿದೆ.

ಬೆಂಗಳೂರಿನಲ್ಲಿರುವ 90 ಲಕ್ಷಕ್ಕೂ ಹೆಚ್ಚಿನ ವಾಹನಗಳಿಂದಾಗಿ ವಾಯುಮಾಲಿನ್ಯ ಹೆಚ್ಚುತ್ತಿದೆ. ಅದನ್ನು ತಡೆಯಲು ಸೈಕಲ್ ಸವಾರಿ, ಪಾದಚಾರಿಗಳಿಗೆ ಉತ್ತೇಜನ ನೀಡುವಂತಹ ಕ್ರಮಗಳ ಅನುಷ್ಠಾನಕ್ಕೆ ಸ್ಥಳೀಯ ಆಡಳಿತಕ್ಕೆ ಡಲ್ಟ್ ಸೂಚಿಸುತ್ತಿದೆ. ಈ ಕಾರ್ಯವನ್ನು ಇನ್ನಷ್ಟು ಪರಿಣಾಮಕಾರಿಯಾಗಿ ಜಾರಿಗೆ ತರಲು ಭಾರತೀಯ ವಿಜ್ಞಾನ ಸಂಸ್ಥೆ (ಐಐಎಸ್ಸಿ) ಸಹಯೋಗದೊಂದಿಗೆ ‘ಕ್ಲೀನ್ ಏರ್​ಸ್ಟ್ರೀಟ್’ ಪರಿಕಲ್ಪನೆ ಅನುಷ್ಠಾನಕ್ಕೆ ತರಲಾಗುತ್ತಿದೆ. ಅದರ ಮೂಲಕ ಚರ್ಚ್ ಸ್ಟ್ರೀಟ್​ನಲ್ಲಿ 2021ರ ಫೆಬ್ರವರಿವರೆಗೆ ವಾರಾಂತ್ಯದ ದಿನಗಳಂದು ಮೋಟಾರು ವಾಹನ ಸಂಚಾರಕ್ಕೆ ನಿಷೇಧ ಹೇರಲಾಗುವುದು.

ಎನ್​ಜಿಒ, ಸ್ಟಾರ್ಟ್ ಅಪ್​ಗಳ ಸಹಯೋಗ: ಕ್ಲೀನ್ ಏರ್​ಸ್ಟ್ರೀಟ್ ಯೋಜನೆ ಅನುಷ್ಠಾನ ಯಾವ ರೀತಿ ಮಾಡಬಹುದು ಎಂಬುದರ ಬಗ್ಗೆ ಯೋಜನೆ ರೂಪಿಸಲು ಸ್ವಯಂಸೇವಾ ಸಂಸ್ಥೆಗಳು, ಸ್ಟಾರ್ಟ್ ಅಪ್​ಗಳ ಸಹಕಾರ ಪಡೆಯಲು ಡಲ್ಟ್ ಮುಂದಾಗಿದೆ. ಯೋಜನೆ ಅನುಷ್ಠಾನ ಕುರಿತ ಉಪಾಯಗಳು, ವಾಹನಗಳ ಸಂಚಾರ ಸ್ಥಗಿತಗೊಳಿಸುವ ಬಗೆ, ಗಾಳಿಯ ಗುಣಮಟ್ಟ ಹೆಚ್ಚಿಸಲು ಯಾವೆಲ್ಲ ಕ್ರಮ ಕೈಗೊಳ್ಳಬಹುದು ಎಂಬುದರ ಬಗ್ಗೆ ಕ್ರಮ ಕೈಗೊಳ್ಳಬೇಕಿದೆ. ಕ್ಲೀನ್ ಏರ್​ಸ್ಟ್ರೀಟ್ ಪರಿಕಲ್ಪನೆಯಂತೆ ಚರ್ಚ್ ಸ್ಟ್ರೀಟ್​ನಲ್ಲಿ ವಾಯುಮಾಲಿನ್ಯ ಕಡಿಮೆಯಾಗಿ, ಗಾಳಿಯ ಗುಣಮಟ್ಟ ಹೆಚ್ಚಿದರೆ ಅದನ್ನು ಇತರ ಪ್ರಮುಖ ಬೀದಿಗಳಿಗೂ ಅಳವಡಿಸಲು ಡಲ್ಟ್ ನಿರ್ಧರಿಸಿದೆ.

ಚರ್ಚ್ ಸ್ಟ್ರೀಟ್ ಏಕೆ?

ನಗರದ ಕೇಂದ್ರ ಭಾಗದಲ್ಲಿ, ಅದರಲ್ಲೂ ವಾಣಿಜ್ಯ ಚಟುವಟಿಕೆ ಹೆಚ್ಚಿರುವ ರಸ್ತೆಯಲ್ಲಿ ಕ್ಲೀನ್ ಏರ್​ಸ್ಟ್ರೀಟ್ ಅನುಷ್ಠಾನಕ್ಕೆ ಡಲ್ಟ್ ನಿರ್ಧರಿಸಿತ್ತು. ಚರ್ಚ್ ಸ್ಟ್ರೀಟ್ ಟೆಂಡರ್ ಶ್ಯೂರ್ ರಸ್ತೆಯಾಗಿದ್ದು, ವಾಣಿಜ್ಯ ಚಟುವಟಿಕೆ ಹೆಚ್ಚಿನ ಪ್ರಮಾಣದಲ್ಲಿದೆ. ಇಲ್ಲಿ ಪಾದಚಾರಿಗಳ ಓಡಾಟವೂ ಹೆಚ್ಚಿದೆ. ಹೀಗಾಗಿ ಚರ್ಚ್ ಸ್ಟ್ರೀಟ್​ನಲ್ಲಿ ಕ್ಲೀನ್ ಏರ್​ಸ್ಟ್ರೀಟ್ ಪರಿಕಲ್ಪನೆ ಅನುಷ್ಠಾನ ಮಾಡಲು ನಿರ್ಧರಿಸಲಾಗಿದೆ. ವಿದ್ಯಾರ್ಥಿಗಳ ಪಾಲ್ಗೊಳ್ಳುವಿಕೆ: ಯೋಜನೆ ಅನುಷ್ಠಾನಕ್ಕೆ ಸಂಬಂಧಿಸಿದಂತೆ ಐಐಎಸ್ಸಿ ಸಹಕಾರ ಪಡೆಯಲಾಗುತ್ತಿದೆ. ಐಐಎಸ್ಸಿ ಅಂತಿಮ ವರ್ಷದ ಸಿವಿಲ್ ಇಂಜಿನಿಯರಿಂಗ್, ಟ್ರಾನ್ಸ್​ಪೋರ್ಟೆಷನ್ ಇಂಜಿನಿಯರಿಂಗ್​ನ ಮೊದಲ ವರ್ಷದ ವಿದ್ಯಾರ್ಥಿಗಳನ್ನು ಪ್ರಶಿಕ್ಷಣ ಆಧಾರದಲ್ಲಿ ತೊಡಗಿಸಿಕೊಳ್ಳಲು ನಿರ್ಧರಿಸಿದೆ. ಇಂಟರ್ನ್​ಶಿಪ್​ಗೆ ಆಯ್ಕೆಯಾಗುವ ವಿದ್ಯಾರ್ಥಿಗಳು ಚರ್ಚ್​ಸಿ್ಟ್ರಟ್​ನಲ್ಲಿನ ಪರಿಸ್ಥಿತಿ ಅವಲೋಕಿಸಬೇಕಿದೆ. ವಿದ್ಯಾರ್ಥಿಗಳು ಪ್ರತಿ ಶನಿವಾರ ಮತ್ತು ಭಾನುವಾರ ಸ್ಥಳಕ್ಕೆ ಭೇಟಿ ನೀಡಿ ವಾಹನಗಳ ಓಡಾಟ, ಜನರ ಪ್ರತಿಕ್ರಿಯೆ ಅವಲೋಕಿಸುವರು. ಎಷ್ಟು ಜನರು ಓಡಾಡುತ್ತಾರೆ, ಸಾರಿಗೆಗೆ ಸೈಕಲ್ ಬಳಸುತ್ತಾರೆಯೇ ಎಂಬ ಮಾಹಿತಿ ಸಂಗ್ರಹಿಸಬೇಕು.ಇಂಟರ್ನ್​ಶಿಪ್ ಅವಧಿ 5 ತಿಂಗಳಿಗೆ ಸೀಮಿತವಾಗಿರಲಿದೆ.